“МАҲАЛЛАДА КАМБАҒАЛ ОИЛАЛАР СОНИНИ КАМАЙТИРИШ” ЛОЙИҲАСИ ДОИРАСИДА ТАДБИР ЎТКАЗИЛДИ

16 апрель куни Ўзбекистон Халқ демокатик партияси Марказий Кенгаши, Партиянинг Ўзбекистон Республикаси Олий Мажлис Қонунчилик палатасидаги фракцияси ва Қорақалпоғистон Республика Кенгаши билан ҳамкорликда “Маҳаллада камбағал оилалар сонини камайтириш” лойиҳаси доирасида амалий тадбир ўтказилди. Тафсилотлар дастлабки лавҳамизда.

Мамлакатимизда аҳоли муаммоларини ҳал этиш, янги иш ўринлари яратиш, камбағалликни қисқартиришда “Темир дафтар”, “Аёллар дафтари” ва “Ёшлар дафтари” жорий этилгани ижобий натижалар бермоқда. Олий Мажлис Қонунчилик палатасидаги Ўзбекистон Халқ демокатик партияси фракцияси аъзолари жойларда аҳоли билан ишлашнинг “маҳаллабай”, “фуқаробай” тизими ҳамда “Аёллар дафтари” ва “Ёшлар дафтари” бўйича амалга оширилаётган ишларни бевосита ўрганмоқда.

Бу борада Амударё туманида ҳам тизимли ишлар йўлга қўйилган. Ушбу дафтарларга киритилган фуқароларнинг муаммоларини ўрганиш, уларга амалий ёрдам кўрсатишга Халқ демократик партияси депутатлари ҳам ҳисса қўшишмоқда. Уларнинг бевосита кўмаги билан “Темир дафтар” ва “Аёллар дафтари”га киритилган аёллар, “Ёшлар дафтари”да рўйхатда турган ёшлар  иш билан таъминланиб, муаммолари ҳал этилмоқда.

Амударё туманига Ўзбекистон Республикаси Олий Мажлис Қонунчилик палатасидаги Ўзбекистон Халқ демокатик партияси фракцияси аъзолари Дилбар Мамаджанова, Қизилгул Қосимова, Ўзбекистон Халқ демократик партияси Қорақалпоғистон Республика Кенгаши раиси, Қорақалпоғистон Республикаси Жўқорғи Кенгесидаги Ўзбекистон Халқ демокатик партияси фракцияси раҳбари Халилла Ешимбетов ва бошқалар ташриф буюриб, аҳоли билан ишлашда “Маҳаллабай” ва “фуқаробай” шаклдаги ишларни ташкил қилиш бўйича мазкур партиядан сайланган барча даражадаги депутатларнинг амалий фаолияти билан танишиб чиқдилар.

Масъуллар туман ҳокими Султонбой Йўлдашев, Қорақалпоғистон Республикаси вазирлик ва идоралар, туман бўлимлари раҳбарлари, Халқ депутатлари Амударё туман Кенгашидаги партия гуруҳи аъзолари, партия ходимлари ҳамроҳлигида дастлаб Дўрман овулига ташриф буюрдилар. Овулдаги “Ёшлар дафтари”га киритилган ёшлар билан учрашиб, уларнинг истак ва мақсадлари билан танишдилар. Рўйхатдаги ишсиз ёшларнинг бандлигини таъминлаш мақсадида ҳудудда 5 ярим гектар ер 24 нафар ёшга 24 сотихдан бўлиб берилган бўлиб, масъуллар ушбу ерлардан фойдаланиш ҳолатини ўрганиб чиқдилар. Экин майдонларида айни пайтда деҳқончилик билан шуғулланаётган ёшларнинг режалари билан қизиқиб, уларга зарур тавсия ва маслаҳатлар бердилар.

Шундан сўнг, масъуллар тумандаги 2-сонли касб-ҳунар мактабидаги “Ёшлар дафтари”га киритилган ёшларни касбга ўргатиш марказига ташриф буюриб, муассасада яратилган шароитлар билан танишдилар. Марказда касб ўрганаётган ёшлар, уларга таълим бераётган устозлар билан бўлиб ўтган суҳбат чоғида таълим соҳасида давлатимиз раҳбарининг ташаббуси билан тизимли ишлар йўлга қўйилаётгани, соҳадаги ислоҳотларнинг самарадорлиги кўп жиҳатдан ўқитувчи-педагогларга боғлиқлиги таъкидланди.

Тадбир доирасида уйма-уй юриб фуқароларга манзилли ёрдам кўрсатиш, уларнинг қийнаб келаётган муаммоларини ўрганиш мақсадида масъуллар аҳоли хонадонларига ташриф буюрдилар. “Аёллар дафтари”га киритилган, ижтимоий ҳимояга муҳтож фуқаролар – Бой овул маҳалласида яшовчи  Бозоргул Чинниева, Чордара маҳалласидаги Комила Аминбоеваларнинг ҳолидан хабар олиниб, уларга зарур ёрдамлар кўрсатилди. Шунингдек, ногиронлиги бўлган Бозоргул Чинниева ҳамда болаликдан ногирон Комила Аминбоевага махсус аравачалар топширилди. Уларга партия рамзи туширилган совғалар ҳам берилди.

Шунингдек, масъуллар Янгиобод маҳалласида яшовчи “Темир дафтар” ва “Аёллар дафтари”да рўйхатда турган кам таъминланган фуқаролар Аноргул Эшниязова, Салтанат Ўрозбаева, Феруза Раҳимовалар хонадонларига ҳам ташриф буюриб, хонадон эгалари билан мулоқот қилдилар.  Ушбу аёлларга партия совғаларини топширдилар.

Ташриф тумандаги Хотира майдонида давом эттирилди. Тадбир иштирокчилари Хотира майдонида Ватан озодлиги учун қурбон бўлган аждодлар хотирасига ҳурмат бажо келтирдилар.

Тадбир доирасида Тош ёп овулидаги давлат-хусусий шерикчилик шаклидаги “Зебо Қиличбой” мактабгача таълим ташкилотига ташриф буюрилиб, муассасада болажонлар учун яратилган замонавий шарт-шароитлар билан танишдилар. Шундан сўнг, туман Тиббиёт бирлашмасига қарашли кўп тармоқли поликлиникада тиббий муассасанинг моддий-техник базаси, касалликларни эрта аниқлаш, тўғри ташхислаш ва даволаш услублари билан танишилди. Беморларга сифатли тиббий хизмат кўрсатиш ҳамда муассаса ходимларига, айни пайтда амалга оширилаётган вакцинация жараёнлари, эмланиш учун келган фуқароларга яратилган шароитлар ўрганилди. 

Муассаса ходимлари билан бўлган суҳбатда аҳоли саломатлигини сақлаш, тиббий-санитария ёрдами муассасалари фаолиятига мутлақо янги механизмларни жорий этиш, тиббий профилактика ишлари самарадорлигини янада ошириш орқали жамоат саломатлигини таъминлаш борасидаги тизимли ишлар тўғрисида сўз юритилди.

Масъуллар томонидан камбағалликни қисқартириш бўйича туманда амалга оширилган ишлар ўрганилиб, маҳаллий депутатларга самарадорликни янада ошириш бўйича маслаҳат ва тавсиялар берилди. “Темир дафтар”, “Аёллар дафтари”, “Ёшлар дафтари”га киритилган фуқаролар билан ўтказилган мулоқотларда кўтарилган масалаларни ҳал этиш бўйича ҳам тегишли вазифалар топширилди.

 Озода Худойберганова.