СЕНАТНИНГ ЎН ТЎРТИНЧИ ЯЛПИ МАЖЛИСИДА КЎРИБ ЧИҚИЛГАН ҚОНУНЛАРНИ ТАРҒИБ ҚИЛИШ БЎЙИЧА ЙИҒИЛИШ ЎТКАЗИЛДИ

Ўзбекистон Республикаси Олий Мажлиси Сенатининг ўн тўртинчи ялпи мажлисида кўриб чиқилган масалаларнинг мазмун-моҳиятини кенг жамоатчиликка етказиш мақсадида Сенатнинг Оролбўйи минтақасини ривожлантириш бўйича қўмита раиси Ботир Матмуродов туманимизга ташриф буюрди.

Шу йил 7 май туман ҳокимлигида шу муносабат билан бўлиб ўтган йиғилишни туман ҳокими Султонбой Йўлдашев очди ва олиб борди. Йиғилишда Сенатнинг ўн тўртинчи ялпи мажлисида кўриб чиқилган масалалар кенг муҳокама қилиниб, масъулларнинг бу бўйича маърузалари, ҳисоботлари эшитилди.

Дастлаб Жиноий ишлар бўйича туман суди раиси Султонмурод Давлетмуродов “Ўзбекистон Республикасининг айрим қонун ҳужжатларига ўзгартишлар ва қўшимча киритиш тўғрисида”ги Ўзбекистон Республикаси Қонуни ҳамда Парламент юқори палатасининг ўн тўртинчи ялпи мажлисида Президентимизнинг айрим Фармонларини тасдиқлаш тўғрисидаги қарорлари мазмун-моҳияти тўғрисидаги маъруза қилди. Шунингдек, туман прокурори Жавлонбек Муфтуллаев прокуратура органларининг 2020 йилдаги фаолияти тўғрисидаги Ўзбекистон Республикаси Бош прокурорининг ҳисоботи билан таништирди. “Ўзбекистон Республикасида чет эл фуқароларининг ва фуқаролиги бўлмаган шахсларнинг ҳуқуқий ҳолати тўғрисида”ги, “Лицензиялаш, рухсат бериш ва хабардор қилиш тартиб-таомиллари тўғрисида”ги ҳамда “Ноширлик фаолияти тўғрисида”ги Ўзбекистон Республикаси Қонунлари мазмун-моҳияти тўғрисида эса туман Адлия бўлими бошлиғи Мўминжон Матюсупов ўз маърузасида батафсил сўз юритди.

Йиғилиш давомида туман ҳокимининг биринчи ўринбосари Маъмуржон Темирбоев “Аҳолини айрим турдаги озиқ-овқат маҳсулотлари билан таъминлашга доир чоралар тўғрисида”ги Ўзбекистон Республикаси Қонуни мазмун-моҳияти тўғрисида сўзлаб, Ўзбекистон Республикаси Ҳисоб палатасининг 2020 йилдаги фаолияти бўйича ҳисобот берди. Туман ҳокими ўринбосари, инвестиция ва ташқи савдо бўлими бошлиғи Рашид Салаев эса “Ўзбекистон Республикаси, бир томондан ва Буюк Британия ва Шимолий Ирландия, иккинчи томондан, ўртасида шерикчиликни таъсис этувчи шерикчилик ва ҳамкорлик тўғрисидаги Битимни ратификация қилиш ҳақида”ги Ўзбекистон Республикаси Қонуни мазмун-моҳияти тўғрисида кенг тўхталди.

Ундан ташқари, туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Жасур Норимов аҳолини ичимлик суви билан таъминлашга доир муаммолар юзасидан Вазирлар Маҳкамасига юборилган парламент сўрови натижалари хусусида маълумот берди. Хотин-қизлар тадбиркорлигини ривожлантириш учун яратилган шарт-шароитлар тўғрисида Вазирлар Маҳкамасига юборилган парламент сўрови натижалари тўғрисида эса туман ҳокими ўринбосари, Маҳалла ва оилани қўллаб-қувватлаш бўлими бошлиғи Алишер Йўлдошев маълумот бериб ўтди.

Шундан сўнг,  туман ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Маҳмуд Шерметов, 2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид Давлат дастурининг 2021 йилнинг биринчи чорагидаги ижроси бўйича Вазирлар Маҳкамасининг ҳисоботи, Агробанк туман филиали бошқарувчиси Нурбек Расулов Ўзбекистон Республикаси Марказий банки бошқаруви раисининг Ўзбекистон Республикаси Марказий банкининг 2020 йилдаги фаолиятига доир ҳисоботи билан таништирди.

Тиббиёт бирлашмаси бошлиғи Фахриддин Абдуллаев “Психиатрия ёрдами тўғрисида”ги, туман Санитария-эпидемиологик осойишталик маркази  бошлиғи Гулмурод Бекиев “Санитария-эпидемиология хизмати такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикаси Қонуни мазмун-моҳияти тўғрисида батафсил тушунчалар берди.

Йиғилишдан сўнг, масъуллар “Амударё томорқа хизмати” масъулияти чекланган жамияти ва “Амударё қурилиш материаллари” масъулияти чекланган жамиятининг аҳолига маиший ҳизмат кўрсатиш биносига ташриф буюрди. Мазкур ташкилотларда амалга оширилаётган кенг кўламли ишлар билан яқиндан танишдилар.

Чойкул овулида ўтказилган сайёр қабулда масъуллар фуқароларга қонунчиликдаги янгиликлар ва ўзгаришлар хусусида гапириб, ҳуқуқий тушунчаларини кенгайтирди. Шундан сўнг, аҳоли томонидан қилинган турли мурожаатлар тингланиб, уларнинг ижобий ҳал қилинишига кўмаклашилди. Ўрганиш ва муддат талаб қилинадиган мурожаатларга эса ечим топиш бўйича тегишли раҳбарларга топшириқлар берилди.  

О. Худойберганова.