Ишда ҳам, ҳаётда ҳам фаол

Ҳали янги йил байрами шодиёналари ниҳоясига етмай, Омонгул опа яна олам-олам табрикларга, қувончларга беланди. Қишки таътилни мароқли ўтказган ўқувчилари ўқув йилининг янги чораклиги – илк дарс куни:

- Табриклаймиз, устоз! – дея уни мактаб ҳовлисида кутиб олишди.

- Раҳмат, болаларим! – юзи қувончдан  яшнаб кетди опанинг.

Ўқувчилари даврасида синфга кирган Омонгул опа ўз фарзандларидай бўлиб қолган ўқувчилар билан бирма-бир сўрашиб чиққач, бугунги қувончининг сабабкори, 9-синф ўқувчиси Насиба Отамуродовани "Билимлар беллашуви”нинг туман босқичида ғолиб бўлганлиги билан табриклади.

- Насибанинг туманда фахрли 1-ўринни эгаллаб, республика босқичига йўлланма олгани ҳаммамизнинг ютуғимиз бўлди, - дейди у мамнуният билан.

- Шуни айтадилар-да, "ўқиган - ўзар”, деб.

Омонгул Адилбоева фаолият юритаётган 55-сонли мактабда Насиба сингари билимга чанқоқ ўқувчилар талайгина. 8-синф ўқувчиси Шаҳло Қозоқбоева математика фанидан юқори натижаларга эришган бўлса, Соҳиба Ражаббоева информатика фанидан "Билимлар беллашуви”нинг туман босқичида фахрли 1-ўринни эгаллаб, Қорақалпоғистон Республикаси босқичига йўлланма олдилар.

Омонгул опа фахрланиб гапирганича бор. Мактабда барча фанлар бўйича етук мутахассис фан ўқитувчилари дарсларни мароқли ўтадилар. Айниқса, информатика ва қорақалпоқ тили ва адабиёти, математика фанларига қизиқувчилар кўпчиликни ташкил қилади. Информатика фани ўқитувчиси Рустам Раҳматуллаевнинг ҳар бир дарси инновацион технологиялар асосида, қизиқарли савол-жавоблар, амалий ва назарий машғулотларнинг узвийлиги асосида олиб борилади.

Қорақалпоқ тили ва адабиёти фани дарсларини Омонгул опа Адилбоева алоҳида меҳр билан ўтаётгани боис, унинг ўқувчилари қорақалпоқ тилида бемалол гаплашадилар, қорақалпоқ ёзувчилари ижодига мансуб адабиётларни чуқур тушунадилар.

Омонгул опа оилада ҳам меҳрибон, пишиқ-пухта, тадбиркор она. Атиги 5 сотих томорқасида камида 10 хил мевали дарахтлар ўстирган. Дастурхони ўз боғида етиштирилган мева-чевалардан файзли. Ҳар йили опа баҳорда бозордан майда жўжалар сотиб олиб, парваришлайди. Жўжалар кузга бориб ҳар бири 1,5-2 кило тош босадиган даражада етилади. Қиш бўйи хонадонида тухум ва товуқ гўшти сероб бўлади. Ойлик маошдан ташқари томорқасидан унаётган гўшт, сут, тухум, мева-чева фарзандларининг витаминларга бой овқатлар тановул қилиб, соғлом ўсишини таъминлаётганидан Омонгул опа хурсанд.

Опа ўзи яшайдиган Ойбек номли маҳаллада жамоатчилик ва давлат идораларининг ҳамкорликдаги ишчи гуруҳи аъзоси сифатида ёш оилалар, турмуш қуришга тайёрланаётган ёшлар ўртасида маънавий-маърифий мавзуларда суҳбатлар ўтказиб туради. 55-сонли мактаб хотин-қизлар қўмитаси раиси сифатидаги фаолият кўлами янада кенг. Вояга етмаган қиз болалар билан соғлом турмуш тарзини қарор топтиришда ёшларнинг тутган ўрни, эрта турмуш қуришнинг зарари ҳақида тушунтириш ишлари олиб боради. Бу борада унга умр йўлдоши, тажрибали шифокор Рўзимбой Нуримбетов яқиндан ёрдам бериб, инсон саломатлигига оид рисолалар, суратли буклетлар билан таъминлаб туради.

- Инсон энг аввало соғлом бўлиши керак, - дейди опа. – Ҳар жиҳатдан соғлом одамнинг фикри соғлом ва теран бўлади.

Шу боис, Омонгул опа ўқувчиларининг ҳам маънавий, ҳам жисмоний жиҳатдан камол топиши учун эринмай изланади. Чунки ўқитувчилар теран фикрли, билимли, мулоҳазали бўлсалар таълимда муваффақиятга эришилади. Соғлом болани вояга етказиш деганда, энг аввало унинг маънавий ва жисмоний баркамоллиги назарда тутилади. Маънан ва жисмонан етук бола фанларни тез ўзлаштиради, дунёқараши кенг ва қобилиятли бўлади. Омонгул опа Адилбоева ўз ўқувчилари билан ишлашишда  таълим ва тарбиянинг ана шундай узвийлигига алоҳида эътибор берадиган, ишлаб чарчамайдиган муаллима.

Зуҳра АҲМЕДОВА,

55-сонли мактаб кутубхонаси мудираси.