“ЕРМУЛККАДАСТР” АМУДАРЁ ТУМАН ФИЛИАЛИ АҲОЛИГА СИФАТЛИ ХИЗМАТ КЎРСАТМОҚДА

Кўчмас мулк соҳасидаги давлат хизматлари кўрсатиш тизимини янада такомиллаштириш, уларнинг тезкорлиги ва фойдаланиш имкониятларини ошириш, давлат органлари фаолиятининг шаффофлигига эришиш ва хизматлардан фойдаланувчиларга ахборот хизмати кўрсатишни яхшилаш энг устувор вазифалардан саналади.

Сўнгги йилларда қабул қилинган Ўзбекистон Республикаси Президентининг “Кўчмас мулкка бўлган ҳуқуқларни давлат рўйхатидан ўтказиш тизимини янада такомиллаштириш чора-тадбирлари тўғрисида”ги қарори ҳамда Ўзбекистон Республикаси Вазирлар Маҳкамасининг «Кўчмас мулк объекти кадастр паспортининг янги намунасини босқичма-босқич жорий этиш чора-тадбирлари тўғрисида»ги қарори соҳадаги ишларни янада ривожлантириш борасида муҳим дастуруламал бўлиб хизмат қилмоқда.

“Ермулккадастр” Aмударё туман филиали соҳада олиб борилаётган ислоҳотлар ижросини таъминлаш, ер ҳисоби ва давлат кадастрларини тўлиқ шакллантириш, кўчмас мулк объектларига бўлган ҳуқуқларни давлат рўйхатидан ўтказиш, аҳолига сифатли хизмат кўрсатиш юзасидан самарали фаолият юритиб келмоқда.

Кўп йиллардан буён соҳа тараққиётига хизмат қилиб келаётган филиалда бугунги кунда жами 27 нафар ходимлар иш олиб бормоқда. Филиал бошлиғи Шокиржон Давлатов раҳбарлигидаги жамоа аъзоларининг ҳар бири ўз мутахассислиги бўйича тегишли вазифаларга бириктирилган. Хусусан, бўлимда турар жой бўйича 12 нафар техник мутахассислар, нотурар жой бўйича 2 нафар мутахассислар, геодезия соҳасида 4 нафар, мурожаатлар билан ишлаш бўйича 2 нафар мутахассислар, шунингдек, бош муҳандис, техник оператор, рўйхатга олувчи каби мутахассислар хизмат кўрсатиб келмоқда.

Корхонага жорий йилнинг шу даврига қадар давлат рўйхатидан ўтказиш учун 3193 та аризалар келиб тушган бўлиб, шундан 3054 таси қаноатлантирилган, 52 таси рад этилган ҳамда 73 тасининг тўлов қилиниши кутилмоқда. Шунингдек, кадастр паспорти учун келган аризалар сони 3761 та бўлиб, шундан 3602 таси қаноатлантирилган, 1080 тасининг тўлови кутилмоқда. 2 сентябрь ҳолатига кўра жами 36331 та турар жойлар ҳамда 2746 та нотурар жойлар хатловдан ўтказилган.

Жорий йилнинг сентябрь ойидан бошлаб, мазкур филиал замонавий кўринишга эга бўлган янги бинода ўз ишини давом эттирмоқда. Янги бинода ходимлар учун зарурий бўлган барча қулайликлар яратилган. Хоналар компьютер ҳамда керакли жиҳозлар билан таъминланган.

Корхона ходимлари аҳоли орасида тушунтириш-тарғибот ишларини ҳам олиб бормоқдалар. Жумладан, улар ўзларига тегишли бўлган якка тартибдаги ҳовли ва турар-жойлари ён атрофида янги иморатларни қурмасликка, ўзбошимчалик ва ноқонуний эгалланган ер майдонлари, яъни қишлоқ хўжалигида фойдаланиладиган сувли ер майдонлар, фермер ва деҳқон хўжалигига тааллуқли бўлган ерлар, юқори кучланишли коммуникация тармоқларининг муҳофаза майдонларига кирадиган ерлар ҳамда якка тартибда уй-жой қуришга мўлжалланмаган ер майдонларида бино ва иншоотларни қурмасликка чақирилмоқда.

Бугунги кунда ушбу соҳага ахборот-коммуникация технологияларини фаол жорий этиш, тегишли тизимларни давлат органларининг электрон маълумотлар базаларига интеграция қилиш кўчмас мулкка бўлган ҳуқуқларни давлат рўйхатидан ўтказиш жараёнини соддалаштиришнинг асосий устувор йўналишлари саналади. Шу боис соҳани янада ривожлантириш мақсадида филиалда ҳам рақамли технологияларни жорий этиш масалаларига алоҳида урғу берилмоқда.

Чарос Aрслонова, туман ҳокимлигининг Aхборот хизмати раҳбари.