Ёнғин хавфсизлиги бўйича профилактик тадбирлар ўтказиляпти
Амударё туманида қурилиш ишларининг кенг кўламда олиб борилаётгани муносабати билан ёнғин хавфсизлиги талабларига риоя этилишини таъминлаш мақсадида туман Фавқулодда вазиятлар бўлими томонидан қатор амалий тадбирлар ташкил этилди.
Жумладан, туманда янгидан барпо этилаётган ижтимоий ва хусусий қурилиш объектларида мутахассислар иштирокида тарғибот-ташвиқот ишлари олиб борилди. Тадбирлар давомида қурилиш майдонларида ёнғин хавфсизлиги қоидаларининг бузилишига йўл қўймаслик, фуқароларнинг ва ишчи-ходимларнинг хавфсиз меҳнат фаолиятини таъминлашга алоҳида эътибор қаратилди.
Тушунтириш жараёнларида қурилиш майдонларида очиқ оловдан фойдаланмаслик, пайвандлаш ишлари фақат тегишли рухсатномага эга бўлган мутахассислар томонидан амалга оширилиши, белгиланмаган жойларда тамаки маҳсулотларини истеъмол қилиш тақиқланиши ҳақида маълумот берилди. Шу билан бирга, бирламчи ёнғин ўчириш воситаларининг мавжудлиги, сув манбаларига ёнғин ўчириш техникаси бемалол етиб бориши учун очиқ йўллар ташкил этилиши шартлиги таъкидланди.
Тадбир давомида вақтинчалик турар-жойлар, дам олиш хоналари ва ётоқхоналарда носоз электр ускуналаридан, қўлбола иситиш мосламалари ҳамда газ баллонлардан фойдаланиш қатъиян тақиқланиши тушунтирилди. Шунингдек, электр симларининг стандартга мувофиқ бўлиши ва хавфсиз жиҳатдан тортилиши лозимлиги қайд этилди.
Мутасаддилар томонидан ёнғин билан боғлиқ ҳар қандай ҳолат давлат аҳамиятига молик эканлиги, унинг оқибатида инсон ҳаётига хавф туғилиши, иқтисодий ва ижтимоий йўқотишлар келиб чиқиши мумкинлиги яна бир бор эслатиб ўтилди.
Мазкур профилактик тадбирлар туманда хавфсиз меҳнат муҳитини шакллантириш, ёнғиннинг олдини олиш ва жамоат хавфсизлигини таъминлашга хизмат қилиши билан аҳамиятлидир.
Рахат Худайбергенов,Амударё тумани ФВ бўлими профилактика ва назорат бўлинмаси катта инспектори, катта сержант.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
