“Ким Ватанга содиқ бўлса, мендирман ўша!” шиори остида спорт мусобақалари ташкил этилди

13 январь куни Амударё туманида ҳам Ватан ҳимоячилари кунига бағишлаб, туман ҳокимлиги,  Жисмоний тарбия ва спорт бўлими, Тиббиёт бирлашмаси, Халқ таълими бўлими, Мудофаа ишлари бўлими, Ички ишлар бўлими, Ўзбекистон мудофаасига кўмаклашувчи “Ватанпарвар” ташкилоти туман Кенгаши ҳамкорлигида “Ким Ватанга содиқ бўлса, мендирман ўша!”  шиори остида спорт мусобақалари ташкил этилди.

Мудофаага кўмаклашувчи “Ватанпарвар” ташкилоти туман Кенгашининг спорт майдончасида бўлиб ўтган ушбу мусобақада тумандаги умумий ўрта таълим мактабларининг спортчи ёшлари иштирок этдилар. Спорт мусобақасининг тантанали очилиш маросимида ҳамкор масъуллар иштирокчиларни Ватан ҳимоячилари куни муносабати билан табриклаб, мусобақа қатнашчиларига омад тиладилар.

Қорақалпоғистон Республикаси Вазирлар Кенгаши Раисининг ҳамда туман ҳокимининг фармойишлари ижросини таъминлаш, соғлом ва баркамол авлодни вояга етказиш борасида амалга оширилаётган ишларнинг самарадорлигини ошириш, ёшларнинг бўш вақтларини мазмунли ўтказиш, уларни спорт мусобақаларига  оммавий тарзда жалб қилиш мақсадидаги мазкур мусобақалар дастлаб 8 та ҳудудда ўтказилиб, 858 нафар ёшлар қамраб олинган эди. Шу кунги якуний босқич учун ўтказилган мусобақаларда эса 88 нафар спортчи ёшлар спортнинг арқон тортиш, мини футбол, ҳарбий спорт турлари, яъни 1000 метрга югуриш, турникда тортилиш, граната улоқтириш, ўқ отиш, куч синашиш турлари бўйича ўзаро беллашдилар.

Таъкидлаш жоизки, Ватан, халқ, аждодларимиз, буюк алломаларимизнинг шуҳратини дунёга тараннум этишда, ёшларни ҳарбий-ватанпарварлик руҳида тарбиялашда, ҳар  томонлама етук, жисмонан соғлом, билимли ва фидойи фарзанд қилиб шакллантириш йўлида халқ, албатта, ўзининг буюк келажагини барпо этишга қодир. Мамлакатимизда истиқомат қилаётган ҳар бир инсоннинг қалбига Ватан туйғусини сингдириш, бир неча минг йиллик моддий ва маънавий маданият масканларидан бири – она  Ўзбекистонимизнинг ҳақиқий жонкуяри бўлишга эришиш ҳозирги куннинг энг долзарб вазифаларидандир. Ёшлар қалбида Ватан ҳимояси йўлидаги мардлик ва шижоат намуналарини шакллантириш, бирдамлик, жойларда соғлом маънавий муҳитни барқарорлаштиришдек эзгу мақсадлар кўзлаб ўтказилган мазкур мусобақалар давомида ёш спортчилар ўзларининг чаққон ва эпчилликларини, абжирлигини, спорт маҳоратини намойиш этиб, ғолиблик учун ҳаракат қилдилар.

Мусобақа натижаларига кўра,  арқон тортиш бўйича  1-ўринни 3-сонли мактаб жамоаси, 2-ўринни 41-сонли мактаб жамоаси,  3-ўринни 31-сонли мактаб жамоаси қўлга киритишга муваффақ бўлишди. Мини футбол мусобақасида 1-ўринни 4-сонли мактаб жамоаси, 2-ўринни 17-сонли мактаб жамоаси, 3-ўринни 9-сонли мактаб жамоаси қўлга киритди. Шунингдек, ҳарбий спорт мусобақаларида 41-сонли мактаб жамоаси 1-ўрин, 3-сонли мактаби жамоаси  2-ўрин,  12-сонли мактаб жамоаси 3-ўрин ғолиби деб топилди.

Тадбирнинг якунловчи қисмида мусобақа ғолибларига туман Жисмоний тарбия ва спорт бўлимининг диплом ва фахрий ёрлиқлари топширилди. Ғолиб жамоалар туман ҳокимлиги, Халқ таълими бўлими, Миллий гвардия, Ички ишлар бўлими томонидан ҳам совғалар билан тақдирланди.

Ёш авлодни ватанпарварлик руҳида тарбиялаш мақсадида ўтказилган ушбу спорт тадбирлари улар қалбидаги юртга дахлдорлик туйғуларини янада юксалтирди.

Х.Исмаилов, туман Жисмоний тарбия ва спорт бўлими бошлиғи вазифасини вақтинча бажарувчи.