ЎзХДП Амударё туман Кенгаши VII пленуми бўлиб ўтди

Шу йил йил 9 апрель куни Ўзбекистон Халқ демократик партияси Амударё туман Кенгашининг навбатдаги VII пленуми бўлиб ўтди.

Пленумда ХДП Амударё туман Кенгаши аъзолари ва масъул ходимлари, халқ депутатлари туман Кенгашидаги партия гуруҳи аъзолари, бошланғич партия ташкилоти етакчилари, фаоллари ва оммавий ахборот воситалари вакиллари иштирок этди.

Пленумнинг асосий мақсади – 2017-2021 йилларда Ўзбекистон Pеспубликасини ривожлантиришнинг бешта устувор йўналиши бўйича Ҳаракатлар стратегиясини “Фаол инвестициялар ва ижтимоий ривожланиш йили”да амалга оширишга оид Давлат дастури ижросини таъминлашда партия ташкилотлари, халқ депутатлари туман Кенгашидаги партия гуруҳи аъзолари ва бошланғич партия ташкилотлари иштирокини янада кучайтириш бўйича вазифаларни белгилаб олишдан иборат бўлди.

Эътироф этилдики, Президентимиз томонидан 2017-2021 йилларда Ўзбекистон Pеспубликасини ривожлантиришнинг бешта устувор йўналиши бўйича Ҳаракатлар стратегиясининг белгилаб берилиши ҳамда ушбу тарихий хужжат асосида олиб борилаётган ислоҳотлар мамлакатимиз тараққиёти ва халқимиз фаровонлиги ошишига хизмат қилмоқда.

Ҳаракатлар стратегиясини “Фаол инвестициялар ва ижтимоий ривожланиш йили”да амалга оширишга оид Давлат дастурида белгиланган долзарб вазифалар ижросини таъминлашда партия гуруҳи иштирокини таъминлаш бўйича Ўзбекистон Халқ демократик партиясининг комплекс чора-тадбирлар дастури қабул қилинди ва ижроси таъминлаб келинмоқда.

Пленумда халқ депутатлари Амударё туман Кенгашидаги партия депутатлик гуруҳининг ўтган йилдаги фаолияти сарҳисоб қилинди. Қайд этилганидек, партия депутатлик гуруҳи фаолияти нисбатан кучайиб, аниқ бир муаммоли масалани ўрганиш, таҳлил қилиш ҳамда бу борада ҳокимликка таклиф, тавсиялар тақдим этиш тизими шаклланди.

Шунингдек, партия гуруҳи аъзолари томонидан давлат ҳокимияти ва бошқаруви органларининг мансабдор шахсларига жами 27 та депутатлик сўровлари юборилди. Улар жойларга чиққанларида 478 нафар фуқаролар билан мулоқотлар ўтказдилар. Мазкур мулоқотлар давомида фуқаролар томонидан 156 та муаммоли масалалар кўтарилган. Мазкур муаммоларнинг 81га яқини ҳудудларнинг ўзида маҳаллий мутасаддилар билан муҳокама қилиниб, амалий ёрдам бериш чоралари кўрилди, хотин-қизларнинг ижтимоий-сиёсий фаоллигини ошириш, уларни ижтимоий қўллаб-қувватлаш мақсадида кўрик-танлов, лойиҳалар, акциялар ўтказилди, уларга 400 дан ортиқ аёллар қамраб олинди. Шунингдек, партия тизимида амалга оширилаётган аксарият лойиҳалар ёшларни қўллаб-қувватлашга, уларнинг истеъдодини аниқлаш ва рўёбга чиқаришга ҳамда ёшлар учун муносиб шароитларни яратишга қаратилган.

Бундан ташқари, партиянинг “Фаол аёллар” ва “Истиқбол” ёшлар қаноти томонидан ёшлар ва хотин-қизлар ўртасидаги жиноятчиликнинг олдини олишга қаратилган тадбирларни кўпроқ ташкил қилиш, аҳолининг кенг қатламлари орасига чуқур кириб бориб, бевосита мулоқотларни йўлга қўйиш зарурлиги қайд этилди.

Якунда давлат Дастурининг ҳар бир йўналиши бўйича энг муҳим вазифалар белгиланиб, партиядан сайланган барча депутатлар, партия ходимлари ва фаолларидан юксак масъулиятни ҳис қилган ҳолда, ишни тўғри ташкил этишга ҳамда вазифаларни сўзсиз бажарилишини таъминлашга келишиб олинди. Пленум кун тартибида кўриб чиқилган барча масалалар бўйича тегишли қарорлар қабул қилинди.