ЯГОНА ИНТЕРАКТИВ ДАВЛАТ ХИЗМАТЛАРИ ПОРТАЛИ ҲАҚИДА БИЛАСИЗМИ?

Интернетнинг турмушимиздан чуқур ўрин олиши жамият ҳаётидаги кўплаб муаммоларни ҳал қилишнинг самарали ва муқобил вариантларини амалиётга жорий этиш имконини бермоқда. Луғатимиз янги сўзлар, янги атамалар билан бойимоқда. Худди шундай сўзлардан бири — “maygovuz”дир. Бирор мурожаатингизга жавоб кечикаётган ёки қайсидир муаммонгиз ҳал қилинмаётган бўлса, одамлар “ана, maygovuz”га ёз. Уч кунда ҳал бўлади”, деган гапларни айтишмоқда. Бу сўз орқали шу кунларда тобора оммалашиб бораётган my.gov.uz — Ягона интерактив давлат хизматлари портали назарда тутилади.

Ягона портал — фойдаланувчиларнинг интерактив давлат хизматлари тўғрисидаги маълумотлардан эркин фойдаланишини, шунингдек электрон шаклда давлат хизматлари кўрсатишни таъминловчи Интернет тармоғидаги Ўзбекистон Республикасининг Ҳукумат порталидаги маълумот-ахборот порталидир. У ҳукумат томонидан ташкил етилган ва ҳукумат назорати остидаги дастурдир.

Ягона портал фойдаланувчилар томонидан интерактив давлат хизматларидан, шу жумладан пулли асосда эркин фойдаланиш мақсадида ташкил этилган. У қуйидаги вазифаларни бажаради:

- фойдаланувчиларга давлат органларига тўғридан-тўғри мурожаат қилиш учун имконият бериш;

- фойдаланувчиларни ахборот-коммуникация технологиялари соҳасидаги бошқа лойиҳалар билан интеграциялаш;

- фойдаланувчиларнинг давлат органлари билан ўзаро ҳамкорлиги самарадорлигини ошириш;

- давлат органларига мурожаат қилинганда фойдаланувчилар учун бюрократик тўсиқларни қисқартириш ва уларни бартараф этиш;

- «Электрон ҳукумат»ни янада ривожлантириш ва давлат бошқарувига замонавий ахборот технологияларини жорий этишда кўмаклашиш.

Порталдан қандай фойдаланилади?

Порталдан тўлақонли фойдаланиш ҳамда давлат органларига мурожаат қилиш учун энг аввало сиз порталда рўйхатдан ўтган бўлишингиз керак. Бунинг учун порталдаги логин орқали, ID.uz – Ягона идентификация тизимидан рўйхатдан ўтган бўлишингиз зарур. Шу билан бирга, бугунги кунда электрон рақамли имзо ва UzCard ёрдамида ҳам порталдан рўйхатдан ўтиш мумкин.

Маълумот учун:

Шу ўринда сизда ушбу порталда рўйхатдан ўтиш мураккабдек кўриниши ҳам мумкин. Aммо маълумки, “Жисмоний ва юридик шахсларнинг мурожаатлари тўғрисида”ги Қонунга биноан, жисмоний шахснинг фамилияси (исми, отасининг исми), унинг яшаш жойи тўғрисидаги маълумотлар ёки юридик шахснинг тўлиқ номи, унинг жойлашган ери (почта манзили) тўғрисидаги маълумотлар кўрсатилмаган ёхуд улар ҳақида ёлғон маълумотлар кўрсатилган, шунингдек, имзо (электрон рақамли имзо) билан тасдиқланмаган мурожаатлар аноним мурожаатлар деб ҳисобланади. Шунинг учун ҳам давлат порталидан фойдаланишда бир қатор расмиятчиликни бажариш талаб қилинади.

Биз сизга ID.uz – Ягона идентификация тизимидан рўйхатдан ўтиб қўйишни тавсия қиламиз. Чунки ушбу тизим сизга нафақат ҳукумат порталидан эмин-эркин фойдаланиш, айни пайтда миллий umail.uz почта тизимидан ҳам фойдаланиш имконини беради.

Сиз ID.uzдаги рақамингиз билан порталдан рўйхатдан ўтганингиздан сўнг, шахсий маълумотларингиз акс этган дарча пайдо бўлади. Сиз ушбу маълумотларни тасдиқлаб ёки таҳрир қилиб, “рухсат бериш”тугмасини босасиз.

“Менинг аризаларим” бўлимида Сиз юборган аризалар рўйхати, уларнинг ҳолати ва уларга берилган жавоб хатлари билан танишишингиз мумкин.

Мансур ТОЖИБОЕВ, туман Давлат хизматлари маркази бўлим бошлиғи.