Амударё туманида фавқулодда вазиятлар профилактикаси бўйича ўқув тадбири ўтказилди

Инсон ҳаёти ва соғлиғини асраш, турли кўнгилсизликлар ҳамда фавқулодда вазиятларнинг олдини олиш бугунги куннинг энг долзарб вазифаларидан бири ҳисобланади. Айниқса, табиий офатлар ва мавсумий хавф-хатарлар олдиндан огоҳлантирмай келишини инобатга олсак, аҳоли, хусусан, ўсиб келаётган ёш авлод ўртасида хавфсизлик маданиятини шакллантириш муҳим аҳамият касб этади.

Шу мақсадда юртимиз бўйлаб фавқулодда вазиятларни олдини олишга қаратилган "Долзарб 30 кун" ойлиги доирасида жойларда кенг кўламли профилактика ва тушунтириш ишлари олиб борилмоқда. Ана шундай муҳим тадбирлардан бири Амударё тумани ихтисослаштирилган мактабида ҳам ташкил этилди.

Ушбу профилактик йиғилишда мактабнинг ўқувчи-ёшлари, педагог ходимлари ҳамда Амударё тумани Фавқулодда вазиятлар бўлими ходимлари фаол иштирок этиб, чўмилиш қоидалари ва зилзила вақтида тўғри ҳаракатланиш масалаларини атрофлича муҳокама қилдилар. Тадбирнинг асосий мақсади ёшларнинг фавқулодда вазиятларга тайёргарлик кўникмаларини мустаҳкамлаш ва уларнинг кундалик ҳаётида хавфсизлик маданиятини янада оширишдан иборат бўлди.

Йиғилиш давомида кунлар исиши билан долзарблашадиган асосий мавзу – очиқ сув ҳавзаларида хавфсиз чўмилиш масаласига алоҳида эътибор қаратилди. Мутахассислар томонидан иштирокчиларга чўмилиш қоидаларига қатъий амал қилиш, эҳтиётсизлик ва бепарволик оқибатида юзага келиши мумкин бўлган фожиали бахтсиз ҳодисаларнинг олдини олиш юзасидан батафсил тушунтириш ишлари олиб борилди. Хусусан, сув ҳавзалари атрофида ўзини тутиш қоидалари, белгиланмаган ва назоратсиз ҳудудларда чўмилишнинг инсон ҳаёти учун қанчалик хавфли эканлиги ҳамда сувда фавқулодда вазият юз берганда зудлик билан кўрилиши лозим бўлган чоралар ҳақида аниқ ва ҳаётий маълумотлар берилди.

Тадбирнинг яна бир муҳим қисми зилзила хавфи ва ундан сақланиш чораларига бағишланди. Мавзуни янада жонли ва тушунарли қилиш мақсадида йиғилганларга махсус тайёрланган видеороликлар намойиш этилди. Ушбу кўргазмали воситалар орқали чўмилиш ва зилзила вақтида хавфсизлик қоидаларига сўзсиз амал қилишнинг ҳаётий аҳамияти кенг ёритиб берилди.

Шунингдек, зилзила содир бўлганда бино ичида қандай ҳаракатланиш тартиби мутахассислар томонидан амалий тарзда кўрсатиб ўтилди. Ўқувчиларга ер қимирлаши вақтида энг хавфсиз жойни танлаш, саросимага берилмасдан бинодан тартибли равишда эвакуатсия қилиш ҳамда жабрланганларга биринчи тиббий ёрдам кўрсатиш бўйича зарур кўрсатмалар берилди. Бундай амалий машғулотлар назарий билимларни ҳаётда тезкорлик билан қўллаш кўникмасини шакллантиришга хизмат қилиши шубҳасиздир.

Учрашув якунида фавқулодда вазиятлар бўлими мутахассислари томонидан ҳар қандай кутилмаган ҳолатда саросимага тушмаслик, вазиятни тўғри баҳолаб, тезкор ҳамда аниқ қарор қабул қилиш инсон ҳаётини сақлаб қолишда энг муҳим омил экани алоҳида таъкидланди. Иштирокчиларга кундалик турмушда амал қилиниши лозим бўлган хавфсизлик қоидалари бўйича ҳам қўшимча тавсиялар тақдим этилди.

Бу каби кенг қамровли тарғибот ва ташвиқот тадбирлари ёшларнинг фавқулодда вазиятларда тўғри ҳаракатланиш бўйича билим ва кўникмаларини оширишда, энг муҳими, уларнинг ўз ҳаёти ва атрофдагилар саломатлигига бўлган масъулиятини юксалтиришда муҳим аҳамият касб этади.