АҲОЛИ ТИББИЙ КЎРИКДАН ЎТКАЗИЛМОҚДА

Маълумки, азал-азалдан инсоннинг  саломатлиги Аллоҳ берган энг улуғ неъмат сифатида бебаҳо бойликка тенглаштирилади. Бу бежизга эмас. Чунки инсон ҳаётига зийнат бағишлагувчи гўзал турмуш тарзининг шаклланиши, баркамол авлодларнинг вояга етиши, оилалардаги хотиржамлик муҳити – жамики ҳаёт гўзалликлари бевосита инсон саломатлигига боғлиқдир. Шу боис, туманимизнинг Куюк кўпир овули ҳудудида жойлашган 5-сонли қишлоқ оилавий поликлиникаси ходимлари мазкур ҳудуд аҳолиси саломатлигини муҳофаза этиш, айниқса, она ва боланинг репродуктив соғлигини таъминлаш, ҳар бир оилага кириб бориб, соғлом турмуш тарзини қарор топтириш бўйича тез-тез жонли мулоқотлар, аёллар, кексалар ва ёшлар саломатлиги юзасидан саломатлик мавзусида суҳбатлар ташкил этиб, мунтазам равишда аҳолини тиббий  кўрикдан ўтказиш тадбирларини амалга оширишади.

Бу борада мамлакатимизда тиббиёт соҳасини жаҳон андозалари даражасига мутаносиб  равишда ривожлантиришга қаратилаётган эътибор, 2020  йилнинг 10 ноябрь санасида қабул қилинган “Аҳолининг соғлом овқатланишини таъминлаш бўйича қўшимча чора-тадбирлар тўғрисида”ги ва 12 ноябрдаги “Тиббий профилактика ишлари самарадорлигини янада ошириш орқали жамоат саломатлигини таъминлашга оид қўшимча чора-тадбирлар тўғрисида”ги Президент Қарорлари ҳамда Фармонлари дастуриламал бўлиб хизмат қилмоқда.

Пандемия шароитида аҳолининг саломатлигини қатъий назорат қилиш, тиббий кўрикдан ўтказиш ишларига алоҳида аҳамият қаратилмоқда.

Жорий йилнинг 16 ноябрь санасида оилавий поликлиника шифокорлари томонидан кенгайтирилган тартибда ҳудуд аҳолиси тиббий кўрикдан ўтказилди. Кардиолог, ички касалликлар, онкологик касалликлар, жарроҳ, окулист, травматолог, эндокринолог, педиатр, ЛОР, невропатолог, акушер-гинеколог ва уролог шифокорлар иштирокида ўтказилган тиббий  кўрик жараёнида касаллиги аниқланган беморларга зарур тавсиялар ҳамда амбулатор ва стационар шароитларда даволанишлари учун зарур маслаҳатлар берилди.

Тиббий кўрикдан ўтган жами 318 нафар кишидан 246 нафарида турли тоифадаги касаллик ҳолатлари аниқланди. Шундан 57 нафарида бирламчи касалликлар аниқланиб, уларга зарур тавсиялар берилди. Ўтказилган тиббий кўрик жараёнида аввалдан турли тоифадаги касалликлар билан оғриган  235 нафар киши соғломлаштирилди. 217 нафар бемор амбулатор, 12 нафари эса стационар шароитларда ўз саломатликларини тикладилар.

Шуниси эътиборга моликки, тиббий кўрикнинг аниқ режавий  жадвал асосида ўтказилиши ҳамда аҳолининг тўлиқ қамраб олиниши туфайли ҳудудда аҳоли орасида хавфли ўсма ҳамда юқумли касалликлар билан касалланиш ҳолатлари кузатилмади. 38 нафар беморга туман Марказий шифохонасига, 8 нафар беморга эса бошқа даволаш муассасаларида даволанишлари учун йўлланмалар берилди.

Тиббий кўрик давомида аҳолига қиш мавсумида ўз саломатликларини муҳофаза қилиш зарурлиги, билиб-билмай турли хил йўллар билан ташвиқот қилинаётган дори-дармон воситаларидан фойдаланмаслик, ўзларини нохуш сезишганида, албатта, шифокорга мурожаат қилишлари зарурлиги тушунтирилди. Чунки  телевидение ва ижтимоий тармоқлар орқали зўр бериб ташвиқот қилинаётган дори воситалари кўпчилик ҳолатларда ўзининг акс таъсирини кўрсатиши мумкин. Шу боис, ҳар қандай ҳолатда ҳам, албатта, шифокор кўригидан ўтиш инсон  саломатлигини муҳофаза этишнинг энг мақбул йўли эканлиги тиббий кўрик давомида ҳар бир фуқарога атрофлича тушунтирилди.

Инсон – азиз, унинг соғ-саломат яшаши эса барча эзгу ишларнинг муваффақиятини таъминловчи  омилдир. 5-сонли қишлоқ оилавий поликлиникаси шифокорлари аҳоли саломатлигини сақлаш, уларни соғломлаштириш ҳамда тиббий маданиятини оширишда тиббий кўрикдан ташқари, “Саломатлик сабоқлари”, “Соғлом яшаш учун соғлом овқатланиш сари”, “Саломатлик – туман бойлик”, “Тонгни жисмоний машқлар билан қарши оламиз мавзуларидаги тиббий суҳбатлар, профилактик тадбирлар ўтказишга алоҳида эътибор қаратишаётгани боис, 2020 йил 16 ноябрь ҳолатига ҳудудда 235 нафар бемор соғломлаштирилиб, ижтимоий фаоллиги оширилди.

йни пайтда ҚОП шифокорлари аҳоли ўртасида соғлом овқатланиш борасида тиббий суҳбатлар ташкил этишни бошлаб юборишди. Умумий амалиёт шифокорлари ва патронаж ҳамширалари ҳар бир хонадонга кириб бориб, профилактик тадбирларнинг узвийлигини таъминлашмоқда.

Робия ЙЎЛДОШЕВА.