ЭНДИЛИКДА ОИЛА – МАКТАБ – МАҲАЛЛА ТИЗИМИДА МАЪНАВИЙ ТАРБИЯ УЗВИЙЛИГИ ТАЪМИНЛАНАДИ

Маънавий баркамол инсонни тарбиялаш, инсон – табиатнинг, барча мавжудотнинг гултожи эканлигини ўсиб келаётган ёш авлод онгига сингдириш таълим-тарбия соҳасининг устувор  йўналиши ҳисобланади. Чунки жамики моддий нарсалар инсонга жисмоний озиқ ва қувват берса, маънавият унга руҳий озиқ ва қудрат бағишлайди. Муҳтарам Президентимиз Ш..Мирзиёев таъбири билан айтганда: “Ҳар қайси давлат ҳар қайси халқ интеллектуал салоҳияти, юксак маънавияти билан қудратлидир”.

Шу нуқтаи назардан келиб чиқиб айтиш жоизки, мамлакатимизда амалга оширилаётган кенг қамровли ислоҳотлар ва бунёдкорлик ишлари, халқимиз онг-у тафаккури ва дунёқарашидаги ўзгаришлар ҳам албатта, маънавий-маърифий тарғибот ишларининг самарасидир. Бу борадаги ишларни янада юксак поғонага кўтариш, маънавий-маърифий соҳадаги ишлар самарадорлигини янада оширишда яхлит тизимни йўлга қўйиш орқали мамлакатимизда ҳуқуқий давлат, фуқаролик жамиятини барпо этишда “Миллий тикланишдан – миллий юксалиш сари” деган ҳаётбахш ғоянинг аҳамиятини ҳар бир инсон қалбига сингдириш мақсадида Ўзбекистон Республикаси Президентининг 2021 йил 26 мартда “Маънавий-маърифий ишлар тизимини тубдан такомиллаштириш чора-тадбирлари тўғрисида”ги Қарори қабул қилинди. Ушбу Қарор ижросини таъминлаш, ёшларни баркамол инсонлар этиб тарбиялаш, уларни мамлакатимизда олиб борилаётган ислоҳотларнинг фаол иштирокчисига айлантиришга қаратилган чора-тадбирларни изчил амалга ошириш мақсадида Ўзбекистон Республика Халқ таълими Вазирлиги, Республикаси Маънавият ва маърифат маркази, Ўзбекистон Ёзувчилар уюшмаси ва Ўзбекистон Журналистлари ижодий уюшмасининг Қарорига кўра, 2021 йилнинг 1 апрелидан ҳар бир умумтаълим мактабида 0,5 штат  бирлигида ижодий-маданий масалалар бўйича тарғиботчи лавозими жорий этилди.

Туманимиз умумтаълим муассасаларида ҳам ижодий-маданий масалалар бўйича тарғиботчи лавозимига туманимизда яшаб, ижод этаётган таниқли шоир, ёзувчи ва журналистлар, “Тараққиёт кўзгуси” газетаси таҳририяти ҳузуридаги “Жайхун илҳомлари” ННТ аъзолари, ижодий салоҳиятга эга бўлган она тили ва адабиёт ўқитувчилари бириктирилди.

Айни пайтда умумий ўрта таълим муассасаларида ижодий-маданий масалалар бўйича тарғиботчилар ўз фаолиятини бошлашди. Хусусан, тумандаги 87 та умумтаълим мактабларида ёшлар китобхонлигини, миллий-маънавий қадриятларни ривожлантириш, Президентимиз Қарорида белгилаб қўйилган эл юрт тақдирига лоқайдлик, маҳаллийчилик, уруғ-аймоқчилик, коррупция, оилавий қадриятларга беписландлик ва ёшлар тарбиясига масъулиятсизлик каби иллатларга барҳам беришга қаратилган чора-тадбирлар режалари ишлаб чиқилиб, оила, таълим ташкилотлари, ҳар бир маҳалла ва кўчада маънавий тарбиянинг узвийлигини таъминлашга қаратилган амалий ишлар бошлаб юборилди.

Шу кунларда фашизм устидан қозонилган Ғалабанинг 76 йиллиги ва 9 май – Хотира ва қадрлаш куни муносабати билан ҳар бир ўрта таълим муассасасида иккинчи жаҳон уруши йилларида фронт ортида меҳнат қилиб, фидойилик намуналарини кўрсатган нуроний отахон ва онахонлар ҳамда Афғонистон урушида иштирок этган собиқ жангчи-фахрийлари билан ёшларнинг учрашувлари ташкил этилмоқда. Бу учрашувларда тинчликнинг қадри, ўзаро меҳр-оқибат, мустақиллик ғояларига садоқат, дўстлик ва бағрикенглик каби қадриятларга алоҳида аҳамият қаратилиб, ёшлар онгида соғлом дунёқараш ва бунёдкорликни умуммиллий ҳаракатга айлантириш мавзуларига алоҳида урғу берилмоқда.

Шуни алоҳида эътироф этиш керакки, эндиликда оила – таълим муасссасаси – маҳалла тизимида амалга ошириладиган “Миллий тикланишдан – миллий юксалиш сари” ғоясини кенг тарғиб қилиш, орқали жамиятда соғлом дунёқараш ва бунёдкорликни умуммиллий ҳаракатга айлантиришда ўрта таълим муассасаларидаги ижодий-маданий масалалар бўйича тарғиботчи мутахассислари янада фаоллик кўрсатиб ишлашлари талаб этилади.

Отабек ЙЎЛДОШЕВ, Республика Маънавият ва маърифат Маркази Амударё туман бўлими раҳбари.