ХАЛҚ ДАРДИНИ ЎЙЛАБ БЕЛГИЛАНГАН 10 ТА УСТУВОР ЙЎНАЛИШ ЮРТМИЗНИНГ ЯНАДА ФАРОВОНЛАШИШИГА АСОС БЎЛАДИ

Қорақалпоғистон. Бепоён кенгликлари, чўл-у қирлари, яшил водийлари, қамиш ва еканлар ўсиб ётган шўрхок кўллари ва... айни замонда бу юрт халқининг дил дардига айланган Оролқум... Бу – биз севган, ардоқлаган замин – Она Юрт! Унинг бағри кенг, фидойи, чеҳраси ҳамиша очиқ, меҳмондўст, меҳнаткаш халқи ҳар биримиз учун азиз. Қорақалпоғистоннинг эртанги куни, келажаги учун масъуллик туйғуси ҳам ана шу азизлик билан туташ.
Жорий йилнинг 2 октябрь санасида Қорақалпоғистон Республикаси Жўқорғи Кенгесининг навбатдан ташқари саккизинчи сессияси йиғилишини телевидение орқали кузатарканман, Қорақалпоқ халқининг дард-у ғамига елка тутмоққа қодир ватанпарварларгина бу юртни янада юксалтиришларига амин бўлдим. Минг шукурки, бу заминда эл-у юртини азиз билиб бошида тутгувчи, шу халқ келажаги учун масъуллик туйғуси билан яшагувчи, элим, юртим, деган фидойи халқ фарзандлари бисёр.
Одиллик ва шаффофлик асосида бўлиб ўтган сессия йиғилишида депутатлар ва жамоатчилик вакиллари Қорақалпоғистоннинг янги раҳбарини якдиллик билан сайладилар.
Сессияда сўзга чиққан Президентимиз Қорақалпоқ халқининг буюк шоири Бердақнинг:
Халқнинг ғамини ўйлаган,
Юрт ғамхўри керак менга, - деган сатрларини келтираркан, ҳозирги мураккаб шароитда раҳбар бўлиш осон эмаслигини, Қорақалпоғистонни ривожлантириш бўйича бошланган ишларни 2-3 марта кўпайтириб давом эттирилишини таъкидлади. Жўқорғи  Кенгеснинг янги сайланган раиси Мурат Камаловнинг бу каби кенг қамровли ишларни собитқадамлик билан адо этишига катта ишонч билдирди.
Ишонч – катта имкониятлар томон йўл, ишонч – инсон илми, ақл-заковатини чархлаб, эзгуликлар сари йўллагувчи куч!
Президент Қорақалпоғистонда охирги 4 йил ичида амалга оширилган ишлар, барча соҳалар бўйича ўсиш ва ривожланиш суръатларига тўхталаркан, янги раҳбар фаолиятининг энг муҳим йўналиши “Халқнинг дардини эшитиш ва масалаларини ҳал этиш” бўлиши кераклигини таъкидлади. Шу билан бирга ҳудудда барча соҳаларни жадал ривожлантириш бўйича келгуси 3 йилга мўлжалланган чора-тадбирлар ишлаб чиқилганини маълум қилди. Унга кўра, ҳар бир туманда 2 тадан фаолият тури “ўсиш нуқтаси” этиб белгиланди. Республика туманларини янада равнақ топтириш мақсадида мазкур “ўсиш нуқталари” бўйича тадбиркорлик субъектлари 3 йил муддатга ер солиғи, мол-мулк солиғи, кичик корхоналарнинг айланмасидан олинадиган солиқ, якка тартибдаги тадбиркорларнинг қатъий миқдордаги даромад солиғидан озод қилинишини таъкидлади.
Ҳар бир туман ва шаҳарни жадал ривожлантиришга кучли туртки бериш, муаммоларни тезкор ҳал этиш учун уларга вазирлар ва банклар бириктирилиб, келгуси 3 йилга мўлжалланган ўнта устувор йўналиш белгилаб берилди. Қорақалпоғистонда жуда қисқа фурсат ичида:
- туманлар ва маҳаллаларни жадал ривожлантириш;
- аҳоли бандлигини таъминлаш ва камбағалликни қисқартириш;
- инвестиция лойиҳаларини амалга ошириш;
- Орол муаммосининг салбий таъсирини юмшатиш;
- хизмат кўрсатиш соҳаси салоҳиятини тўлиқ ишга солиш;
- аграр соҳани ривожлантириш;
- аҳолини уй-жой билан таъминлаш;
- ижтимоий инфратузилмани ривожлантириш;
- аёлларни қўллаб-қувватлаш;
- жиноятчиликнинг олдини олишга алоҳида эътибор қаратиш кўзда тутилмоқда.
