Карантин давридаги чеклов ва кучайтирилган тартиб-қоидаларни бузиш билан боғлиқ ҳуқуқбузарликларга чек қўйилмоқда
Бутун дунё бўйлаб кенг тарқалган коронавирус пандемияси даврида бор куч ва имкониятлар ушбу инфекцияга қарши курашиш, инсонлар саломатлигини муҳофаза қилиш, ҳаётини асрашга қаратилмоқда. Тобора жиддий тус олаётган ҳозирги вазиятда дунёда ва мамлакатимизда коронавирус инфекцияси кенг тарқалишининг олини олишга қаратилган кескин чоралар кўриб борилмоқда.
Вазиятнинг қанчалик жиддий ва таҳликали эканини ҳис қилмаслик, аввало ўзини, яқинларини, қолаверса, бошқаларнинг саломатлигини хатарга қўйиш ҳам бугунги қалтис кунда энг катта жиноятдир. Шу боис юртимизнинг барча ҳудудларидаги каби туманимизда ҳам санитария-эпидемиологик осойишталикни таъминлаш, эпидемияга қарши курашиш ва карантин қоидаларига риоя этилиши устидан Ички ишлар бўлими, Йўл-патруль хизмати, Миллий гвардия, Фавқулодда вазиятлар бўлими ва Санитария-эпидемиология осойишталик маркази ходимлари томонидан қатъий назорат ўрнатилган.
Айтиш жоизки, карантин бошланганидан буён туманимиз ҳудудида ўтказилаётган рейдлар, назорат тадбирлари давомида масъулликни ҳис қилмаётган, белгиланган чекловларга эътиборсиз қараётган ва мақсадсиз кўчада юрган фуқаролар учраётгани жуда ачинарли. Карантин қоидаларини бузиб, ўз яқинлари ҳаётини хатарга қўяётган бундай шахсларга нисбатан ҳуқуқни муҳофаза қилувчи органлар томонидан белгиланган тартибда маъмурий чоралар қўлланилмоқда.
Туман Ички ишлар бўлими ходимлари томонидан карантин бошланганидан буён кўчада тиббий ниқобсиз юрган 96 нафар шахсга энг кам иш ҳақининг 1 баравари миқдорида жарима солинди. Белгиланган карантин қоидаларига амал қилмасдан йўлда ўз автомобилида махсус рухсатномасиз ҳаракатланаётган 33 нафар ҳайдовчи аниқланди. Ушбу ҳайдовчиларга маъмурий жазо тайинланиб, автомашиналари вақтинча сақлаш учун жарима майдончаларига жойлаштирилди. Кўчада мақсадсиз велосипедда ҳаракатланиб кетаётган 202 нафар фуқаронинг велосипедлари олиб қўйилди. Шунингдек, йўлларда мақсадсиз юрган 87 нафар фуқароларга карантин қоидалари тушунтирилди.
7 апрель куни туманимизда ўтказилган рейд тадбирида ҳам ўрнатилган чеклов ва кучайтирилган тартиб-қоидаларни бузиш билан боғлиқ қатор ҳуқуқбузарлик ҳолатлари аниқланди. Рейд жараёнида 3 нафар фуқаро Маъмурий жавобгарлик тўғрисидаги Кодекснинг 131-моддаси талабларини бузиб маст ҳолда, 3 нафар фуқаро ҳужжатсиз, 1 нафар фуқаро Маъмурий жавобгарлик тўғрисидаги Кодекснинг 126-моддаси 1-қисмига зид равишда автомобиль бошқариб келаётгани маълум бўлди. Шунингдек, назорат давомида йўл ҳаракати қоидаларининг бошқа бандларини бузган кўплаб авторанспорт ҳайдовчилари ва пиёда фуқаролар аниқланди. Ушбу ҳолатлар бўйича ҳуқуқбузарларга нисбатан маъмурий баённомалар тузилиб, расмийлаштирилди.
Кўрилаётган чоралардан кўзланаётган асосий мақсад фуқароларимизни карантин даврида тартибга чақириб, коронавирус касаллиги тарқалиб кетишининг олдини олишдир. Фуқароларимизга имкон қадар уйда қолишлари кераклиги, кўчаларда бемақсад ва ниқобсиз юришлари мумкин эмаслиги такрор-такрор тушунтирилса-да, ҳуқуқбузарлик ҳолатлари ҳали-ҳамон содир этилмоқда. Дунё бўйлаб карантин чоралари туфайли коронавирусдан ўлим даражаси камаймоқда. Бу офатга қарши даво топилмаётган ҳозирги пайтда инфекция тарқалишининг олдини олишда бирдан-бир самарали восита бу карантиндир. Шу сабабли юртдошларимиздан карантин қоидаларига қатъий риоя қилишларини сўраб қоламиз.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
