“СПОРТНИ СЕВ, СПОРТ БИЛАН ЯША!” ШИОРИ ОСТИДА МУСОБАҚАЛАР ЎТКАЗИЛДИ

Мамлакатимизда ёш авлоднинг жисмоний тарбия ва спорт билан шуғулланиши учун замон талабларига мос шарт-шароитлар яратилмоқда, спорт мусобақаларини  ташкил этиш орқали уларда ўз иродаси, кучи ва имкониятларига бўлган ишончни мустаҳкамлаш, иқтидорли спортчиларни саралаб олиш имкони яратилмоқда. Натижада ўсиб келаётган ёш авлодни зарарли одатлардан асраш, уларнинг бўш вақтлари мақсадли ва мазмунли ўтказилишига эришилаяпти.

“Спортни сев, спорт билан яша!” - бу шиор айни кунда нафақат ёшларнинг,  балки, бутун халқимизнинг ҳаётий шиорига айланмоқда, жисмоний тарбия ва спорт ҳаёт тарзимиздан чуқур ўрин эгалламоқда.

Яқинда Ватан ҳимоячилари кунига бағишланиб, Амударё тумани Ички ишлар бўлими ва туман Болалар-ўсмирлар спорт мактаби ҳамкорлигида ташкил этилган дзюдо кураши мусобақаси ҳам туманимиз ёш полвонлари учун байрам туҳфаси бўлди. Мусобақада 2007-2009 йилларда туғилган ўсмирлар 32, 35, 38, 42, 50, 60 ва 66 килограмм вазн тоифаларида ўзаро беллашдилар.

Мусобақа олдидан ўтказилган сафланишда Болалар-ўсмирлар спорт мактаби директори Чоршам Тожимуродов ёш полвонларни, барчани 14 январь – Ватан ҳимоячилари куни ва миллий армиямиз ташкил этилган кун билан қизғин табриклади. Бугунгидай осуда  ҳаётимизни Ватанимизга чексиз садоқати, фарзандлик бурчи ва кучи, йигитлик шижоати билан ишончли қўриқлаб турган ҳарбийларга ўз миннатдорчилигини  билдириб, ёш спортчиларни уларга муносиб ўринбосарлар бўлишга чақирди. Туман Ички ишлар бўлими  соврини учун ўтказилаётган мусобақада барчани ўз иқтидорини намоён этишга чақирди.

“Спортни сев, спорт билан яша!” шиори остида ўтказилган дзюдо бўйича спорт мактаб очиқ биринчилик мусобақасини 32 килограмм вазн тоифасидаги полвонлар бошлаб бердилар. Мактабнинг тажрибали мураббийи Камоладдин Норимов бош ҳакамлик қилган очиқ биринчилик мусобақасида Ислом Адамбоев, Хушнуд Султонов, Камрон Олланиёзов, Жасур Болтабоев, Шоҳруҳ Султонов, Умиджон Камолов, Дилшодбек Ражабовлар ўзларининг барча рақибларидан устун келиб, ғолибликни  қўлга  киритдилар. Шоҳруҳ Шомуродов, Аброр Шомуродов, Зокиржон Саъдуллаев, Диёрбек Турсунбоев, Жавоҳир Қодиров, Самир Янгибоев, Раҳматжон Исмоиловлар эса иккинчи ўринларни енгиб олишди.

Шунингдек, Самандар Озодов, Ҳидоят Қурбонбоев, Халил Озодов, Жавоҳир Бозорбоев, Зафарбек Болтабоев, Камронбек Боймуродов, Самандар Омонбоев, Қувонч Дузелбоев, Ҳакимбой Сафарбоев, Омон Назирбоев, Акбар Жобборберганов, Акбарали Чоршамов, Бобуржон Эгамберганов, Жўрабек Муродовлар эса фахрли учинчи ўринни эгалладилар.

Мусобақа ғолибларига туман Ички ишлар бўлимининг соврини ва эсдалик совғалари топширилди.

“Спортни сев, спорт билан яша!” шиори остида бўлиб ўтган спорт мактаб очиқ биринчилиги мусобақалари ёш спортчиларни дзюдо билан сидқидилдан, қунт билан шуғулланиб, янги-янги марраларни эгаллашга руҳлантирди, ёш спортчиларнинг ўзларига бўлган масъулиятини янада оширди, кучлилар мусобақаларда аниқланишини яна бир бор исботлади.

О.РАЖАБОВА.