Суд раислари иштирокида ўтказилган семинарда мурожаатлар бўйича қонун ҳужжатлари мазмун-моҳияти кенг тушунтирилди

Кейинги йилларда мамлакатимизда инсонларни қийнаётган муаммоларини ўрганиш, халқ учун фаровон, тинч ҳаёт тарзини яратишга катта эътибор қаратилмоқда. Инсонларнинг ҳуқуқ ва эркинликлари ҳимояси қонун ҳужжатлари билан тобора мустаҳкамланиб борилмоқда.

Хусусан, фуқаролар мурожаатларини ўрганиб чиқиш ва унда кўтарилган муаммоларни ечимини топиш борасида қонунчилигимиз етарли даражада ишлаб чиқилган. Президент фармонлари, қарорларидан ташқари «Жисмоний ва юридик шахслар мурожаатлари тўғрисида»ги Ўзбекистон Республикаси Қонуни, шунингдек, «Прокуратура тўғрисида»ги Қонунининг 7-моддасида «Фуқароларнинг ариза ва шикоятларини ҳамда юридик шахсларнинг мурожаатларини кўриб чиқиш» тартиби белгилаб қўйилган.

Ушбу қонун ҳужжатларининг мазмун-моҳиятини аҳолига кенг тарғиб қилиш мақсадида ҳуқуқни муҳофаза қилувчи органлар жойларда семинарлар, йиғилишлар ва бошқа тарғибот тадбирларини ташкил қилишмоқда. Шундай тадбирлардан бири туманимиздаги 82-мактабнинг фаоллар залида бўлиб ўтди.

Семинарни 82-сонли мактаб директори Зафар Ақманов очди ҳамда олиб борди. Ўзбекистон Республикасининг “Жисмоний ва юридик шахсларнинг мурожаатлари тўғрисида”ги Қонунининг мазмун-моҳиятини ўқувчиларга тушунтириш, улар билан очиқ мулоқот қилиш мақсадида ташкил қилинган семинарда туман Иқтисодий суди раиси Ўткир Собиров, Жиноий ишлар бўйича суд раиси Султонмурод Давлетмуродов, Маъмурий ишлар бўйича суд раиси Мунаввар Каримбоева, Фуқаролик ишлар бўйича суд раиси Эркин Утениязовлар қатнашишди. Семинар очиқ мулоқот тарзида ўтказилди.

Ўткир Собиров дастлаб ўз нутқида “Жисмоний ва юридик шахсларнинг мурожаатлари тўғрисида”ги Қонунининг мазмун-моҳияти ҳақида тўхталиб, ҳуқуқбузарликлар профилактикаси, жиноятчиликка қарши курашишда жамоатчиликнинг ўрни муҳим аҳамиятга эга эканини, ҳуқуқий маданиятни ошириш учун, аввало, ҳар бир киши ўз ҳақ-ҳуқуқини билиши лозимлигини таъкидлади. Бу борада судларнинг ўрни ҳақида гапириб, суд органлари томонидан мунтазам равишда тегишли ҳуқуқий маслаҳатлар ҳам бериб борилишини айтиб ўтди.

Шунингдек, “Жисмоний ва юридик шахсларнинг муражаатлари тўғрисида”ги Ўзбекистон Республикаси Қонунининг 5-моддасида мурожаатларнинг шакллари ва турлари белгиланганлиги, унга мувофиқ, мурожаатлар оғзаки, ёзма, ёки электрон шаклда бўлишини тушунтирди. Аризалар, таклифлар ва шикоятлар мурожаатларнинг турлари ҳисобланишини, мурожаатлар, уларнинг шакли ва туридан қатъий назар, бир хил аҳамиятга эгалиги ҳақида батафсил тушунчалар берди.
Шундан кейин ўқувчиларнинг мавзуга алоқадор фикр-мулоҳазалари тингланди. Ўқувчилар ўзларини қизиқтирган саволларга жавоблар олдилар. Хусусан, ўқувчилар туман Иқтисодий судининг фаолияти билан қизиқдилар. Суд раиси таъкидлаганидек, туман Иқтисодий суди томонидан фуқароларнинг ҳуқуқий онгини, маданиятини ошириш, уларни қийнаётган масалалар бўйича атрофлича тушунтиришлар бериш мақсадида алоҳида режалар тасдиқланган.

Алоҳида режаларга мувофиқ, 2019 йил давомида жами 49 та тарғибот ишлари амалга оширилди. Шундан 15 тасини сайёр қабуллар ва учрашувлар ташкил этган бўлса, 7 та давра суҳбатлари ҳамда “Менинг маҳаллам-менинг судьям” дастури бўйича аҳоли билан 27 та учрашувлар ўтказилди.

Семинарда тумандаги Иқтисодий, Жиноий, Маъмурий ва Фуқаролик судлари томонидан одил судловни амалга ошириш, судни “Адолат қўрғони”га айлантириш, халқ билан тўғридан-тўғри юзма-юз очиқ суҳбатлар кўлами янада кенгайтирилгани айтилди. Шу қаторда фуқароларнинг муаммоларини ҳал қилишда яқиндан ёрдам бериш орқали бузилган ҳуқуқларини тиклаш бўйича тегишли чора-тадбирлар белгилаб олиниб, бу борадаги ишлар мазкур йилда ҳам давом эттирилаётгани таъкидланди.

Чарос Арслонова, туман ҳокимлигининг Ахборот хизмати.