ЭЪТИБОРСИЗЛИК – ФАВҚУЛОДДА ҲОЛАТЛАРНИНГ ЮЗАГА КЕЛИШИГА САБАБ БЎЛАДИ

Қорақалпоғистон Республикаси Вазирлар Кенгашининг 2020 йил 26 октябрь кунги йиғилиш баённомаси ижросини таъминлаш мақсадида туманимиздаги 4 та секторлар кесимида аҳолини фавқулодда вазиятларда ҳимоя қилиш юзасидан қатор ишлар амалга оширилмоқда.
Туман Фавқулодда вазиятлар бўлими, Ички ишлар бўлими, Тиббиёт бирлашмаси, Маҳалла ва оилани қўллаб-қувватлаш бўлими “Амударётумангаз таъминоти” филиали ҳамда электр тармоқлари корхонаси ходимларидан иборат тузилган ишчи гуруҳлар томонидан амалий-назарий машғулотлар ўтказиб келинмоқда.
Туман Фавқулодда вазиятлар бўлими ходимлари томонидан ўтган йил давомида тумандаги 49 та кўп қаватли уйларда, якка тартибдаги 32115 та аҳоли турар жойларида яшовчи фуқаролар билан учрашувлар ўтказилиб, яшаш уйларининг ёнғинга қарши ҳолатлари кўздан кечирилlи ўтин, кўмир, газ иситиш печларидан нотўғри фойдаланиш ҳолатлари аниқланди. Ушбу хонадонларда нохуш ҳолатлар, яъни чақнаш (портлаш), ёнғин ва ис газидан ҳамда уй шароитида тайёрланган консерва маҳсулотлардан заҳарланишнинг олдини олиш мақсадида тумандаги 49 та ОФЙ ва МФЙларда яшовчи фуқароларга зарур тушунтириш ва тавсиялар берилди.
Ўтказилган тадбирлар давомида туман Ёнғинга қарши курашиш жамияти ходимлари томонидан фуқароларнинг яшаш уйларидаги иситиш печлари техник кўрикдан ўтказиб, 458 та дудбуронлари чанг тортиш мосламаси ёрдамида тозалаб берилди. Аниқланган 348 та носоз дудбуронлар таъмирланиб, соз ҳолатга келтирилди.
Туманда ўтган 2020 йил давомида 33 та ёнғин қайд этилди. Шундан 11 таси яшаш уйида, 3 таси пахта қабул қилиш масканларида, 1 таси автомобилда, 18 таси аҳолининг молхона ва чердакларида содир бўлган.
Туман Фавқулодда вазиятлар бўлими ходимлари томонидан тумандаги 49 та ОФЙ ва МФЙларда 2021 йил давомида нохуш ҳолатларнинг олдини олиш мақсадида янги чора-тадбирлар режаси ишлаб чиқилиб, ходимлар томонидан профилактик тадбир давом эттирилмоқда.
Фуқароларимиз шуни унутмасликлари керакки, оддийгина эътиборсизлик фавқулодда ҳолатларни келтириб чиқариши мумкин. Бундай ҳолатлар юзага келмаслиги учун эса ҳамиша огоҳ бўлиш зарур.

Г.З.ЎРАЛОВ, туман ФВБ бошлиғи ўринбосари, подполковник.