Ғаллазорда ёнғин чиқмасин!
Айни кунларда республикамизда ғалла ўрим-йиғими мавсуми қизғин тус олмоқда. Ушбу мавсум раҳбардан тортиб оддий деҳқонгача катта масъулият юклайди.
Шу мақсадда Ички ишлар вазирлиги томонидан ғалла ўрим-йиғими мавсумига тайёргарлик кўриш, етиштирилган ҳосилни сақлаш, йўл ҳаракати ва ёнғин хавфсизлигини таъминлаш борасида бир қатор ишлар амалга ошириб келинмоқда.
Туманимизда мавжуд машина-трактор паркидаги комбайн ва ёрдамчи техникалар ёнғин хавфсизлиги ходимлари томонидан кўрикдан ўтказилиб, камчиликлар бартараф этилмоқда. Ғаллани қабул қилиш, қуритиш ва қайта ишлаш корхоналарида ишлаётган мутахассислар мавсум давомида техникалар созлиги, ғалла маҳсулотлари сақланиши ва ишчиларнинг ёнғин хавфсизлиги қоидаларига риоя этишини қатъий назорат остига олишни белгилаб қўйишди. Ғаллазорларда ёнғин юзага келишининг олдини олиш учун қуйидаги ёнғин хавфсизлиги қоидаларига риоя этиш зарур:
- ғалла экилган майдонларга яқин жойдан автомобилда ўтаётган баъзи фуқаролар сигарета қолдиғини ўчирмасдан ташлаб юборишади. Бунинг олдини олиш учун темир йўллар, катта йўл ва дала йўлларига яқин жойлардаги ғалла майдони четидан 8 метр шудгорланиб, ғаллазорлар орқали ўтадиган дала йўлларида ғалла ўриб олингунча қатнов тўхтатиб қўйилиши мақсадга мувофиқдир;
- бевосита ғалла майдонларининг ўзида ҳаракатланаётган техникалар, транспорт воситаларидан чиққан учқун туфайли ёнғин келиб чиқиши эҳтимолдан холи эмас. Шу сабабли мавсумга жалб этилган барча техникаларга (комбайн, трактор, автомобиль ва бошқалар) учқун ўчиргичларининг созлиги текшириб кўрилгандан кейингина далага киришга рухсат бериш ва мавсум давомида уларнинг созлигини назорат қилиб бориш лозим;
- ёш болалар олов ёки гугурт ўйнаши натижасида ёнғин юзага келади. Шундай экан, улар ғаллазор атрофида мол боқиши, ўйнаши ва далага киришига йўл қўймаслик керак.
Баъзан фуқаролар ғалласи ўриб олинган майдонларга иккинчи экин экиш мақсадида далани сомон ва поялардан тозалаш учун атайлаб ўт қўйиб юборишади. Юзага келган аланга қўшни далалардаги ғалласи ўриб олинмаган майдонларга ҳам хавф солади. Шунинг учун ғалладан бўшаган майдонларда олов ёқиш таъқиқланади. Майдонларни тозалаш фақат шудгорлаш орқали амалга оширилиши ва буни жойлардаги мутасадди раҳбарлар назорат қилиб боришлари талаб этилади;
- ўрим-йиғим пайтида комбайннинг айланма механизмлари қизиб кетиши, уларга сомон ўралиб қолиши ҳам ёнғин чиқишга олиб келади. Комбайн ҳайдовчилари ўз техникалари ҳолатини назорат қилиб боришлари, вақти-вақти билан тўхтатиб, ўралиб қолган хас-ҳашаклардан тозалаб туришлари шарт. Бундан ташқари, ҳар бир техника бирламчи ёнғин ўчириш воситалари билан жиҳозланиши зарур;
- ёзнинг жазирама кунларида қовжираган хас-ҳашаклар, хусусан, сомон тез алангаланади. Ҳатто комбайн ўроқларининг бирор тош ёки металл бўлагига тегиб кетиши ҳам учқун чиқиб, ёнғин содир бўлишига олиб келади.
Бундай ҳолатнинг олдини олиш учун мавсум бошланишидан олдин комбайннинг ўзида иккита ёнғин ўчиргич, тўртта белкурак, олтита супурги, 2x2 метр ҳажмли кигиз ёки брезент, 40-100 литрли сиғимда сув, иккита челак бўлиши керак. Ўрилаётган ғаллазор четида эса омочли ҳайдов трактори шай туриши зарур;
- дон сақлаш омборлари ва хирмонларида ёнғин хавфи асосан электр тармоғининг носозлиги, ғалла юклаштушириш кичик механизмини ишлатиш, хирмон ҳудудида сигарета чекиш ва очиқ оловдан фойдаланиш оқибатида келиб чиқади.
Буни инобатга олиб, хирмон ҳудудидаги ёнғинга қарши қалқонларнинг ҳар бирида бирламчи ёнғин ўчириш воситаларидан камида иккита белкурак, металл илгак, болта ва қумли қути ўрин олиши лозим.
Юқорида қайд этилган талаблар ғалла ҳосили, бошқача айтганда, ризқ-рўзимизни ёнғин офатидан сақлаб қолишда муҳим омиллар ҳисобланади.
Х.МатЁҚубов,
туман ИИБ ЁХБ бошлиғи, майор.
(Фото - http://kun.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
