2021 ЙИЛГИ ДАВЛАТ ДАСТУРИ ЛОЙИҲАСИ БЎЙИЧА ЙИҒИЛИШ ЎТКАЗИЛДИ

Муҳтарам Президентимиз Ш.Мирзиёев 2020 йил 29 декабрдаги Олий Мажлисга йўллаган Мурожаатномасида мамлакатимизда 2021 йилда барча соҳаларда амалга ошириладиган муҳим ислоҳотлар, эл-юртимиз фаровонлиги, тараққиёти билан боғлиқ долзарб вазифалар тўла қамраб олинган.

Мурожаатномани бутун халқимиз катта қизиқиш билан ўқиб-ўрганмоқда, белгиланган улуғвор вазифасига маҳкам киришмоқда.

Шу йилнинг 23 январида Мурожаатномада белгиланган устувор вазифалардан келиб чиқиб, “2017-2021 йилларда  Ўзбекистон Республикасини ривожлантиришнинг бешта устувор йўналиши бўйича ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид Давлат дастури тўғрисида”ги Ўзбекистон Республикаси Президенти Фармони лойиҳасини ўрганиш ва таклифлар билдиришга бағишланган йиғилиш бўлиб ўтди.
Йиғилишга тумандан сайланган Қорақалпоғистон Республикаси Жўқорғи Кенгеси депутатлари, туман Кенгаши депутатлари, туман ҳокими ўринбосарлари, секторлар раҳбарлари, ўзини ўзи бошқариш органлари раислари, мактаблар директорлари, фаол ёшлар иштирок этдилар.

Йиғилишни туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Маъмур Темирбоев очди ва олиб борди. У ўз сўзида 2020 йил 29 декабрдаги Президентимиз Шавкат Мирзиёевнинг Олий Мажлисга Мурожаатномасида белгиланган вазифалардан келиб чиқиб, “2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид Давлат дастури тўғрисида”ги Ўзбекистон Республикаси Президентининг Фармони лойиҳаси жамоатчилик муҳокамасига ҳавола этилгани, шу муносабат билан жорий йилнинг 19-26 январь кунлари тегишли ҳудудлардаги сенаторлар бошчилигида маҳаллий Кенгашлар депутатлари, Ёшлар парламенти аъзолари ҳудудий ижро органлари ва жамоатчилик вакилларидан иборат таркибда ишчи гуруҳлар тузилиб, жадвал асосида лойиҳанинг мазмун-моҳияти, уни амалга ошириш механизмлари, ҳамда кутилаётган ижобий ўзгаришлар тўғрисида жойларда тарғибот-тушунтириш ишлари ўтказилаётганини ва шу орқали аҳолининг мазкур Фармон ва Давлат дастури лойиҳасига муносабати ўрганилаётганини айтди ва йиғилиш иштирокчиларидан бу борада таклиф мулоҳазаларини, фикр-мулоҳазаларини билдиришини сўради.

Кун тартибидаги масала юзасидан Ўзбекистон Республикаси Олий Мажлиси сенати аъзоси Гулистон Аннақиличева батафсил маъруза қилди.

У ўз сўзида “Ёшларни қўллаб-қувватлаш ва аҳоли саломатлигини мустаҳкамлаш йили”да мактабгача таълим тизимида болаларни мактабгача таълим билан қамраб олиш кўрсаткичини ошириш, мактаб таълими сифатини ошириш, ўқитувчиларга зарур барча шароитларни яратиш, замонавий, янги мактаблар қурилиши, миллий таълим дастурини яратиш, таълим сифатини тубдан яхшилашга  қаратилган алоҳида дастур амалга оширилиши ушбу соҳадаги туб ислоҳотларнинг асосини ташкил этишини, Президентимиз томонидан хориждаги ватандошларимизни ҳам ижтимоий қўллаб-қувватлаш, жорий қилинган “Аёллар дафтари”, “Ёшлар дафтари”га киритилган оилаларни ижтимоий  қўллаб-қувватлаш ҳамда эълон қилинган “Ёшларни қўллаб-қувватлаш ва аҳоли саломатлигини мустаҳкамлаш йили” Давлат дастури лойиҳасида ҳар бир туманнинг, ҳар бир маҳалланинг муаммоли масалаларини кўтариб чиқиш бўйича таклифлар киритилиши мумкинлиги ҳақида кенг турда фикр билдирди.

Маълумот учун 2021 йил Давлат дастури лойиҳаси 276 та банддан иборат бўлиб, Ўзбекистон Республикаси Президентининг 2020 йилнинг 29 декабрь куни Олий Мажлисга Мурожаатномасида акс этган асосий ғоя ва таклифлари ҳамда 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган асосий вазифалар асосида ишлаб чиқилган. Фармон лойиҳасини 10 кун мобайнида жамоатчилик муҳокамасидан ўтказишдан мақсад – жорий йилги Давлат дастурини фуқаролар, халқаро экспертлар, тегишли вазирлик ва идора мутахассислари, бизнес доира ҳамда фуқаролик жамиятининг бошқа институтлари вакилларининг фикр-мулоҳазалари ва таклифларини инобатга олган ҳолда янада такомиллаштириш кўзда тутилган.

Шундан сўнг, туман ҳокими ўринбосари, инвестициялар ва ташқи савдо бўлими бошлиғи Рашид Салаев, туман Адлия бўлими бошлиғи Мўъминжон Матюсупов, туман Халқ таълими бўлими бошлиғи Раҳматулла Матқурбонов, 40-сонли мактаб директори, Қорақалпоғистон Республикаси Жўқорғи Кенгеси депутати Санобар Хўжамуродова, “Дурунки” маҳалла фуқаролар йиғини раиси Шуҳрат Жуманиёзов, меҳнат фахрийси Пардагул Ўрозбоева, туман Маҳалла ва оилани қўллаб-қувватлаш бўлими  бошлиғи ўринбосари Муқаддас Бекназаровалар сўзга чиқишиб, “Ёшларни қўллаб-қувватлаш ва аҳоли саломатлигини мустаҳкамлаш йили” Давлат дастури лойиҳасига аҳолини ҳар томонлама ижтимоий-иқтисодий жиҳатдан қўллаб-қувватлаш, ёшларга бўлган эътиборни кучайтириш ҳамда аҳоли саломатлигини мустаҳкамлаш борасида, шунингдек, қонунларга ўзгартириш ва қўшимчалар киритиш борасида ўзларининг таклиф ва фикр-мулоҳазаларини билдирдилар.
Йиғилишда муҳокама этилган масала юзасидан тегишли қарорлар қабул қилинди.

О.РАЖАБОВА.