46-сонли мактабгача таълим ташкилотида “Байроғимиз – фахримиз” шиори остида байрам тадбири ўтказилди

Давлат рамзлари ҳар бир мамлакатнинг мустақиллигини ифодаловчи муқаддас белгидир. Республикамиз давлат рамзлари халқимизнинг шон- шарафи, тарихий хотираси ва интилишларини ўзида мужассам этиб, тинч ва осойишта, озод ва эркин ҳаётимиз, ёруғ келажагимизга бўлган ишончимиз ифодасидир.

Давлат рамзлари ҳамиша муқаддас ва улуғ саналади. Чунки у халқнинг ўтмиши, бугуни ва келажагини ўзида мужассам этган Ватаннинг ёрқин тимсолидир. Байроғимиз ўзида бутун Ўзбекистон халқининг асрий орзу-истаклари, ғайрати ва шижоатини, халқимизга хос меҳмондўстликни мужассам этган.

18 ноябрь куни давлатимиз суверенитетининг рамзларидан бири – мустақил Ўзбекистон Республикасининг “Давлат байроғи тўғрисида”ги қонуни қабул қилинганлигига 28 йил тўлди.

Ушбу сана байрам сифатида мамлакатимзда кенг нишонланди. Туманимиздаги барча таълим ва тарбия муассасаларида сана муносабати билан байрам тадбирлари ва йиғилишлар ўтказилди.

46-сонли мактабгача таълим ташкилотида ҳам ушбу байрам муносабати билан “Фидойинг бўлгаймиз сени, Ўзбекистон!” номли тадбир ўтказилди. 

Ташкилот раҳбари Севара Тожимуродова, ўрта гуруҳ тарбиячиси Назокат Аллаберганова ва катта гуруҳ тарбиячиси Назокат Эржановалар тайёрлаган ушбу тадбирда ташкилотнинг ўрта ва катта гуруҳ болалари иштирок этишди.  

Ҳозирги кунда ташкилотда жами 115 нафар болалар тарбияланмоқда. Булардан, 25 нафари катта, 25 нафари ўрта, 25 нафари кичик ва яна 40 нафари қисқа гуруҳ тарбияланувчиларидир.

“Фидойинг бўлгаймиз сени, Ўзбекистон!” номли тадбирда болалар байроғимиз ҳақида шеърлар айтдилар, унинг ҳар бир рангги, ой-у юлдузлари англатадиган маънолар ҳақида сўзлаб, давлатимиз рамзлари ҳақида олган билимларини намойиш қилдилар.

Ватанпарварликни акс эттирувчи саҳна кўринишлар намойиш этилди. Хусусан, Ватан тинчлиги ва озодлиги учун жон берган тарихий шахс –Широқ афсонаси асосида тайёрланган саҳна кўриниши барча болажонларнинг эътиборини тортди.

Тадбир давомида ташкилот тарбияланувчилари ўртасида кичик мусобақа ҳам ўтказилди. Унда иштирок этган болалар ўзларининг эпчил ва чаққонликларини кўрсатишди. Шундан сўнг болалар турли касбларнинг махсус кийимларини кийиб, касбларга таъриф бериб, уларга мос шеърлар айтишди.     

Рақс тўгараги ўқувчилари томонидан ижро этилган Ватанпарварликни тараннум этувчи куй-қўшиқлар барчага кўтаринки руҳ ҳамда юқори кайфият бахш этди.

Мустақил давлатимиз байроғи тинч ва осойишта, озод ҳамда эркин ҳаётимиз, ёруғ келажагимизга бўлган ишончимиз тимсолидир. Давлат рамзлари Ватанимизнинг муқаддаслигини, юрт манфаати ҳар нарсадан устунлигини англатади.

Байроғимизнинг баландлиги юртимизнинг обрў-нуфузи юксаклигидан далолатдир. Сарбаланд қаддимиз ва қадримиз тимсолини ҳамиша эъзозлайлик ва бошимиз узра баланд кўтарайлик!

Ирода Эрдошева, жамоатчи мухбир