Мазкур 10 та устувор йўналиш бўйича белгиланган вазифаларни 3 йил ичида тўлиқ амалга оширишни таъминлаш, шу асосда Амударё туманини ҳам жадал ривожлантиришга кучли туртки бериш учун Олий Мажлис Қонунчилик палатаси спикери ўринбосари ЎзЛиДеП фракцияси раҳбари, Актам Ҳаитов ва “Агробанк” АТБ Бошқаруви масъул қилиб бириктирилди.
Президентимизнинг мазкур кўрсатмалари, йўл-йўриқ ва тавсиялари Қорақалпоғистондаги барча туманлар қатори амударёликлар учун ҳам янги имкониятлар сари очилган ойдин йўлдир. Чунки, тадбиркорлик субъектларининг юқорида белгилаб қўйилган “ўсиш нуқталари” бўйича 3 йиллик солиқлардан, якка тадбиркорларнинг қатъий миқдордаги даромад солиғидан озод этилишининг ўзи халқимизга давлатимиз томонидан кўрсатилаётган катта ғамхўрликдир.
Президентимиз деярли ҳар бир учрашув ва мамлакат миқёсидаги йиғилишларда аёл-қизларни қўллаб-қувватлаш масаласига алоҳида тўхталиб ўтадилар.
Юқорида белгиланган 10 та устувор йўналишнинг бири ёшлар ва аёлларни қўллаб-қувватлашга қаратилгани янада қувонарли. Чунки, оилада аёл тинч, хотиржам ҳаётдан кўнгли тўқ бўлса, ёшлар касб-корли, илмли бўлса, жамият янада фаровонлашиб бораверади. Муаммолар ўз-ўзидан камаяди. Ёшлар ва аёлларга эътибор нечоғлик юқори бўлса, оилалар ҳам барқарор, авлодлар баркамол бўлади.
Агар эътибор берилса, белгиланган ҳар бир йўналиш бири-бири билан узвий боғлиқликда белгиланган. Унга кўра, туманлар ва маҳаллалар жадал ривожланса, аҳоли бандлигини таъминлаш учун кўпдан-кўп имкониятлар яратилади. Иш билан банд аҳоли даромад топади, бу билан камбағалликни қисқартириш сари қадам қўйилади. Ўз даромад манбаига эга бўлган аҳолининг уй-жой билан таъминланиши эса инфратузилманинг ривожланишига етарли туртки бўлади.
Хуллас, 10 та устувор йўналишнинг амалий ижросини таъминлаш Қорақалпоғистоннинг, шу жумладан, туманимизнинг қиёфасини ҳам тубдан ўзгартириб юбориши табиий.
- Тошкентда нима янгилик бўлса, Нукусга келиши керак, - дедилар Президентимиз. – Янгича ишламасак, замон қабул қилмайди.
Дарвоқе, янгича ишлаш, янгича  фикрлаш орқали биз ўзимиз учун азиз бўлган она Юртимизни янада гўзал, обод ва фаровон қилишга қодир фидойи, ўзаро аҳил ва жипс халқ эканлигимизни амалда намоён қиламиз. Шунинг учун ҳам Президентимиз Қорақалпоғистонни янада ривожлантиришда, ҳар бир тумандаги кўчаларни, маҳаллаларни замонавий шаклга келтириш ва одамларга қулайлик яратиш лозимлигини, бу ишларни амалга оширишда чин ватанпарвар, мард ва матонатли, жасоратли эл оғаларига катта ишонч билдирди. Биз севган она Юрт – Қорақалпоқ заминида ана шундай мард ва матонатли, жасоратли инсонлар яшаб меҳнат қиладилар ва улар бу Ватанда бетакрор ўзгаришлар яратишга қодирлар.

Робия ЙЎЛДОШЕВА.