Амударё туманидаги Халқ қабулхонасига 2020 йил давомида жисмоний ва юридик шахслардан жами 1132 та мурожаатлар келиб тушди

Халқ қабулхоналари аҳоли билан бевосита мулоқот қилиш, уларнинг ҳаётий муаммоларини тезкорлик билан ҳал этишга кенг имконият яратмоқда. Фуқароларнинг ариза ва шикоятлари белгиланган тартибда, холислик тамойиллари асосида кўриб чиқилиб, ижобий ҳал этилмоқда. Бу, албатта, мамлакатимизда инсон ҳуқуқ ва манфаатларига олий қадрият сифатида қаралаётганининг яна бир ёрқин ифодасидир. Навбатдаги лавҳамиз Президентнинг Амударё туманидаги Халқ қабулхонаси фаолияти ҳақида.

Ўзбекистон Республикаси Президентининг Амударё туманидаги Халқ қабулхонасига 2020 йил давомида жисмоний ва юридик шахслардан жами 1132 та мурожаатлар келиб тушди. Шундан 633 таси ёзма, 493 таси оғзаки ҳамда 6 таси электрон шаклдаги мурожаатлар бўлиб, 634 таси ҳудуддаги ташкилотларга, 32 таси юқори ташкилотга юборилди. Қолган  466 таси Халқ қабулхонасида кўриб чиқиш учун қолдирилди. Ушбу мурожаатларнинг 1036 таси, яъни 93,5 фоизи қаноатлантирилди.  Шундан 681 таси ижобий ҳал қилиниб, 347 тасига ҳуқуқий маслаҳат ва маълумотлар берилди.

Халқ қабулхонаси биносида тумандаги 4 та сектор ҳамда бошқа идоралар раҳбарлари томонидан жами 104 маротаба шахсий қабуллар ўтказилди. Уларда 143 нафар фуқаролар томонидан 143 мурожаатлар келиб тушди.  Шунингдек, 4 та сектор раҳбарлари томонидан жами 130 маротаба сайёр қабуллар ўтказилган бўлиб, ушбу ўтказилган оммавий сайёр қабулларда 789 нафар фуқаро томонидан 793 та мурожаат келиб тушди.

Қабулхона томонидан туман Халқ таълими бўлими, Тиббиёт бирлашмаси, Мажбурий ижро бюроси ҳамда мактабгача таълим ташкилотларнинг мурожаатлар билан ишлаш ҳолати юзасидан ўрганишлар ўтказилди. Ўрганишлар давомида аниқланган камчиликлар юзасидан туман Тиббиёт бирлашмаси ҳамда Халқ таълими бўлимига тақдимномалар киритилди.

  Карантин даврида туман Халқ қабулхонасига, озиқ-овқат маҳсулотлари, дори-дармон, моддий ёрдамга муҳтож ва шу каби карантин билан боғлиқ бўлган жами 15 та мурожаатлар келиб тушган бўлиб, барча фуқароларнинг мурожаатлари тегишли идоралар билан ҳамкорликда ижобий ҳал қилинди. Ижтимоий ҳимояга муҳтож оилаларнинг ҳолидан хабар олиниб, 89 та хонадонга озиқ-овқат маҳсулотлари етказиб берилди.

Тумандаги 4 та сектор ҳудудида 49 та фуқаролар йиғинларида 2020 йил 1 февраль санасидан бошлаб, аҳоли муаммоларини уйма-уй юриш орқали ўрганиш жараёнида бир қанча ишлар амалга оширилди. Пандемияга қадар жами 33 минг 174 та хонадондан 4673 та хонадон ўрганилиб, шундан 490 та муаммолар аниқланди ва улар ижобий ҳал қилинди.

Тумандаги Халқ қабулхонасига 2020 йилнинг 25 июнида Бештом аҳоли пункти фуқаролари ва шу ҳудуддаги фермерлар томонидан хўжаликка тегишли ва хонадонларнинг томорқа ерларини суғориш учун фойдаланиб келинаётган ариқларни қайта қазиб беришда амалий ёрдам сўраб мурожаат қилди ва ушбу муаммо тез фурсатда ўз ечимини топди. Ўтган йили Халқ қабулхонаси ташаббуси билан туман ҳокимлиги ҳамда Маҳалла ва оилани қўллаб қувватлаш бўлими томонидан Қиличбой овулидаги Тоза ёп маҳалласида яшовчи эҳтиёжманд оилага яшаб турган уйи қайтадан қуриб берилди.

Таъкидлаш жоизки, Халқ депутатлари туман Кенгаши депутатларидан Ойбек Бегимов Халқ қабулхонаси билан ҳамкорликни яхши йўлга қўйган бўлиб, мурожаатларнинг ижобий ҳал қилинишида ваколати доирасида кўмак бериб келмоқда. Депутат Дурунки маҳалласи фуқароларнинг мурожаатига кўра Аҳмад Яссавий кўчасига трансформатор, сим ҳамда сим устунларни ўрнатилишида амалий ёрдам кўрсатди. Шунингдек, Бойовул маҳалласидаги Беҳбудий қўчасидан Ўзбекистон кўчасигача бўлган йўлнинг текисланишида амалий ёрдам бериб, қатор ижобий ишлар амалга оширилишида иштирок этди. 

Янгиобод маҳалласида яшовчи Баҳрихон Йўлдошева ҳам ўтган йили иш таъминлашда ёрдам сўраб мурожаат қилган эди. Фуқаронинг ушбу мурожаати ҳам атрофлича ўрганилди ва тегишли ташкилотлар ҳамкорлигида унга амалий ёрдам берилиб, иш билан таъминланди.

Туманимизнинг чекка ҳудудида жойлашган Жумуртов шаҳарчаси ҳудудидаги “Дўстлик-1” аҳоли пункти фуқароларидан келиб тушган мурожаатга кўра паст кучланишда ишлаётган трансформатор 100 кВт кучланишга эга бўлган трансформаторга алмаштириб берилди. Шунингдек, шаҳарча ҳудудидаги “Дўстлик-2” ва “Жумуртов” аҳоли пунктлари фуқароларини  тоза ичимлик суви  билан таъминлаш мақсадида маҳаллий бюджет ҳисобидан сув тозалаш иншоотлари қуриб берилишига кўмаклашилди. Айни пайтда ушбу яратилган қулайликлардан фойдаланаётган аҳоли турмуш тарзи аввалгисига кўра яхшиланганидан ниҳоятда мамнун.

Қабулхона томонидан мазкур йилда ҳам аҳоли мурожаатларини тинглаш, белгиланган тартибда кўриб чиқиб ижобий ҳал этиш борасида тегишли чора-тадбирлар амалга оширилмоқда. “Халқ давлат идораларига эмас, давлат идоралари халқимизга хизмат қилиши керак” шиорига асосланган ҳолда юртдошларимизнинг ҳаётдан рози бўлиб яшашига замин яратиш мақсадида тизимли ишлар олиб борилмоқда.

Э.Ражабов, Амударё туманидаги Халқ қабулхонаси мудири.