RUSLAN QOʻShAYeV – QORAQALPOGʻISTONNING ENG YoSh OLIY TOIFALI OʻQITUVChISI BOʻLDI

Taʼlim sohasiga joriy qilinayotgan islohotlar koʻp sonli oʻqituvchi-pedagog kadrlarning mavqeini oshirishga, ular mehnatiga xalqimizda hurmat uygʻotishga xizmat qilibgina qolmay, iqtidorli, intiluvchan yosh muallimlarning oʻzligini namoyon etishlariga ham imkoniyat yaratmoqda. Xususan, Oʻzbekiston Respublikasi Vazirlar Mahkamasining 2019-yil 13-maydagi 392-son qaroriga ilova tarzida qabul qilingan “Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisida”gi Nizomga muvofiq har besh yilda oʻqituvchilar bir marta attestatsiyadan oʻtkaziladi. Shuningdek, ular oʻzlarining yozma arizasiga muvofiq navbatdan tashqari ham attestatsiyadan oʻtkazilishi mumkin. Bunda pedagog kadrlarning oʻquv fani boʻyicha malakasi, dars oʻtish mahorati, mehnati samaradorligi asosiy me-zon sifatida baholanadi.

Sohaga yangi qabul qilingan bu tartib tumanimizdagi 16-sonli maktabning geografiya fani oʻqituvchisi Ruslan Qoʻshayevni ham oʻz imkoniyatlarini sinovdan oʻtkazib koʻrishga undadi.

U 2013-yilda Qoraqalpoq Davlat universitetining geografiya fakultetining bakalavriat, 2015-yilda magistratura bosqichlarini muvaffaqiyatli tugatib, 16-sonli maktabda oʻz pedagogik faoliyatini boshlagan edi.

Shu davr mobaynida pedagoglar oilasi vakili boʻlgan Ruslan Qoʻshayev butun yoshlik gʻayrat-shijoatini va mahoratini ishga solib, dars mashgʻulotlarini oʻquvchilari puxta oʻzlashtirishlariga intildi, darsdan boʻsh vaqtlarini ham oʻquvchilarining bilimini mustahkamlashga sarfladi. Natijalar yomon boʻlmadi. 2015-2016 oʻquv yilida oʻquvchisi Timur Hayitboyev Bilimlar bellashuvining Respublika bosqichida, 2018-2019 oʻquv yilida yana bir oʻquvchisi Sevara Boltaboyeva Qoraqalpogʻiston Respublikasi bosqichida qatnashishga muvaffaq boʻldi, saralash, tuman bosqichida yuqori ball toʻplab, kuchli 10 talikka kirganlari ham bor.

Ruslan 2017-yildan beri oʻz oʻquv fanining malakali mutaxassisi sifatida tumanimizdagi barcha maktablar geografiya fani oʻqituvchilariga trener oʻqituvchi boʻlib, geografiya fanini oʻqitishdagi mahoratini, taʼlimdagi islohotlarni, yangi interfaol usullarda dars oʻtish texnologiyalarini oʻrgatib kelmoqda.

Shularni inobatga olib va oʻz bilimiga tayangan holda u 2018-yilda attestatsiyadan oʻtishga qaror qilgan, bu sinovdan muvaffaqiyatli oʻtib, 1-toifali oʻqituvchi maqomini olishga erishgan edi.

Albatta, intilish va mehnat, oʻz ustida tinimsiz ishlab, bilimlarini oshira borish beiz ketmaydi. Ruslan Qoʻshayev maktab maʼmuriyati bilan maslahatlashib, yaqinda oʻz kasbi boʻyicha mahorati va bilimni yana bir bor sinab koʻrdi. Navbatdan tashqari attestatsiyada qatnashib, 90 ball baho olishga erishdi va Qoraqalpogʻistonning eng yosh oliy toifali geografiya fani muallimi boʻldi.

Har bir odamning yutuqlari – uning oʻz-oʻzini tarbiyalay olganida, ezguliklarga intilishida, mehnatsevarligida.

Ruslan Qoʻshayevning erishayotgan koʻpchilik ibrat olishga arzigulik natijalari zamirida uning tinimsiz mehnatlari mujassam.

Oygul RAJABOVA.