КУЗГИ БУҒДОЙ СИФАТЛИ ПАРВАРИШ ҚИЛИНМОҚДА
Мамлакатимизда бошоқли дон экинлари ҳосилдорлигини оширишда агротехнологиянинг илғор усулларини қўллаш билан бир қаторда ғалла етиштирувчиларни рағбатлантириш борасида амалга оширилаётган чора-тадбирлар туфайли дон маҳсулотлари етиштириш ҳажми йил сайин оширилишига эришилмоқда. Бунда ерларнинг экишга сифатли тайёрланиши, уруғликнинг белгиланган муддатларда экилиши, минерал ўғитларнинг меъёрида сарфланиши ҳам муҳим омил бўлмоқда.
Қаратилаётган эътибор, ғалла экилган майдонларда юқори ҳосил етиштирган фермер хўжаликларига давлат хариди учун етказиб берилган дон харид нархига 25 фоизгача устама нарх қўлланилаётганлиги туфайли ғаллачилик юқори даромадли соҳага айланмоқда. Натижада туманимиз фермер хўжаликлари ижарачилари ҳам бошоқли дон экинларидан юқори ҳосил етиштиришга интилмоқдалар.
Ўрта қалъа овулидаги кўптармоқли Гулмурод Бобониёзов раҳбарлик қилаётган “Ергулобод” фермер хўжалигининг пахтачилик, балиқчилик, чорвачиликдан ташқари 13 гектар ғалла майдони ҳам мавжуд. Ҳозир ушбу майдонларга экилган буғдой уруғлари бир текис униб чиқиб, яшил гилам тусига кирган. Экиш баробарида ҳар гектар ҳисобига 200 килограммдан фосфор минерал ўғити берилганлиги туфайли буғдой ниҳоллари яхши ривожланаяпти.
2020 йил ҳосили учун экилган 12 гектар ғалла майдонидан ўтган мавсумда давлат хариди учун 36 тонна “қирмизи” дон топширилган, жами ҳосилдорлик 45 центнердан ошишига эришилган эди. Ғаллачиликдан келган даромад туфайли хўжалик ишчиларининг ҳам, хўжаликнинг ҳам иқтисоди юксалди.
Туманимизда халқимизнинг ризқ-рўзи бўлган ғалла етиштиришга масъулият билан ёндошиб, экин майдонларидан самарали фойдаланаётган фермер хўжаликлари кўп. Қиличбой овулида фаолият юритаётган Отахон Қурбониёзов раҳбарлигидаги “Амирхон” фермер хўжалиги шуларнинг бири ҳисобланади. Ўтган йили ғаллачиликдан мўл даромад олинган ушбу хўжаликда жорий йилда 118 гектар пахта майдонидан пахта топшириш йиллик контрактация шартномаси ортиғи билан адо этилди. Туманда биринчилар қаторида пахта топшириш йиллик режасини бажарган азаматлар 11 гектар ерга 2021 йил ҳосили учун ғалла экиб, текис ниҳол олишга ҳам эришдилар. Ҳозир ушбу майдонларда буғдой майсалари ям-яшил бўлиб, кўзни қувонтириб турибди.
Эътиборли жиҳати, Ўзбекистон Республикаси Президентининг 2020 йил 6 мартдаги “Ғалла етиштириш, харид қилиш ва сотишга бозор тамойилларини кенг жорий этиш чора-тадбирлари тўғрисида”ги Қарорига мувофиқ шу йилдан бошлаб, давлат буюртмаси асосида бошоқли дон етиштириш амалиётининг босқичма-босқич бекор қилинаётганлиги, ғалла харид қилиш ва сотишда бозор тамойилларини кенг жорий этиш назарда тутилаётганлиги, деҳқонларнинг меҳнат унумдорлигини ошириш ва манфаатдорлигини таъминлашга эътибор қаратилаётганлиги ғаллачиликни даромадли соҳага айлантиришга асос бўлаётир.
Натижада – ҳозирги кунда туманимизнинг барча фермер хўжаликларида ҳам ғалла экилган майдонларда текис ниҳол олишга эришилиб, парваришлаш агротехника қоидалари асосида олиб борилаяпти. Амалга оширилаётган бу каби самарали чора-тадбирлар 2021 йилда ғалла майдонлари ҳосилдорлиги юқори бўлишига замин яратади.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
