Ғалладан бўшаган ер майдонларига такрорий экинлар экилмоқда

Мамлакатимизда аҳолининг озиқ-овқат маҳсулотларига бўлган талабини тўла қондириш, бозорларда қишлоқ хўжалиги маҳсулотлари нархларининг барқарорлигини таъминлаш, қиш-баҳор ойлари учун маҳсулотлар захирасини яратишга алоҳида эътибор қаратилмоқда. Шу мақсадда жорий йилги мавсумда бошоқли дон экинларидан бўшайдиган майдонларга озиқ-овқат экинларининг тезпишар навларини такрорий экин сифатида қисқа муддатларда экиш, агротехника тадбирларини ўз муддатларида ўтказиш, уларга талаб этиладиган моддий-техника ресурсларини етказиб бериш ва етиштирилган ҳосилни нес-нобуд қилмасдан йиғиб-териб олиш борасида қатор амалий ишлар қилинмоқда.

Амударё туманида ҳам 2021 йил ҳосили учун ғалладан бўшайдиган майдонларга такрорий экинлар экишни ташкил этиш ҳамда аҳоли бандлигини таминлаш мақсадида ер майдонларини ажратиб бериш юзасидан амалий ишлар қилинмоқда. Жорий йилнинг 12 июнь куни тумандаги Оқ олтин овулидаги ғалладан бўшаган ер майдонлари “Темир дафтар”га, “Аёллар дафтари” ва “Ёшлар дафтари”га киритилган эҳтиёжманд оилалар, ёрдамга муҳтож аёллар ҳамда банд бўлмаган ёшларга такрорий экинлар экиб, ердан унумли фойдаланиш мақсадида ажратиб берилди.

Айтиш керакки, туманда озиқ-овқат хавфсизлигини таъминлаш мақсадида 2021 йил ҳосили учун экилган ғалла майдонларидан бўшайдиган майдонларнинг 3300 гектарига такрорий экинлар экиш режалаштирилган бўлиб, такрорий экинларни экиш ва маҳсулот етиштириш учун талаб этиладиган уруғлик, минерал ўғит, ёқилғи мойлаш материаллари ва кредит маблағлари учун жами 16 851 млн сўмлик пул маблағлари зарур бўлади.

Мазкур 3300 гектар ер майдонларида экспортбоп ва бозорбоп такрорий экинлар экиш ҳамда шу орқали 11550 нафар ишсиз, “Темир дафтар”, “Ёшлар дафтари” ва “Аёллар дафтари”га киритилган, ер олиб, деҳқончилик қилиш истаги бўлган аҳоли вакилларининг рўйхати шакллантирилди. Шундан 9075 нафари мавсумий иш билан таъминланадиган ишчилар, 2475 нафари “Темир дафтар”, “Ёшлар дафтари” ва “Аёллар дафтари”га киритилган эҳтиёжманд аҳоли ҳисобланади.

Қолаверса, 2475 нафар эҳтиёжманд аҳолига жами 495 гектар (ҳар бирига ўртача 20 сотих) ер майдонлари ажратиб берилиши ҳамда бандлиги таъминланиши режалаштирилган. Шундан такрорий экин экиладиган ер майдонларининг 1-сектор ҳудудида 124,8 гектари, 2-сектор ҳудудида 149,8 гектари, 3-сектор ҳудудида 161,4 гектари, 4-сектор ҳудудида 59 гектари эҳтиёжманд аҳолига бериладиган ер майдонлари ҳисобланади.

Шунингдек, ғалладан бўшайдиган ер майдонларини такрорий экиш учун аҳолига бериш орқали 1-сектор ҳудудидаги 2860 нафар, 2-сектор ҳудудидаги 3206 нафар, 3-сектор ҳудудидаги 3974 нафар, 4-сектор ҳудудидаги 1510 нафар юртдошларимиз иш билан таъминланади. Шундан жами 2475 нафари эҳтиёжманд аҳоли сонига, 9075 нафари мавсумий ишчилар сонига тўғри келади. Хусусан, Оқ олтин овули ҳудудидаги “Кенжаева Шаҳло” фермер ҳўжалигида 3 гектар ғалладан бўшаган ер майдони 15 нафар ёшларга ажратиб берилди. Ажратилган ер майдонларида мош экилди.

Таъкидлаш жоизки, бугун мамлакатимиз аҳолиси сони ортиб бориши билан бир қаторда унинг меҳнат бандлигини таъминлаш масаласи ҳам долзарб аҳамият касб этмоқда. Ишсизлик муаммосини ҳал этишга қаратилган чора-тадбирлар эса бу борада қатор ижобий натижалар бермоқда. Айниқса, ишсиз ёшларнинг бандлигини таъминлаш борасидаги ишлар яққол кўзга ташланмоқда.

 Бандликни таъминлашда энг катта захиралардан бири деҳқончилик қилиш учун ер ажратишдир. Шу мақсадда жойларда экин ерларидан ёшларга деҳқончилик учун ажратиш тартиби жорий этилмоқда. Шунингдек, қудуқлар қазиб, захира ерларни ёшларга фойдаланиш учун бериш, томорқада лимончилик, паррандачилик, қуёнчилик, асаларичилик қилишлари учун кредитлар ажратиш орқали ҳам ёшлар бандлиги таъминланмоқда.

Чарос Арслонова, туман ҳокимлигининг Аҳборот хизмати раҳбари.