“АЁЛЛАР ДАФТАРИ”ГА КИРИТИЛГАН 55 НАФАР ХОТИН-ҚИЗЛАР ДОИМИЙ ИШ БИЛАН ТАЪМИНЛАНДИ

Мамлакатимизда аёллар ва ёшлар давлатимизнинг доимий ғамхўрлигида бўлиб, уларнинг турмуши сифатини ошириш, қулай меҳнат шароитини яратиш, ўз устида изланиб, салоҳиятини юксалтиришига алоҳида эътибор қаратилмоқда.

Туман прокуратураси томонидан оғир ижтимоий вазиятга тушиб қолган хотин-қизларга, тадбиркор ва тадбиркорлик қилиш истагини билдирган аёлларга амалий ҳамда ҳуқуқий ёрдамлар кўрсатиш, шу билан бирга хотин-қизларнинг ҳуқуқларини ҳимоя қилиш юзасидан бир қанча ишлар амалга оширилмоқда.

Туман прокурорига бириктирилган 2-сектор ҳудудида ўтказилган хатловлар натижасида 13 минг 909 нафар 30 ёшдан юқори  хотин-қизлар орасида анкета сўровнома ўтказилди. Натижада 30-54 ёш оралиғидаги хотин-қизлар 10 минг 271 нафар, 55 ёшдан юқориси 3 минг 638 нафарни ташкил қилиб, 285 нафари ногиронлиги бор хотин-қизлар эканлиги аниқланди.

Шунингдек, меҳнатга лаёқатли хотин-қизлар 12 минг 57 нафарни ташкил қилиб, уларнинг 704 нафари ишлаш истагини билдиришган, шундан 170 нафари тикувчилик, 151 нафари қишлоқ хўжалиги соҳасида, 90  нафари тадбиркорлик, 173 нафари ўзини ўзи банд қилиш, 76 нафари ҳақ тўланадиган жамоат ишларида, 44 нафари бошқа соҳаларда ишлаш истагини билдиришган.

Шуларни эътиборга олиб, 2-сектор ҳудудида  меҳнатга лаёқатли ишсиз хотин-қизларнинг бандлигини таъминлаш мақсадида сектор ҳудудидаги 2-сонли касб-ҳунар мактабида тикувчилик ва ширинликлар пишириш йўналишлари бўйича касбга ўқитиш ўқув марказлари ташкил қилиниб ҳозирги кунда 65 нафардан ортиқ хотин-қизлар мазкур касбга ўқитиш марказида тахсил олиб, касб-ҳунар ўрганишмоқда.

Сектор ҳудудидаги “Аёллар дафтари”га киритилган 5 нафар хотин-қизларнинг бандлигини таъминлаш мақсадида субсидия тартибида иссиқхона қуриб берилди ва чорва моллари берилиб ўзини ўзи банд қилиш орқали бандлиги таъминланди.

Шунинг билан бирга “Аёллар дафтари”га киритилган 55 нафар хотин-қизлар доимий иш билан таъминланди. Хусусан, “Қиличбой” овулида яшовчи фуқаролар М.Зарифбоева ва Х.Азимбаевалар туман Халқ таълими бўлимига қарашли 83-сонли умумтаълим мактабига ўқитувчи лавозимига ишга жойлаштирилиб, доимий бандлиги таъминланди.  

Бундан, ташқари тумандаги “Тамара-Феруза” корхонаси тикувчилик цехи раҳбари, тадбиркор Тамара Юсупова томонидан 2-сектор ҳудудидаги “Беш овул”, “Тошқалъа” ҳамда “Юқори қишлоқ” маҳаллаларида цех шоҳобчалари ташкил қилиниб, “Аёллар дафтари”га киритилган 15 дан ортиқ хатин-қизлар ушбу шоҳобчаларга ишга жойлаштирилди. Тадбиркор томонидан яна тикувчилик соҳаси бўйича  хотин-қизларни касбга ўқитиш ва уларнинг бандлигини таъминлаш юзасидан жорий йилнинг февраль ойидан бошлаб, ўқув қурслари ташкил қилиниши режалаштирилмоқда.

“Қиличбой” овули ҳудудида яшовчи фуқаро томонидан сектор раҳбарининг тавсияси ҳамда кўмаги натижасида томорқа ерининг 2-сотих майдонида иссиқхона ташкил қилиниб, мева-сабзавот маҳсулотлари етиштирилиб келинаётган эди. Ушбу фуқаро томорқасидаги 3 сотих майдонга яна бир иссиқхона ташкил қилиб, ҳудудда яшовчи “Аёллар дафтари”га киритилган 5 хонадонда яшовчи хотин-қизларнинг бандлигини таъминлади.

2020 йил давомида 2-сектор ҳудудида 35 та оилалар никоҳдан ажрашишган бўлиб, мазкур оилаларнинг 18 таси сектор раҳбари, маҳалла фаоллари томонидан яраштирилди. Маҳалла фаоллари ва ишчи гуруҳ томонидан оила муқаддаслиги ҳақида олиб борилган тарғибот ишлари натижасида улар ярашиб, қайта оила қуриб, бирга яшаб келишмоқда.

2-сектор томонидан “Маҳалла - сектор - Халқ қабулхонаси - Маҳалла” тамойили асосида самарали ҳамкорлик  тизими жорий этилиб, хотин-қизларни қўллаб-қувватлаш, ҳудудни жиноятчиликдан ҳоли ҳудудга айлантириш юзасидан ижобий ишлар давом эттирилмоқда.

(Фото - uza.uz/)