ҚОРАҚАЛПОҒИСТОН ИЖТИМОИЙ-ИҚТИСОДИЙ ЖИҲАТДАН ЯНАДА РИВОЖЛАНАДИ

Охирги йилларда Давлатимиз раҳбари томонидан республикамиз худудларига ташрифи муносабати билан Қорақалпоғистон Республикасининг равнақи, ижтимоий-иқтисодий ривожланиши учун замин бўладиган норматив-ҳуқуқий ҳужжатлар қабул қилиниши натижасида ҳар бир соҳага, ҳаттоки энг чекка туман ва қишлоқларгача янгиланишлар, замонавий бошқарув услуби ва технологиялар, чет эл инвестициялари кириб бормоқда. Жумладан, 2020 йилнинг 11 ноябрь кунги Ўзбекистон Республикаси Президентининг “2020-2023 йилларда Қорақалпоғистон Республикасини комплекс ижтимоий-иқтисодий ривожлантириш чора-тадбирлари тўғрисида”ги Қарори ҳам Қорақалпоғистон Республикасининг мавжуд ижтимоий-иқтисодий, шу жумладан ишлаб чиқариш ва инвестиция салоҳиятидан самарали фойдаланиш, ҳудудда муҳандислик-коммуникация, ижтимоий ва ишлаб чиқариш инфратузилмаларини яхшилаш, иқтисодиёт тармоқларини барқарор ривожлантириш, шу асосда аҳоли бандлигини таъминлаш ва турмуш даражасини ошириш мақсадида қабул қилинди.

Мазкур қарорда 21 та давлат мактабгача таълим ташкилоти, 400 та оилавий мактабгача таълим ташкилоти биноларини қуриш, 55 тасини реконструкция қилиш ва мукаммал таъмирлаш, 20 та мактабгача таълим ташкилотини давлат-хусусий шериклик асосида ташкил этиш, 7 та умумий ўрта таълим мактабини қуриш, 101 та мактабни реконструкция қилиш ва мукаммал таъмирлаш, шу асосда умумий ўрта таълим мактабларида ўқувчи ўрни коэффициенти 1,1 фоиздан ошиб кетмаслигини таъминлаш белгиланди.

Шунингдек, Қарор билан 1-иловага мувофиқ Қорақалпоғистон Республикаси шаҳар ва туманларининг ўсиш нуқталари («драйвер» соҳалари) тасдиқланган. Бундан ташқари, Президент қарорида айрим ҳудудларда ва айрим йўналишларда янгидан ташкил этиладиган тадбиркорларга бир қатор имтиёзлар белгиланган.

Жумладан,   Қорақалпоғистон Республикаси туманларининг ўзига хос «ўсиш нуқтаси» деб белгиланган иқтисодий фаолият йўналишлари бўйича янгидан ташкил қилинган тадбиркорлик субъектлари 2024 йил 1 январга қадар ер солиғи, мол-мулк солиғи, кичик корхоналар айланмасидан олинадиган солиқ, якка тартибдаги тадбиркорларнинг қатъий миқдордаги даромад солиғини тўлашдан озод қилинди.

Ижтимоий-иқтисодий жиҳатдан ривожланиш даражаси паст бўлган Тахтакўпир, Бўзатов ва Шуманай туманларида янгидан ташкил этиладиган саноат йўналишидаги тадбиркорлик субъектлари 2024 йил 1 январга қадар ер солиғи, мол-мулк солиғи, кичик корхоналар айланмасидан олинадиган солиқ, якка тартибдаги тадбиркорларнинг қатъий миқдордаги даромад солиғини тўлашдан озод қилинади. Фойда солиғи ва сув солиғи тўловини амалдаги белгиланган солиқ ставкаларининг 50 фоизи миқдорида амалга оширади. Қорақалпоғистон Республикасида шароити оғир 45 та маҳалла ва овулда янгидан ташкил этиладиган хизмат кўрсатиш йўналишидаги тадбиркорлик субъектларига 2026 йил 1 январга қадар фойда солиғи, ер солиғи, мол-мулк солиғи, кичик корхоналар айланмасидан олинадиган солиқ, якка тартибдаги тадбиркорларнинг қатъий миқдордаги даромад солиғини тўлашдан озод қилиш имтиёзи қўлланилади.
Бизнес-лойиҳаларни амалга ошириш мақсадида миллий валютада олинадиган банк кредитлари фоиз ставкасининг бир қисмини қоплаш учун Марказий банк асосий ставкасининг 50 фоизи миқдорида Тадбиркорликни қўллаб-қувватлаш жамғармаси ҳисобидан компенсация берилади.

Мақолада қайд қилиб ўтилган маълумотлар Қарорнинг бир қисминигина ёритиш имконини беради. Қарорнинг тўлиқ матни мазмун ва ҳажм жиҳатдан кенг қамровли бўлиб, уни бир мақола билан қамраб олиш мушкул, албатта. Қарорда белгиланган вазифа ва чора-тадбирлар ижроси амалда таъминланса, юртимиз янада равнақ топади.

М.Матюсупов, туман Адлия бўлими бошлиғи.