ENDILIKDA OILA – MAKTAB – MAHALLA TIZIMIDA MAʼNAVIY TARBIYa UZVIYLIGI TAʼMINLANADI

Maʼnaviy barkamol insonni tarbiyalash, inson – tabiatning, barcha mavjudotning gultoji ekanligini oʻsib kelayotgan yosh avlod ongiga singdirish taʼlim-tarbiya sohasining ustuvor  yoʻnalishi hisoblanadi. Chunki jamiki moddiy narsalar insonga jismoniy oziq va quvvat bersa, maʼnaviyat unga ruhiy oziq va qudrat bagʻishlaydi. Muhtaram Prezidentimiz Sh..Mirziyoyev taʼbiri bilan aytganda: “Har qaysi davlat har qaysi xalq intellektual salohiyati, yuksak maʼnaviyati bilan qudratlidir”.

Shu nuqtai nazardan kelib chiqib aytish joizki, mamlakatimizda amalga oshirilayotgan keng qamrovli islohotlar va bunyodkorlik ishlari, xalqimiz ong-u tafakkuri va dunyoqarashidagi oʻzgarishlar ham albatta, maʼnaviy-maʼrifiy targʻibot ishlarining samarasidir. Bu boradagi ishlarni yanada yuksak pogʻonaga koʻtarish, maʼnaviy-maʼrifiy sohadagi ishlar samaradorligini yanada oshirishda yaxlit tizimni yoʻlga qoʻyish orqali mamlakatimizda huquqiy davlat, fuqarolik jamiyatini barpo etishda “Milliy tiklanishdan – milliy yuksalish sari” degan hayotbaxsh gʻoyaning ahamiyatini har bir inson qalbiga singdirish maqsadida Oʻzbekiston Respublikasi Prezidentining 2021-yil 26-martda “Maʼnaviy-maʼrifiy ishlar tizimini tubdan takomillashtirish chora-tadbirlari toʻgʻrisida”gi Qarori qabul qilindi. Ushbu Qaror ijrosini taʼminlash, yoshlarni barkamol insonlar etib tarbiyalash, ularni mamlakatimizda olib borilayotgan islohotlarning faol ishtirokchisiga aylantirishga qaratilgan chora-tadbirlarni izchil amalga oshirish maqsadida Oʻzbekiston Respublika Xalq taʼlimi Vazirligi, Respublikasi Maʼnaviyat va maʼrifat markazi, Oʻzbekiston Yozuvchilar uyushmasi va Oʻzbekiston Jurnalistlari ijodiy uyushmasining Qaroriga koʻra, 2021-yilning 1-aprelidan har bir umumtaʼlim maktabida 0,5 shtat  birligida ijodiy-madaniy masalalar boʻyicha targʻibotchi lavozimi joriy etildi.

Tumanimiz umumtaʼlim muassasalarida ham ijodiy-madaniy masalalar boʻyicha targʻibotchi lavozimiga tumanimizda yashab, ijod etayotgan taniqli shoir, yozuvchi va jurnalistlar, “Taraqqiyot koʻzgusi” gazetasi tahririyati huzuridagi “Jayxun ilhomlari” NNT aʼzolari, ijodiy salohiyatga ega boʻlgan ona tili va adabiyot oʻqituvchilari biriktirildi.

Ayni paytda umumiy oʻrta taʼlim muassasalarida ijodiy-madaniy masalalar boʻyicha targʻibotchilar oʻz faoliyatini boshlashdi. Xususan, tumandagi 87 ta umumtaʼlim maktablarida yoshlar kitobxonligini, milliy-maʼnaviy qadriyatlarni rivojlantirish, Prezidentimiz Qarorida belgilab qoʻyilgan el yurt taqdiriga loqaydlik, mahalliychilik, urugʻ-aymoqchilik, korruptsiya, oilaviy qadriyatlarga bepislandlik va yoshlar tarbiyasiga masʼuliyatsizlik kabi illatlarga barham berishga qaratilgan chora-tadbirlar rejalari ishlab chiqilib, oila, taʼlim tashkilotlari, har bir mahalla va koʻchada maʼnaviy tarbiyaning uzviyligini taʼminlashga qaratilgan amaliy ishlar boshlab yuborildi.

Shu kunlarda fashizm ustidan qozonilgan Gʻalabaning 76 yilligi va 9-may – Xotira va qadrlash kuni munosabati bilan har bir oʻrta taʼlim muassasasida ikkinchi jahon urushi yillarida front ortida mehnat qilib, fidoyilik namunalarini koʻrsatgan nuroniy otaxon va onaxonlar hamda Afgʻoniston urushida ishtirok etgan sobiq jangchi-faxriylari bilan yoshlarning uchrashuvlari tashkil etilmoqda. Bu uchrashuvlarda tinchlikning qadri, oʻzaro mehr-oqibat, mustaqillik gʻoyalariga sadoqat, doʻstlik va bagʻrikenglik kabi qadriyatlarga alohida ahamiyat qaratilib, yoshlar ongida sogʻlom dunyoqarash va bunyodkorlikni umummilliy harakatga aylantirish mavzulariga alohida urgʻu berilmoqda.

Shuni alohida eʼtirof etish kerakki, endilikda oila – taʼlim muasssasasi – mahalla tizimida amalga oshiriladigan “Milliy tiklanishdan – milliy yuksalish sari” gʻoyasini keng targʻib qilish, orqali jamiyatda sogʻlom dunyoqarash va bunyodkorlikni umummilliy harakatga aylantirishda oʻrta taʼlim muassasalaridagi ijodiy-madaniy masalalar boʻyicha targʻibotchi mutaxassislari yanada faollik koʻrsatib ishlashlari talab etiladi.

Otabek YOʻLDOShEV, Respublika Maʼnaviyat va maʼrifat Markazi Amudaryo tuman boʻlimi rahbari.