МАҲАЛЛАДА ҲАМ КАСБИЙ ФАОЛИЯТИМДА ҲАМ ХАЛҚ БИЛАН БИPГАМАН

Биз ҳаммамиз маҳаллада яшаймиз, маҳалламиздаги ҳар бир кўча, ҳар битта хонадон, маҳалланинг ёш-у қариси биз учун қадрли, таниш. Шунинг учун ҳам маҳалламизнинг ҳар бир қарич ерини обод, халқини фаровон, бахтиёр кўргимиз келади.

Мен Манғит шаҳрининг Ойбек номли  маҳалласида яшайман. Гарчи туман Тиббиёт бирлашмасида фаолият юритсам-да, ўзим истиқомат қиладиган маҳалла ва кўчанинг доимо ободон ва саришта бўлиши, тўй-маросимларнинг камчиқим, файзли ўтиши учун маҳалламиз фаоллари билан ҳамжиҳатликда иш юритишга ҳаракат қиламан. Йилнинг тўрт фаслида ҳам Ойбек номли маҳалламизда ободонлаштириш ва кўкаламзорлаштириш ишлари асло тўхтамайди. Ҳар бир хонадоннинг мўъжазгина ўз боғ-роғи бор томорқасини ризқ-рўз манбаига айлантирмаган хонадон йўқ ҳисоби.

Маҳалла фаоллари билан биргаликда турли байрам саналари муносабати билан маданий-маърифий тадбирлар ўтказамиз. Айниқса, ёшларнинг бўш вақтларини мазмунли ўтказиш, уларнинг  бандлигини таъминлаш, гиёҳвандликка қарши кураш, эрта ва қариндошлар никоҳининг олдини олиш, диний-эксремизмга, ёт ғояларга қарши кураш мавзуларидаги тадбирларга бутун маҳалла ёшлари қамраб олинади. Бу каби тадбирлар боис, маҳалламизда жиноятчилик, маъмурий ҳуқуқбузарлик ҳолатлари йўқ ҳисоби.

Мен 7-Ойбек сайлов округидан сайланган Адолат СДПдан халқ депутатлари туман Кенгаши депутати сифатида сайловчиларнинг  манфаатларини ҳимоя қилиш мақсадида уларнинг мурожаатлари бўйича партия Кенгашига 8 та сўровнома киритиб, бу мурожаатларнинг ўз вақтида ҳал этилишида депутатлик ваколатим доирасида иш юритиб, маҳалламиз аҳолиси ҳаётига оид муаммолар ечимини топишда ўз ҳиссамни қўшганимдан мамнунман.

Маҳалладаги икки нафар қария ҳолидан тез-тез хабар олиш, турли байрамлар саналари муносабати билан ибратли оилалар бекалари ва халқимизга ўз вақтида фидойи хизмат қилган, айни пайтда нафақада бўлган инсонларга совғалар бериш, хонадонларга  кириб, халқ билан очиқ мулоқотлар ўтказиш, сайловчиларнинг мурожаатларини жойига чиқиб ўрганиш, партия гуруҳи аъзолари билан биргаликда ёшлар ўртасида очиқ ва ошкора тарбиявий суҳбатлар ўтказиш доимий анъанага айланган.

Ўз касбий фаолиятим билан боғлиқ масалаларни ҳал этишда ҳам бевосита Адолат СДПнинг сайловолди дастури ва сайловдан кейинги режавий тадбирларини ўз вақтида бажаришни ўз бурчим деб биламан. Туман Тиббиёт бирлашмаси касаба уюмаси қўмитасининг йиллик ва чораклик режавий тадбирлари доирасида турли байрам саналари муносабати билан фаол касаба уюшма аъзолари рағбатлантириб борилмоқда. Чунончи, 8 март – Халқаро хотин-қизлар куни муносабати билан тиббиёт ходимларидан 40 нафар аёл-қизларга, Наврўз - умумхалқ байрами арафасида 50 нафар фахрий ва энг фаол шифокорларга касаба уюшма қўмитаси томонидан қимматбаҳо совғалар берилди. 9 май -  Хотира ва қадрлаш куни муносабати билан собиқ афғон уруши фахрийлари учун “Бир пиёла чой устида гурунг” тадбири ташкил этилгани айни муаддао бўлди. Фахрий жангчилар олис йиллар хотираларини эслаб, маданий ва маънавий дам олдилар.

Шуни алоҳида таъкидлаш керакки меҳнат аҳли ҳамиша мазмунли ҳордиқ чиқариш, саёҳатлар қилиш эвазига ўз соғлигини, меҳнат қобилиятини тиклаб олади. Шу боис, ТТБ касаба уюшма қўмитаси томонидан ҳар йили тиббиёт ходимлари учун тарихий қадамжоларга, мамлакатимизнинг тарихий шаҳарларига саёҳатлар уюштирилиб турилади. Хусусан, Нукус шаҳридаги Савицкий номидаги тарихий музейга, Хива шаҳрига, Шайх Жалил ота, Султон Увайс Корайнин, Кечирмас ота, Норинжон бобо зиёратгоҳларига уюштирилган саёҳатларда ҳар сафар 50-60 нафар тиббиёт ходимлари оила аъзолари билан мириқиб дам оладилар. Бундан ташқари, касаба уюшма қўмитаси ҳомийлигида “Соғлом оила” шиори остида ташкил этиладиган оилавий спорт мусобақалари мунтазам равишда ўтказилмоқда.

Албатта, бу каби тадбирлар ҳар бир меҳнаткаш инсоннинг қалбида она юртга муҳаббат туйғуларини уйғотиб, касбий фаолиятида ва ҳаётда фаолликка ундайди, жўшқин кайфият бахш этади, Ҳаётга жўшқин назар билан боқишга ўргатади ва бундаёин жўшқинлик инсонни маънан юксалтиради.

Pўзимбой НУPИМБЕТОВ, ТТБ касаба уюшма қўмитаси раиси,

Халқ депутатлари туман Кенгаши депутати.