Yongʻin xavfsizligi boʻyicha profilaktik tadbirlar oʻtkazilyapti

Amudaryo tumanida qurilish ishlarining keng koʻlamda olib borilayotgani munosabati bilan yongʻin xavfsizligi talablariga rioya etilishini taʼminlash maqsadida tuman Favqulodda vaziyatlar boʻlimi tomonidan qator amaliy tadbirlar tashkil etildi.

Jumladan, tumanda yangidan barpo etilayotgan ijtimoiy va xususiy qurilish obʼektlarida mutaxassislar ishtirokida targʻibot-tashviqot ishlari olib borildi. Tadbirlar davomida qurilish maydonlarida yongʻin xavfsizligi qoidalarining buzilishiga yoʻl qoʻymaslik, fuqarolarning va ishchi-xodimlarning xavfsiz mehnat faoliyatini taʼminlashga alohida eʼtibor qaratildi.

Tushuntirish jarayonlarida qurilish maydonlarida ochiq olovdan foydalanmaslik, payvandlash ishlari faqat tegishli ruxsatnomaga ega boʻlgan mutaxassislar tomonidan amalga oshirilishi, belgilanmagan joylarda tamaki mahsulotlarini isteʼmol qilish taqiqlanishi haqida maʼlumot berildi. Shu bilan birga, birlamchi yongʻin oʻchirish vositalarining mavjudligi, suv manbalariga yongʻin oʻchirish texnikasi bemalol yetib borishi uchun ochiq yoʻllar tashkil etilishi shartligi taʼkidlandi.

Tadbir davomida vaqtinchalik turar-joylar, dam olish xonalari va yotoqxonalarda nosoz elektr uskunalaridan, qoʻlbola isitish moslamalari hamda gaz ballonlardan foydalanish qatʼiyan taqiqlanishi tushuntirildi. Shuningdek, elektr simlarining standartga muvofiq boʻlishi va xavfsiz jihatdan tortilishi lozimligi qayd etildi.

Mutasaddilar tomonidan yongʻin bilan bogʻliq har qanday holat davlat ahamiyatiga molik ekanligi, uning oqibatida inson hayotiga xavf tugʻilishi, iqtisodiy va ijtimoiy yoʻqotishlar kelib chiqishi mumkinligi yana bir bor eslatib oʻtildi.

Mazkur profilaktik tadbirlar tumanda xavfsiz mehnat muhitini shakllantirish, yongʻinning oldini olish va jamoat xavfsizligini taʼminlashga xizmat qilishi bilan ahamiyatlidir.

Raxat Xudaybergenov,Amudaryo tumani FV boʻlimi profilaktika va nazorat boʻlinmasi katta inspektori, katta serjant.