РУСЛАН ҚЎШАЕВ – ҚОРАҚАЛПОҒИСТОННИНГ ЭНГ ЁШ ОЛИЙ ТОИФАЛИ ЎҚИТУВЧИСИ БЎЛДИ

Таълим соҳасига жорий қилинаётган ислоҳотлар кўп сонли ўқитувчи-педагог кадрларнинг мавқеини оширишга, улар меҳнатига халқимизда ҳурмат уйғотишга хизмат қилибгина қолмай, иқтидорли, интилувчан ёш муаллимларнинг ўзлигини намоён этишларига ҳам имконият яратмоқда. Хусусан, Ўзбекистон Республикаси Вазирлар Маҳкамасининг 2019 йил 13 майдаги 392-сон қарорига илова тарзида қабул қилинган “Мактабгача, умумий ўрта, ўрта махсус, касб-ҳунар ва мактабдан ташқари давлат таълим муассасалари педагог кадрларини аттестациядан ўтказиш тартиби тўғрисида”ги Низомга мувофиқ ҳар беш йилда ўқитувчилар бир марта аттестациядан ўтказилади. Шунингдек, улар ўзларининг ёзма аризасига мувофиқ навбатдан ташқари ҳам аттестациядан ўтказилиши мумкин. Бунда педагог кадрларнинг ўқув фани бўйича малакаси, дарс ўтиш маҳорати, меҳнати самарадорлиги асосий ме-зон сифатида баҳоланади.

Соҳага янги қабул қилинган бу тартиб туманимиздаги 16-сонли мактабнинг география фани ўқитувчиси Руслан Қўшаевни ҳам ўз имкониятларини синовдан ўтказиб кўришга ундади.

У 2013 йилда Қорақалпоқ Давлат университетининг география факультетининг бакалавриат, 2015 йилда магистратура босқичларини муваффақиятли тугатиб, 16-сонли мактабда ўз педагогик фаолиятини бошлаган эди.

Шу давр мобайнида педагоглар оиласи вакили бўлган Руслан Қўшаев бутун ёшлик ғайрат-шижоатини ва маҳоратини ишга солиб, дарс машғулотларини ўқувчилари пухта ўзлаштиришларига интилди, дарсдан бўш вақтларини ҳам ўқувчиларининг билимини мустаҳкамлашга сарфлади. Натижалар ёмон бўлмади. 2015-2016 ўқув йилида ўқувчиси Тимур Ҳайитбоев Билимлар беллашувининг Республика босқичида, 2018-2019 ўқув йилида яна бир ўқувчиси Севара Болтабоева Қорақалпоғистон Республикаси босқичида қатнашишга муваффақ бўлди, саралаш, туман босқичида юқори балл тўплаб, кучли 10 таликка кирганлари ҳам бор.

Руслан 2017 йилдан бери ўз ўқув фанининг малакали мутахассиси сифатида туманимиздаги барча мактаблар география фани ўқитувчиларига тренер ўқитувчи бўлиб, география фанини ўқитишдаги маҳоратини, таълимдаги ислоҳотларни, янги интерфаол усулларда дарс ўтиш технологияларини ўргатиб келмоқда.

Шуларни инобатга олиб ва ўз билимига таянган ҳолда у 2018 йилда аттестациядан ўтишга қарор қилган, бу синовдан муваффақиятли ўтиб, 1-тоифали ўқитувчи мақомини олишга эришган эди.

Албатта, интилиш ва меҳнат, ўз устида тинимсиз ишлаб, билимларини ошира бориш беиз кетмайди. Руслан Қўшаев мактаб маъмурияти билан маслаҳатлашиб, яқинда ўз касби бўйича маҳорати ва билимни яна бир бор синаб кўрди. Навбатдан ташқари аттестацияда қатнашиб, 90 балл баҳо олишга эришди ва Қорақалпоғистоннинг энг ёш олий тоифали география фани муаллими бўлди.

Ҳар бир одамнинг ютуқлари – унинг ўз-ўзини тарбиялай олганида, эзгуликларга интилишида, меҳнатсеварлигида.

Руслан Қўшаевнинг эришаётган кўпчилик ибрат олишга арзигулик натижалари замирида унинг тинимсиз меҳнатлари мужассам.

Ойгул РАЖАБОВА.