ЁШЛАРНИНГ ФИДОЙИ ВА ЖОНКУЯР ЕТАКЧИСИ

Ёшлар – миллат келажаги, юрт истиқболи ва тараққиёт бунёдкорларидир. Шу боис, ёш авлодга мамлакатимизда юксак эътибор қаратиб келинмоқда. Ёшлар ҳам ўз навбатида барча имкониятлардан самарали фойдаланиб, мамлакат тараққиётининг чинакам фидойиларига айланишга ҳаракат қилишмоқда.

Туманимиздаги 12-сонли мактабда ёшлар етакчиси вазифасида ишлаб келаётган Нигора Саидмуродова ёш авлодни она Ватанга муҳаббат ва садоқат руҳида тарбиялашга ҳисса қўшиб, интилувчан, иқтидорли ёшларни кашф этиб, истеъдодларини юзага чиқаришларига кўмаклашмоқда. Бу борада чинакам кўмакдош ва таянч бўлиб келган ёшлар ташкилоти, айни пайтдаги Ёшлар ишлари агентлиги туман бўлими билан ҳамкорликда қатор ишларни тизимли равишда олиб бормоқда.

Нигора болаликдан ўқитувчилик касбига қизиқди ва шу касбни эгаллаш ниятида Нукус давлат Педагогика институтида таҳсил олди. У дастлабки иш фаолиятини Нукус давлат педагогика институти қошидаги 3-сонли Амударё академик лицейи жисмоний тарбия фани ўқитувчиси бўлиб ишлашдан бошлади. Иш фаолияти давомида бўш вақтларида ҳам ўқувчи-ёшлар билан шуғулланар, уларнинг қизиқишлари, интилишлари билан қизиқар, ўша пайтдаги мавжуд ёшлар ташкилоти кўмагида ҳар бир ўқувчидаги иқтидорни юзага чиқаришга ҳаракат қиларди. 2012 йилда Ўзбекистон Республикаси “Камолот” ёшлар ижтимоий ҳаракати Амударё туман Кенгашига етакчи мутахассис вазифасига ўтди.

Нигора 2015 йилдан 12-сонли мактабда яна ўқитувчи бўлиб фаолият кўрсата бошлади. Ташаббускорлиги, ёшларга эътиборлилиги туфайли мактабда уни 2018 йилдан ёшлар етакчиси вазифасига тайинлашди. Ёшлар тақдирига бефарқ бўлмаган фидойи етакчи дастлаб ишни таълим муассасаси ёшларининг муаммолари, фанларни ўзлаштириш даражаси, давомати, дарсликлар ва кутубхонадан фойдаланиш даражасини ўрганишдан бошлади. Мактабда ўқийдиган нотинч оилалар фарзандлари, тарбияси оғир ва носоғлом муҳитга тушиб қолган, дарсларни мунтазам қолдириб келаётган ўқувчиларни таълим жараёнига қайтаришга қаратилган тизимли ишларни йўлга қўйди.

Ёшларнинг жонкуярига айланган Н.Саидмуродова ўз фаолияти давомида қатор танловларда ўқувчиларнинг фаол иштирокини таъминлади. Ўқувчилар ҳам ўз навбатида туман ва Республика миқёсидаги ютуқларни қўлга киритиб, истеъдодларини юзага чиқардилар.  2018 йилда Ёшлар Иттифоқи туман Кенгаши қошидаги “Камалак” болалар ташкилоти томонидан  “Ватан, дўстлик ва бахтли болалик учун!” шиори остида ўтказилган XII анъанавий анжуманда йилнинг “Энг намунали бошланғич ташкилоти етакчиси” деб топилди. Спортнинг волейбол, баскетбол ва футбол турлари бўйича аёл-қизлар ўртасида ўтказилган мусобақаларда фахрли 1-, 2-ўринларни эгаллади. Туман миқёсида ўтказилган “Энг билимдон ёшлар етакчиси” танлови ғолиби бўлди ва туман ҳокимининг фахрий ёрлиғи билан тақдирланди. Ундан ташқари, турли семинарлар, форумларда ҳам фаол иштирок этиб, сертификатларга эга бўлди.

Фидойи етакчи ёшларнинг жамият тараққиётида фаол иштирок этиши, замонавий билимларни чуқур эгаллаган, ҳар томонлама етук инсонлар бўлиб вояга етишига ҳисса қўшиш мақсадида интилмоқда. Буни шарафли ва масъулиятли бурч деб билиб, бутун билими, маҳорати ва куч-ғайратни сарфламоқда.

 О.Худойберганова.