АҲОЛИ ТИББИЙ ХАТЛОВДАН ЎТКАЗИЛМОҚДА

Тиббиётнинг тасдиқлашича, жисмоний фаоллик ҳамда овқатланиш меъёр ва қоидаларига амал қилмаслик, етарли даражада витамин ва минераллар истеъмол қилмаслик, таркибида  ёғ, туз миқдори кўп бўлган таомларни  кўп ейиш – аҳолининг  юрак-қон томир, эндокрин, хавфли ўсма каби касалликларга чалинишига, ёшларнинг ақлий ўсишдан ортда  қолишига сабаб бўлар экан.

Эндиликда аҳоли саломатлигини ҳимоя қилиш бўйича Президентимизнинг тегишли Қарорига  мувофиқ 2021 йилнинг 1 июнидан бошлаб, 6-23 ойлик болалар уй шароитида тайёрланган овқатларни бойитиш мақсадида микро нутриент кукуни, 6 ойликдан 5 ёшгача бўлган болалар “А” витамини, 2-10 ёшдаги болалар гельментоз профилактикаси бўйича препаратлар билан бепул таъминланади. Шунингдек, тиббиёт ходимлари аҳоли  орасида соғлом  турмуш тарзини қўллаб-қувватлаш, жисмоний фаолликнинг инсон саломатлиги учун зарурлигини кенг тарғиб этишади.

Қарорга мувофиқ 2022 йил 1 январга  қадар маҳаллалар кесимида юқумли  бўлмаган касалликлар бўйича “аҳолининг саломатлик профили” шакллантирилади, яъни тиббий хатлов ўтказилади. Бунда аҳолининг овқатланиш харакатери, тана вазни индекси, спиртли ичимлик ва тамакига қарамлиликнинг мавжудлиги, артериал босим, қондаги қанд миқдори ва холестерин даражаси каби кўрсаткичларнинг қамраб олиниши назарда тутилган. Бу ишларни амалга оширишга бирламчи тиббий бўғинларда умумий  амалиёт шифокори ўрнига оилавий шифокор ва тажрибали ҳамширалардан иборат тиббий бригадалар тузилди.

Бу вазифаларнинг бажарилишида қишлоқ оилавий поликлиникалари  зиммасига масъулиятли вазифалар юкланган. Айни кунда бу борада туманимизда ҳам амалий ҳаракатлар бошлаб юборилди.

21 январь куни Ўзбекистон Республикаси Соғлиқни  сақлаш вазири ўринбосари Шоҳруҳ Шараҳмедов, Қорақалпоғистон Республикаси Соғлиқни сақлаш вазири Мурод Қурбонов ва бир гуруҳ масъуллар Амударё туманидаги 1-сонли оилавий  поликлиникада бўлишиб, юқоридаги масалалар юзасидан амалга оширилаётган ишлар, оилавий шифокорлар иштирокида тузилган тиббий бригадалар фаолияти, хатлов жараёни билан танишдилар.

Шунингдек, масъуллар ўзгалар парваришига муҳтож, ногиронлиги бўлган шахсларнинг уйларига бориб, ҳолидан хабар олишди.

Ташриф давомида Қорақалпоғистон Республикаси Соғлиқни сақлаш вазири Мурод Қурбонов туман Тиббиёт бирлашмасига мураккаб жарроҳлик амалиётини амалга  оширишда фойдаланиладиган замонавий лапароскоп ускунасини топширди.

Тиббиёт соҳаси масъуллари туманимизга ташрифи давомида янги амалиёт – аҳолини тиббиёт хатловдан ўтказиш борасида муҳим йўл-йўриқ ва маслаҳатлар бердилар.

Ойгул РАЖАБОВА.