«Аёллар дафтари»да рўйхатда турган 29 нафар хотин-қизлар Бухоро шаҳрига саёҳатга юборилди

Мамлакатимизда аёл-қизларнинг ролини ошириш, уларнинг жамият ҳаётидаги фаол иштирокини таъминлаш, уларни ўйлантираётган муаммоларни ўрганиш ва ҳал қилишнинг ўзига хос янги тизими яратилиб, ҳудудларда “Аёллар дафтари” шакллантирилди. Ушбу дафтарга қўллаб-қувватлашга муҳтож, ишсиз аёллар киритилди ва манзилли ишларни амалга ошириш йўлга қўйилди. Ҳеч бир аёл-қиз давлат эътиборидан четда қолиб кетмаслигини таъминлаш мақсадида бу масъулиятли ишга Ўзбекистон касаба уюшмалари федерацияси, Маҳалла ва оилани қўллаб-қувватлаш вазирлиги, Ўзбекистон ёшлар ишлари агентлиги каби қатор ҳамкор ташкилотларнинг бириктирилди.

Амударё туманида ҳам “Вақтинчалик тартиб” асосида ҳар бир секторлар кесимида маҳаллабай “Аёллар дафтари”га 30 ёшдан ошган 1832 нафар аёллар киритилган. Шу пайтга қадар “Аёллар дафтари”га киритилган 1473 нафар хотин-қизларга амалий ёрдамлар кўрсатилган. Ишга муҳтож, ишсиз 567 нафар аёлларнинг бандлиги таъминланди. Касб-ҳунарга 225 нафар хотин-қизлар қайта ўқитилди, томорқадан фойдаланишни йўлга қўйиш учун 55 нафар, тадбиркорлик қилиши учун кредит олишда 398 нафар аёлларга амалий ёрдамлар кўрсатилди.

Бундан ташқари, 173 нафар боқувчисини йўқотган эҳтиёжманд аёллар, 65 нафар ижтимоий ёрдамга муҳтож 1- ва 2-гуруҳ ногиронлиги бўлган аёлларга, 19 нафар қарамоғида ногирон фарзанди бўлган аёлларимизга моддий ёрдамлар ажратилди.

16-18 июнь кунлари туманимиздан «Аёллар дафтари»да рўйхатда турган 29 нафар хотин-қизлар Ўзбекистон  Республикаси Маҳалла ва оилани қўллаб-қувватлаш вазирлиги ҳамда  Касаба уюшмалари федерацияси  ҳисобидан Бухоро шаҳрига саёҳатга юборилди. Бухоро шаҳрига бир нафар тиббиёт ходими кузатувида саёҳатга йўл олган аёл-қизлар саломатлиги мунтазам назоратда бўлди.

Бутун дунёни, кўплаб хорижий сайёҳларни ўзига жалб этиб келаётган Бухорои шарифнинг  маҳобатли меъморчилик ёдгорликлари, муқаддас зиёратгоҳларига ташриф буюрган амударёлик аёллар уларнинг тарихи билан танишдилар. Айниқса, Бухоро амирларининг қароргоҳлари бўлмиш Арк ва Ситораи Моҳи Хоса саройлари уларда катта қизиқиш уйғотди.

Ситорайи Моҳи Хоса мажмуаси Бухорои шарифнинг энг кўп қизиқишга сабаб бўладиган обидаларидан бири ҳисобланади. Бунинг ўзига хос сабаблари бор: Бухоронинг сўнгги амири Сайид Олимхон асосан Эски шаҳар марказидаги Арк қўрғонида истиқомат қилган. Амир хос меҳмонларни кутиб олиш, кўнгилхушлик, ҳордиқ чиқариш учун эса шаҳарнинг энг баҳаво нуқтаси, марказдан 4 км шимолда жойлашган Моҳи Хоса ёзги саройини афзал билган. Бухородаги аксар тарихий обидаларда гулсимон, ёзувни ёдга соладиган нақшлар фаол қўлланилган бўлса, Моҳи Хоса безаклари Европа Ренессансининг мозаикаларини эслатади.

Саёҳат давомида зиёратчилар Сомонийлар мақбараси, Минораи Калон, Лаби ҳовуз каби меъморий обидаларни, музейлар ва бошқа диққатга сазовор жойларни ҳам кўришга муваффақ бўлишди.

Бутун ислом оламига донғи кетган Бухоронинг етти пирларининг зиёратгоҳлари, буюк алломаларимизнинг қабрларини зиёрат қилиш таомилга кўра, Ҳазрат Абдулхолиқ  Ғиждувоний зиёратгоҳидан бошланиб, Нақшбандия тариқатининг асосчиси Ҳазрат Баҳоуддин Нақшбанд зиёратгоҳи ҳамда у кишининг авлиё мақомига етган Оналарининг қабрларини зиёрат қилиш давомида қизиқарли маълумотларга эга бўлдилар.

Саёҳатчилар учун ҳар маҳалда бепул овқат, шинам меҳмонхона, транспорт ва экскурсовод хизматлари тақдим этилди. Саёҳатчи аёллар янги куч, ғайрат ва руҳий қувват билан юртимизга қайтиб келишди.

Муқаддас Бекназарова, туман Маҳалла ва оилани қўллаб-қувватлаш бўлими бошлиғининг биринчи ўринбосари.