Машаққатли касб фидойиси
Юртимизда инсон саломатлигини мустаҳкамлаш, айниқса, оналик ва болаликни муҳофаза қилиш, жисмонан соғлом ҳамда маънан баркамол авлодни вояга етказиш масаласига устувор вазифа сифатида эътибор қаратиб келинмоқда. Зеро, фақат соғлом халқ, соғлом миллатгина буюк ишларга қодир. Бугунги кунда буюк келажак эгалари бўлган соғлом ва баркамол авлодни вояга етказишга ўз ҳиссасини қўшаётган тиббиёт ходимлари фаолияти ҳам таҳсинга лойиқ.
Барчамизга маълумки, Президентимиз Қарори билан чекка ҳудудлардаги қишлоқ врачлик пунктлари қишлоқ оилавий поликлиникаларга айлантирилди. Туманимизнинг Қипчоқ шаҳарчасидаги 1-қишлоқ оилавий поликлиникаси бугунги кунда ўзининг самарали фаолиятини олиб бораётган тиббиёт масканларидан бири. 2017 йилда Қипчоқ, Маданият, Тўлқин қишлоқ врачлик пунктлари тугатилиб, 1-сонли қишлоқ оилавий поликлиникаси ташкил этилди. Бугунги кунда ушбу тиббиёт маскани Қипчоқ, Тўлқин, Чойкўл овуллари, Уйшин, Дарё бўйи, Бештом маҳаллалари ва Қипчоқ шаҳарчаси ҳудудларидаги жами 5500 хонадон - 30224 аҳолига хизмат кўрсатади. Поликлиникада умумий амалиёт шифокорлари сони 14 нафар бўлиб, болалар шифокори, жарроҳ, аёллар шифокори, тиш доктори, УЗИ мутахассиси, ички касалликлар шифокорлари ўз фаолиятларини олиб бормоқдалар. Тиббиёт масканида жами ҳамширалар сони 55 нафар бўлиб, шундан 35 нафари патронаж ҳамширалардир.
1-қишлоқ оилавий поликлиникасида 2017 йилдан буён ўзининг патронаж ҳамширалик фаолиятини олиб бораётган Раъно Тангирберганова ҳам ўз касбига масъулият билан ёндашадиган, жонкуяр ходимлардан бири.
Р.Тангирберганова 1991 йилда Қипчоқ врачлик пунктида ўзининг ҳамширалик фаолиятини бошлади ва бир неча йиллар давомида ушбу врачлик пунктида ишлади. Ўз фаолияти мобайнида соҳасидаги кўплаб кўрик-танловларда иштирок этиб, бир қанча ютуқларни қўлга киритди. Хусусан, “Йилнинг энг яхши ҳамшираси” кўрик-танловида қатнашиб, туман босқичида фахрли 1-ўринни эгаллади. Қисқа вақт оралиғида синчков ва изланувчан ҳамшира устоз шифокорлардан тиббиёт сирларини ва тажрибаларини ўрганишдан тўхтамади. Бу эса ўз навбатида юқори натижаларга эришиш имконини берди. Р.Тангирберганова 2004 йилда олий тоифали ҳамшира бўлди. Бундай ютуқлар, шубҳасиз, ўз касбига меҳр ва масъулият билан ёндашиш, ўз устида ишлаш, тинмай меҳнат қилиш натижасидир.
Чарос Арслонова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
