ЭЛЕКТР ЭНЕРГИЯСИ УЧУН ТЎЛОВЛАР онлайн тизимида амалга оширилади
Кейинги йилларда электр энергияси истеъмоли тобора ортиб бормоқда. Бу ҳолат аҳоли фаровонлигининг ошаётгани, турмуш даражасининг яхшиланаётгани билан изоҳланади. Масалан, илгари хонадонларимизда битта телевизор ва саноқли маиший электр буюмлари ишлатилган бўлса, бугун бундай воситалар сони анча кўпайди.
Тараққиётнинг бу каби шиддат билан кечаётгани соҳа олдига қатор масалаларни қўймоқда. Албатта, истеъмолчиларга етарли миқдорда ва сифатли товар етказиб беришнинг энг дастлабки шарти – тўлов интизомини мустаҳкамлаш ҳамда ишончли ва қулай тўлов воситаларини жорий қилишдир. Шунинг учун барча соҳалар қатори электр энергетикаси соҳасига ҳам ахборот-коммуникация технологиялари жадал суръатларда жорий қилинмоқда.
"Электр энергетикаси тўғрисида”ги Ўзбекистон Республикаси Қонуни ҳамда Вазирлар Маҳкамасининг 2009 йил 22 августдаги "Электр ва иссиқлик энергиясидан фойдаланиш қоидаларини тасдиқлаш тўғрисида”ги қарори талаблари асосида "Электр ҳисоб” дастурий таъминоти ишлаб чиқилган эди.
Дастурнинг яратилиши етказиб берилган электр энергияси учун тўловларни ўз вақтида ва самарали йиғиш, инсон омилининг ҳисоб-китобга ва тўловларнинг ҳаққонийлигига салбий таъсирини камайтириш имконини берди.
Эндиликда ҳар бир юридик ва маиший истеъмолчи компаниянинг асосий портали орқали шахсий кабинетга кириш ва ундан фойдаланиш имкониятига эга. Шахсий кабинетда ҳисобдаги жорий балансни кўриш, келиб тушган тўлов, ҳисоблагичдан олинган кўрсаткичлар, ҳисоб-китоб тарихи ва унинг жорий ҳолати тўғрисидаги маълумотлар мавжуд бўлади.
Энг муҳими, дастурий таъминот яратилганидан кейин фойдаланилган электр энергияси учун тўловларни автоматлаштирилган тўлов тизимининг мукаммаллаштирилган турлари орқали амалга ошириш имконияти юзага келди.
Автоматлаштирилган тўлов тизимининг афзаллиги шундаки, электр таъминот корхонасининг тўлов қабул қилиш бўлимига бориб навбатда туриш шарт эмас ва амалга оширилган тўлов бир неча сонияларда Сизнинг шахсий ҳисобингизга тушади. Масалан, ўзингизга яқин бўлган PAYNET шохобчаси орқали электр энергияси тўловларини реал вақт режимида, 500 сўмдан то 100 000 сўмгача куннинг исталган пайтида амалга оширишингиз мумкин. Бунинг учун PAYNET пунктларидан бирига келиб, шахсий ҳисоб рақамини ҳамда тўланадиган пул миқдорини айтиш кифоя.
Электр энергиясини ҳисобга олиш, назорат қилиш ва тўловларни қабул қилишнинг автоматлаштирилган тизими йўлга қўйилиши истеъмолчиларга қулайлик яратиши билан бирга ўзаро ҳисоб-китобларда аниқликни таъминлашга ҳам хизмат қилмоқда.
Муҳаммаджон БЕКЧАНОВ,
«Қорақалпоқ ҳудудий электр тармоқлари корхонаси» ОАЖ
Амударё туман электр таъминоти корхонаси бошлиғи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
