Очиқ сайёр суд мажлисида 21 нафар ҳуқуқбузарга нисбатан маъмурий жазолар тайинланди

Сўнгги йилларда мамлакатимизда суд-ҳуқуқ тизимида олиб борилаётган ислоҳотлар ушбу тизим фаолиятини сифат жиҳатидан янги босқичга кўтаришга, одамларнинг одил судловга бўлган ишончини янада мустаҳкамлашга хизмат қилмоқда. Зеро, инсон ҳуқуқлари ва эркинликларини амалга ошириш, қонун устуворлиги ғоясини ҳаётга татбиқ этишни таъминловчи асосий механизм бўлмиш мустақил суд ҳокимиятини шакллантириш ва такомиллаштириш мамлакатимизда давлат томонидан олиб борилаётган ҳуқуқий сиёсатнинг асосидир. Бугунги кунда суд жараёнлари нафақат идоравий, балки кўчма, очиқ сайёр суд мажлислари шаклларида олиб борилаётгани аҳоли ва тадбиркорларнинг муаммоли масалаларини жойида ҳал этиб, адолатни қарор топтиришда муҳим аҳамият касб этмоқда.

Ана шундай очиқ сайёр суд мажлисларидан бири яқинда Амударё тумани Давлат солиқ инспекцияси биносида ҳам ўтказилди. Жиноят ишлари бўйича Бўзатов туман судининг тергов судьяси Қайрат Кипшақбаев раислигида ўтказилган мазкур очиқ сайёр суд мажлисида бир қатор маъмурий ишлар ҳуқуқбузарлик ҳолатларини содир этган шахслар, уларнинг қонуний вакиллари ва яқинлари иштирокида кўриб чиқилди.

Сайёр суд мажлисида оилавий, яъни маиший зўравонлик, майда безорилик, жумладан жамоат жойларида уятли сўзлар билан сўкиниш, фуқароларга ҳақоратомуз шилқимлик қилиш ҳамда жамоат тартибини ва фуқароларнинг осойишталигини бузувчи хатти-ҳаракатларда ифодаланган жамиятда юриш-туриш қоидаларини қасддан менсимаслик ҳолатлари бўйича маъмурий ишлар атрофлича муҳокама этилди ва ҳуқуқбузар шахсларга нисбатан суд томонидан маъмурий чоралар қўлланилиб, уларга бундан кейин қонунларга риоя этиш ва уларни ҳурмат қилиш бўйича зарур ҳуқуқий тушунчалар берилди.

Шунингдек, очиқ сайёр суд мажлиси жараёнида савдо ва хизмат кўрсатиш қоидаларини бузиш, тадбиркорлик фаолиятини давлат рўйхатидан ўтмасдан амалга ошириш, солиқлар ёки йиғимларни тўлашдан бўйин товлаш, моддий ёрдамга муҳтож бўлган вояга етмаган ва меҳнатга лаёқатсиз шахсни моддий таъминлашдан бўйин товлаш, уларни моддий жиҳатдан таъминлаш учун суднинг ҳал қилув қарорига ёки суд буйруғига биноан ундирилиши лозим бўлган маблағни икки ойдан ортиқ муддат мобайнида тўламаслик билан боғлиқ ҳолатлар юзасидан ҳуқуқбузарларга нисбатан очилган маъмурий ишлар ҳам очиқлик ва шаффофлик тамойиллари асосида кўриб чиқилди.

Бундан ташқари, очиқ сайёр суд жараёнида совуқ қурол сифатида фойдаланилиши мумкин бўлган ашёларни улардан касбий фаолиятда, спорт фаолиятида ҳамда хўжалик-маиший мақсадларда фойдаланиш билан боғлиқ бўлган ҳолларда жамоат жойларида очиқ, яъни ғилофсиз ҳолда олиб юриш, ички ишлар органлари ходимининг қонуний талабларини бажармаслик, тазйиқ ўтказган ва зўравонлик содир этган ёхуд уларни содир этишга мойил бўлган шахс томонидан ҳимоя ордери талабларини бажармаслик билан боғлиқ ҳуқуқбузарликларни содир этган шахсларнинг қилмишлари ҳам атрофлича муҳокама этилиб, қонуний асосда чоралар кўрилди.

Очиқлик ва ошкоралик тарзида ўтказилган очиқ сайёр суд мажлиси жараёнида жами 21 нафар шахсга нисбатан қўзғатилган маъмурий ҳуқуқбузарлик тўғрисидаги ишлар кўриб чиқилди ва ҳуқуқбузарларни Ўзбекистон Республикаси қонунларига нисбатан ҳурмат руҳида тарбиялаш, қайтадан ҳуқуқбузарлик содир этишларининг олдини олиш мақсадида суд томонидан уларга Маъмурий жавобгарлик тўғрисидаги кодекснинг тегишли моддаларига асосан жарима ва маъмурий қамоқ жазолари тайинланди.

Робия Йўлдошева