ЛИЦЕНЗИЯСИЗ ИШ, КЕЛТИPДИ ТАШВИШ

Одамнинг оласи ичида, деган иборани ҳаётда кўп ишлатамиз. Кўзимизга бинойидай бўлиб кўринган инсоннинг гоҳ нафсига эргашиб, гоҳ лоқайдлик билан ажабтовур ишларга аралашиб қолганига гувоҳ бўлганимизда юқоридаги иборани беихтиёр такрорлаймиз.

Хоразм вилоятида яшовчи Маъмуржон (исм-шарифи ўзгартирилди) Отауллаев ҳам кўпчиликнинг назарида бинойидеккина йигит эди. Ўзига тегишли юк машинасида турли ишларни бажариб, оиласини моддий таъминлаб юрган эди.

Нима бўлди-ю, Жумур тоғи ҳудудидаги тош ишлаб чиқариш заводларидан Хоразмга тош олиб бориб сотишга аҳд қилди. “Кимнинг қандай юмуши бор?” деб мижоз излаб юрмайди. Тўғри тоғ каръерига боради-ю, тошни юклаб қайтаверади. Ким кўп, “иморат қураман”, деб юрганлар кўп, атрофда. Аммо Маъмуржон режа қилишга қилди-ю тоғ каръеридан тош ташиш учун рухсатнома (лицензия) олиши зарурлигини инобатга олмади.

Бунинг оқибатида у Транспорт Вазирлиги масъул ходимлари томонидан тўхтатилиб, Ўзбекистон Pеспубликаси МЖтКнинг тегишли моддаларида кўрсатилган ҳуқуқбузарликни содир этганлиги маълум бўлди. Унинг қаршисига очилган маъмурий иш ҳужжатлари Маъмурий ишлар бўйича туман судида кўриб чиқилиб, Ўзбекистон Pеспубликаси МЖтКнинг тегишли моддаларига асосан ҳуқуқбузарлик аниқланган пайтдан эътиборан 30 (ўттиз) кунлик муддатда йўл қўйилган ҳуқуқбузилишларни ихтиёрий равишда бартараф этгани ва етказилган моддий зарарнинг ўрнини қоплагани учун маъмурий жавобгарликдан озод этилди.

Ўз қилмишининг давлатга ва жамиятга катта зарар келтиришини англаб етган Маъмуржон Отауллаев ўз автомобилида юк ташиш хизматини бажариш учун кечикиб бўлса-да, махсус рухсатнома (лицензия) олди ва лицензиясиз фаолият юритгани оқибатида давлатга етказилган зарарни ўз муддатида тўла қоплади. Афсуски, унгача анча асаби бузилди, саргардон бўлди, оиласи ризқини “қийиб”, етказилган зарарни тўлади. Анчагина чиқимдор бўлган бу фуқаро ўз ҳуқуқини билмаслик қандай оқибатларга олиб келишини тушуниб етди.

М.Каримбоева,
 Маъмурий ишлар бўйича туман суди раиси.