SENATNING OʻN TOʻRTINChI YaLPI MAJLISIDA KOʻRIB ChIQILGAN QONUNLARNI TARGʻIB QILISh BOʻYIChA YIGʻILISh OʻTKAZILDI

Oʻzbekiston Respublikasi Oliy Majlisi Senatining oʻn toʻrtinchi yalpi majlisida koʻrib chiqilgan masalalarning mazmun-mohiyatini keng jamoatchilikka yetkazish maqsadida Senatning Orolboʻyi mintaqasini rivojlantirish boʻyicha qoʻmita raisi Botir Matmurodov tumanimizga tashrif buyurdi.

Shu yil 7-may tuman hokimligida shu munosabat bilan boʻlib oʻtgan yigʻilishni tuman hokimi Sultonboy Yoʻldashev ochdi va olib bordi. Yigʻilishda Senatning oʻn toʻrtinchi yalpi majlisida koʻrib chiqilgan masalalar keng muhokama qilinib, masʼullarning bu boʻyicha maʼruzalari, hisobotlari eshitildi.

Dastlab Jinoiy ishlar boʻyicha tuman sudi raisi Sultonmurod Davletmurodov “Oʻzbekiston Respublikasining ayrim qonun hujjatlariga oʻzgartishlar va qoʻshimcha kiritish toʻgʻrisida”gi Oʻzbekiston Respublikasi Qonuni hamda Parlament yuqori palatasining oʻn toʻrtinchi yalpi majlisida Prezidentimizning ayrim Farmonlarini tasdiqlash toʻgʻrisidagi qarorlari mazmun-mohiyati toʻgʻrisidagi maʼruza qildi. Shuningdek, tuman prokurori Javlonbek Muftullayev prokuratura organlarining 2020-yildagi faoliyati toʻgʻrisidagi Oʻzbekiston Respublikasi Bosh prokurorining hisoboti bilan tanishtirdi. “Oʻzbekiston Respublikasida chet el fuqarolarining va fuqaroligi boʻlmagan shaxslarning huquqiy holati toʻgʻrisida”gi, “Litsenziyalash, ruxsat berish va xabardor qilish tartib-taomillari toʻgʻrisida”gi hamda “Noshirlik faoliyati toʻgʻrisida”gi Oʻzbekiston Respublikasi Qonunlari mazmun-mohiyati toʻgʻrisida esa tuman Adliya boʻlimi boshligʻi Moʻminjon Matyusupov oʻz maʼruzasida batafsil soʻz yuritdi.

Yigʻilish davomida tuman hokimining birinchi oʻrinbosari Maʼmurjon Temirboyev “Aholini ayrim turdagi oziq-ovqat mahsulotlari bilan taʼminlashga doir choralar toʻgʻrisida”gi Oʻzbekiston Respublikasi Qonuni mazmun-mohiyati toʻgʻrisida soʻzlab, Oʻzbekiston Respublikasi Hisob palatasining 2020-yildagi faoliyati boʻyicha hisobot berdi. Tuman hokimi oʻrinbosari, investitsiya va tashqi savdo boʻlimi boshligʻi Rashid Salayev esa “Oʻzbekiston Respublikasi, bir tomondan va Buyuk Britaniya va Shimoliy Irlandiya, ikkinchi tomondan, oʻrtasida sherikchilikni taʼsis etuvchi sherikchilik va hamkorlik toʻgʻrisidagi Bitimni ratifikatsiya qilish haqida”gi Oʻzbekiston Respublikasi Qonuni mazmun-mohiyati toʻgʻrisida keng toʻxtaldi.

Undan tashqari, tuman hokimining sanoatni rivojlantirish, kapital qurilish, kommunikatsiyalar va kommunal xoʻjalik masalalari boʻyicha oʻrinbosari Jasur Norimov aholini ichimlik suvi bilan taʼminlashga doir muammolar yuzasidan Vazirlar Mahkamasiga yuborilgan parlament soʻrovi natijalari xususida maʼlumot berdi. Xotin-qizlar tadbirkorligini rivojlantirish uchun yaratilgan shart-sharoitlar toʻgʻrisida Vazirlar Mahkamasiga yuborilgan parlament soʻrovi natijalari toʻgʻrisida esa tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev maʼlumot berib oʻtdi.

Shundan soʻng,  tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Mahmud Shermetov, 2017–2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid Davlat dasturining 2021-yilning birinchi choragidagi ijrosi boʻyicha Vazirlar Mahkamasining hisoboti, Agrobank tuman filiali boshqaruvchisi Nurbek Rasulov Oʻzbekiston Respublikasi Markaziy banki boshqaruvi raisining Oʻzbekiston Respublikasi Markaziy bankining 2020-yildagi faoliyatiga doir hisoboti bilan tanishtirdi.

Tibbiyot birlashmasi boshligʻi Faxriddin Abdullayev “Psixiatriya yordami toʻgʻrisida”gi, tuman Sanitariya-epidemiologik osoyishtalik markazi  boshligʻi Gulmurod Bekiyev “Sanitariya-epidemiologiya xizmati takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Qonuni mazmun-mohiyati toʻgʻrisida batafsil tushunchalar berdi.

Yigʻilishdan soʻng, masʼullar “Amudaryo tomorqa xizmati” masʼuliyati cheklangan jamiyati va “Amudaryo qurilish materiallari” masʼuliyati cheklangan jamiyatining aholiga maishiy hizmat koʻrsatish binosiga tashrif buyurdi. Mazkur tashkilotlarda amalga oshirilayotgan keng koʻlamli ishlar bilan yaqindan tanishdilar.

Choykul ovulida oʻtkazilgan sayyor qabulda masʼullar fuqarolarga qonunchilikdagi yangiliklar va oʻzgarishlar xususida gapirib, huquqiy tushunchalarini kengaytirdi. Shundan soʻng, aholi tomonidan qilingan turli murojaatlar tinglanib, ularning ijobiy hal qilinishiga koʻmaklashildi. Oʻrganish va muddat talab qilinadigan murojaatlarga esa yechim topish boʻyicha tegishli rahbarlarga topshiriqlar berildi.  

O. Xudoyberganova.