СУЮЛТИРИЛГАН ГАЗ ЭНДИЛИКДА ОНЛАЙН НАЗОРАТ ҚИЛИНАДИ
Амударё туманда суюлтирилган газдан фойдаланувчи 26233 та аҳоли хонадони мавжуд. Туман аҳолисига 1 та Холимбег сервис маркази ва 7 та суюлтирилган газ баллонларни тўлдириш ва қабул қилиш шохобчаси хизмат қилиб келмоқда. Ундан ташқари узоқда жойлашган 12 та овул ва маҳалла фуқаролар йиғинлари аҳолисига суюлтирилган газ баллонлари олиб бориб берилмоқда. Сотувда 1 кг. суюлтирилган газнинг баҳоси 1120 сўм бўлиб, бир баллонга 20 кг. суюлтирилган газ қуйилади.
Жорий йилнинг 15 октябридан бошлаб, “Ҳудудгазтаъминот” АЖ томонидан республика ҳудудлари бўйлаб, маиший газ баллонларига штрих кодли стикерларни ўрнатиш ишлари бошланди.
Истеъмолчига берилган ID картада барча маълумотлар кўриниб туради. Бу билан энди нарх-навони асоссиз ошириш муаммоси бўлмайди. Шу билан бирга бу тизимда газ баллон тарқатиш оралиғи 45 кун бўлса, 45 кун ичида фақатгина бир марта пул ечиб олинади. Яъни, 45 кун ичида иккинчи бор газ баллон олишнинг имкони йўқ. Автоматлаштирилган тизимда белгиланган маблағ тегишли муддатда ечиб олинади. Яъни, ҳайдовчи экспедитор ва таъминотчи ходимлар томонидан газ баллон учун қўлдан нақд пул олинишига йўл қўйилмайди. Бу эса ўз навбатида суюлтирилган газ таъминотида кўрсатилаётган хизмат сифатини янада ошириб, тизимдаги коррупция ҳолатларини бартараф этишга имкон беради.
Ҳар бир истеъмолчи қабул қилиб олаётган суюлтирилган газ баллони вазнини махсус назорат тарозилари орқали текшириб олишлари учун “Ҳудудгазтаъминот” акциядорлик жамияти томонидан қулайликлар яратилган. Яъни, барча автотранспорт воситалари мана шундай назорат тарозиси билан таъминланган. Ҳар бир маиший газ баллони бўш ҳолдаги вазнидан ташқари 20 кг. суюлтирилган газ билан тўлдирилган бўлиши лозим. Агар баллонда 20 кг.дан кам газ бўлса, истеъмолчининг ушбу баллонни олмасликка қонуний ҳаққи бор.
Суюлтирилган газ истеъмолчиларининг хонадонларига маиший газ баллонларни ўрнатиб бериш хизмати 3 минг сўмни ташкил этади. Янги тартибга кўра жорий этилаётган мазкур хизмат ихтиёрийдир.
Қадамбой Матирзаев, “Амударётумангаз” газ таъминоти бўлими суюлтирилган газ хизмати бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
