Энг қадимий, асл миллий байрам
Она замин узра қуёшнинг заррин нурлари ўлкамизга ва қалбимизга илиқлик бахш этиб, юртимизга Наврўз ташриф буюрмоқда. Бу байрам барчамиз учун шарқона янги йил дебочаси, маънавиятимизнинг узвий қисмига айланиб кетган энг қадимий, асл миллий байрам сифатида азиз ва мўътабардир.
Бир неча минг йиллардан бери нишонланиб келинаётган ушбу байрамда меҳр-мурувват, ватанпарварлик, меҳнатсеварлик каби инсоний туйғулар, инсон ва табиат ўртасидаги уйғунлик, деҳқончилик мавсумининг бошланиши ўз ифодасини топган. Шунинг учун ҳам асрлар оша бу байрам боқий қадрият, миллий маросим сифатида яшаб келмоқда. Зеро, Президентимизнинг «Юксак маънавият — енгилмас куч» асарида қайд этилганидек, «Наврўз байрами биз учун ҳаёт абадийлиги, табиатнинг устувор қудрати ва чексиз саховатининг, кўп минг йиллик миллий қиёфамиз, олижаноб урф-одатларимизнинг бетакрор ифодасидир».
Халқимизнинг севимли байрамларидан бири бўлган Наврўз нафақат табиат, балки инсон қалбининг ҳам уйғониш, янгиланиш фаслидир. Шу сабабли «Ободлик кўнгилдан бошланади», деган ҳикматли ибора бугун халқимиз ҳаётининг, бунёдкорлик ва ободонлаштириш ишларининг муҳим мезонига айланди. Наврўз нафаси сезилиши билан жойларда ободонлаштириш ва кўкаламзорлаштириш, экин-тикин ишлари авжига чиқмоқда. Ҳовли, кўча ва хиёбонларни саранжом-саришта қилиш, кўчат ўтқазиш каби хайрли ишлар амалга оширилмоқда. Саноқли кунлардан кейин бободеҳқонларимиз яхши ниятлар билан ерга уруғ қадаб, эл ризқи мўл бўлишини тилаб, дуолар қилишади. Буларнинг бари минг йиллардан бери такрорланиб келаётган, халқимизнинг маънавиятига сингиб кетган азалий ва абадий удумлардир. Зеро, баҳор кириб, Наврўзи олам ташриф буюргач, табиат гуллашга ошиққани каби одамзот ҳам яшашга, яшнатишга интилади.
Яқиндагина халқимизнинг энг эзгу маънавий мероси – Наврўз билан боғлиқ меҳнат байрами – умумхалқ ҳашари ўтказилди. Фидойи ва меҳнаткаш халқимизни янада жипслаштириб, ўзаро дўстлик, биродарлик, миллатлараро тотувлик тамойилларига муносиб равишда меҳр-оқибат тимсолига айланган ушбу умумхалқ ҳашаридан сўнг нафақат кўнгиллар, балки ҳар бир қарич ер обод бўлди. Маҳалла гузарлари, кўча ва боғ-роғлар меҳнат байрами шавқидан яшнаб кетди. Наврўз байрамининг энг эъзозли удумларидан бири бўлган умумхалқ хайрия ҳашаридан тушадиган маблағ эса бутун мамлакатимизда, шу жумладан туманимизда истиқомат қилаётган кам таъминланган, эҳтиёжманд, боқувчисини йўқотган оилалар, ногиронлар учун моддий фаровонлик яратиш имконини беради. Бу – ўзаро меҳр-оқибатнинг, мурувватнинг тимсоли. Бу – халқнинг энг эзгу орзу-умидларини ўзида мужассам этган бетакрор мазмун, бетакрор моҳият!
Ҳаётимизни безаб турган Наврўз билан боғлиқ энг гўзал моҳият – ерга уруғ қадаш маросими! Наврўз кириши билан бундан неча минг йиллар аввал ҳам ота-боболаримиз "Қўш чиқариш”, "Қўш ҳайдаш”, "Уруғ сочиш” каби деҳқончилик иши билан боғлиқ маросимларни ўтказганлар. Эндиликда, замонлар ўтиши билан бу маросимлар чигит экиш, деҳқончилик фасли каби меҳнат байрамларига айланди. Бу маросимларнинг барчаси Наврўзи оламдан бошланувчи халқимизни ризқ-рўз, қут-барака томон элтувчи йўллардир.
Туманимизнинг ҳар бир овулида, маҳалласида, ҳар битта хонадонида аллақачон Наврўз тантаналари бошланиб кетди. Кўнгилларни қучган эзгу тилаклар билан ота ўз фарзандлари, фарзандлар эса ўзлари учун боғ яратмоққа киришдилар. Бу ажиб тадорик дилларимизга хушнудлик ва хотиржамлик бахш этади. Ҳар биримизнинг ўз боғимиз, ўз дарахтимиз, ўз гулзоримиз барқ уриб гуллайди. Бундай гулламоқ ҳаётимизга файз, турмушимизга ободлик бошлаб келади. Қутлуғ Аму заминини яшнатган боғлар эртанги кунга – келажакка ажиб тароват бахш этади.
Бу галги Наврўзни "Соғлом бола йили”да қарши оламиз. Бунда ҳам ўзгача маъно мужассам. Негаки, Наврўз "Янги кун” деган маънони билдирса, соғлом фарзандлар эртанги кунимиз эгалари, оиланинг бебаҳо бахти ва юртимиз келажагидир.
Азиз юртдошлар! Улуғ ва бебаҳо маънавий қадриятларимиз гултожи – Наврўзи олам барчангизга қутлуғ бўлсин! Ҳар бирингизнинг хонадонингизга Наврўзга монанд гўзалликлар, нафосат, бахтиёрлик ва шодлик ташриф буюрсин!
Наврўзи олам муборак, азизлар!
Ражаббой ЙЎЛДОШЕВ,
туман ҳокими.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
