Соғлом бола йили янгиликлари

 Туманимизда паррандачиликни ривожлантиришга катта аҳамият берилмоқда. Бу соҳада олиб борилаётган ишлар натижасида яқин кунларда "Қорақалпоқ маҳсулотлари” масъулияти чекланган жамиятида гўшт етиштириш йўналишида 28 минг бош парранда боқилиши ва паррандачилик хўжаликларига омухта-ем ишлаб чиқариш йўлга қўйилади.

Бугунги кунда бу корхонада қурилиш таъмирлаш ишлари якунланиб, омухта-ем ишлаб чиқариш ускуналарини ўрнатиш ишлари олиб борилмоқда.

 Касаба уюшмалари фаолияти сарҳисоби

 Туман халқ таълими муассасалари фаолиятини методик таъминлаш ва ташкил этиш бўлими биносида туманимизда фаолият юритаётган касаба уюшмалари қўмиталари ташаббуси билан давра суҳбати ўтказилди. Йиғилишда туманимизда фаолият юритаётган касаба уюшмалари қўмиталари раҳбарлари, муассаса, корхона ва ташкилотлардаги касаба уюшмалари қўмиталари башланғич ташкилотларининг қўмита раислари, туман ҳокимлиги ва бўлимлар, молия муассасалари вакиллари ва бошқа тегишли мутасаддилар иштирок этишди. "Меҳнат соҳасидаги долзарб масалалар” мавзусида ўтказилган ушбу давра суҳбатида 2013 йилда туманни ижтимоий-иқтисодий ривожлантириш якунлари ҳамда 2014  йилдаги устувор йўналишлар, 2013 йилда жамоат шартномалари ва келишимларнинг бажарилиши, аҳолини иш билан таъминлаш, меҳнат ҳақи ва меҳнатни муҳофаза қилишни янада кучайтириш, ижтимоий соҳани ривожлантириш ва ижтимоий нафақаларнинг ўз вақтида тўланишида банк тизими олдида турган вазифалар, давлат бюджетидан молиялаштириладиган ташкилотларда ижтимоий муҳофаза ва меҳнат муҳофазаси каби масалалар бўйича муҳокамалар ўтказилди. Йиғилишда кўрилган масалалар юзасидан тегишли қарорлар қабул қилинди.

 Ёнғин – тилсиз ёв

 Қиш мавсумида иситиш мосламаларидан нотўғри фойдаланиш, ёнғин хавфсизлиги қоидаларига риоя қилмаслик, ёш болаларни қаровсиз қолдириш ёнғинга сабаб бўлиши мумкин. Шуларни эътиборга олган ҳолда, туман ички ишлар бўлимининг ёнғин хавфсизлиги бўлинмаси томонидан қатор амалий ишлар қилинмоқда.

Бўлинма томонидан жойларда қатор текширув ва рейдлар ўтказилмоқда. Корхона ва ташкилотларда, ўқув масканларида ёнғин хавфсизлиги бурчаги ташкил этилиб, ёнғин хавфсизлиги шартларига беэътибор қараган раҳбар ва масъул ходимларга нисбатан маъмурий чоралар кўрилмоқда. Шунингдек, ёнғиннинг олдини олиш бўйича тегишли чоралар кўрилмаган корхона, цех ва омборхоналардан фойдаланиш вақтинча тўхтатилиши огоҳлантирилиб, носоз электр мосламалари, агрегатларнинг электр тармоғидан фойдаланиши таъқиқланмоқда.

Жорий йилда туманимиздаги "Азия Силк”, "Зас металл прадакшн” каби хорижий сармоя иштирокидаги корхоналар билан бир қаторда "Амударё текстил” хорижий корхонаси ҳам ўз фаолиятини бошлайди.

Ип-калава ишлаб чиқаришга мўлжалланган ушбу лойиҳани амалга ошириш доирасида 28,6 млрд сўм миқдорида инвестиция киритилиши белгиланган бўлса, 2013 йил якунларига кўра 43,8 млн АҚШ доллари миқдорида хорижий инвестиция киритилиб, ҳозирги кунда қурилиши ишлари давом қилдирилмоқда.

Бу лойиҳа якунига етказилиши натижасида 250 та янги иш ўринлари яратилади.