«Ayollar daftari»da roʻyxatda turgan 29 nafar xotin-qizlar Buxoro shahriga sayohatga yuborildi

Mamlakatimizda ayol-qizlarning rolini oshirish, ularning jamiyat hayotidagi faol ishtirokini taʼminlash, ularni oʻylantirayotgan muammolarni oʻrganish va hal qilishning oʻziga xos yangi tizimi yaratilib, hududlarda “Ayollar daftari” shakllantirildi. Ushbu daftarga qoʻllab-quvvatlashga muhtoj, ishsiz ayollar kiritildi va manzilli ishlarni amalga oshirish yoʻlga qoʻyildi. Hech bir ayol-qiz davlat eʼtiboridan chetda qolib ketmasligini taʼminlash maqsadida bu masʼuliyatli ishga Oʻzbekiston kasaba uyushmalari federatsiyasi, Mahalla va oilani qoʻllab-quvvatlash vazirligi, Oʻzbekiston yoshlar ishlari agentligi kabi qator hamkor tashkilotlarning biriktirildi.

Amudaryo tumanida ham “Vaqtinchalik tartib” asosida har bir sektorlar kesimida mahallabay “Ayollar daftari”ga 30 yoshdan oshgan 1832 nafar ayollar kiritilgan. Shu paytga qadar “Ayollar daftari”ga kiritilgan 1473 nafar xotin-qizlarga amaliy yordamlar koʻrsatilgan. Ishga muhtoj, ishsiz 567 nafar ayollarning bandligi taʼminlandi. Kasb-hunarga 225 nafar xotin-qizlar qayta oʻqitildi, tomorqadan foydalanishni yoʻlga qoʻyish uchun 55 nafar, tadbirkorlik qilishi uchun kredit olishda 398 nafar ayollarga amaliy yordamlar koʻrsatildi.

Bundan tashqari, 173 nafar boquvchisini yoʻqotgan ehtiyojmand ayollar, 65 nafar ijtimoiy yordamga muhtoj 1- va 2-guruh nogironligi boʻlgan ayollarga, 19 nafar qaramogʻida nogiron farzandi boʻlgan ayollarimizga moddiy yordamlar ajratildi.

16-18-iyun kunlari tumanimizdan «Ayollar daftari»da roʻyxatda turgan 29 nafar xotin-qizlar Oʻzbekiston  Respublikasi Mahalla va oilani qoʻllab-quvvatlash vazirligi hamda  Kasaba uyushmalari federatsiyasi  hisobidan Buxoro shahriga sayohatga yuborildi. Buxoro shahriga bir nafar tibbiyot xodimi kuzatuvida sayohatga yoʻl olgan ayol-qizlar salomatligi muntazam nazoratda boʻldi.

Butun dunyoni, koʻplab xorijiy sayyohlarni oʻziga jalb etib kelayotgan Buxoroi sharifning  mahobatli meʼmorchilik yodgorliklari, muqaddas ziyoratgohlariga tashrif buyurgan amudaryolik ayollar ularning tarixi bilan tanishdilar. Ayniqsa, Buxoro amirlarining qarorgohlari boʻlmish Ark va Sitorai Mohi Xosa saroylari ularda katta qiziqish uygʻotdi.

Sitorayi Mohi Xosa majmuasi Buxoroi sharifning eng koʻp qiziqishga sabab boʻladigan obidalaridan biri hisoblanadi. Buning oʻziga xos sabablari bor: Buxoroning soʻnggi amiri Sayid Olimxon asosan Eski shahar markazidagi Ark qoʻrgʻonida istiqomat qilgan. Amir xos mehmonlarni kutib olish, koʻngilxushlik, hordiq chiqarish uchun esa shaharning eng bahavo nuqtasi, markazdan 4 km shimolda joylashgan Mohi Xosa yozgi saroyini afzal bilgan. Buxorodagi aksar tarixiy obidalarda gulsimon, yozuvni yodga soladigan naqshlar faol qoʻllanilgan boʻlsa, Mohi Xosa bezaklari Yevropa Renessansining mozaikalarini eslatadi.

Sayohat davomida ziyoratchilar Somoniylar maqbarasi, Minorai Kalon, Labi hovuz kabi meʼmoriy obidalarni, muzeylar va boshqa diqqatga sazovor joylarni ham koʻrishga muvaffaq boʻlishdi.

Butun islom olamiga dongʻi ketgan Buxoroning yetti pirlarining ziyoratgohlari, buyuk allomalarimizning qabrlarini ziyorat qilish taomilga koʻra, Hazrat Abdulxoliq  Gʻijduvoniy ziyoratgohidan boshlanib, Naqshbandiya tariqatining asoschisi Hazrat Bahouddin Naqshband ziyoratgohi hamda u kishining avliyo maqomiga yetgan Onalarining qabrlarini ziyorat qilish davomida qiziqarli maʼlumotlarga ega boʻldilar.

Sayohatchilar uchun har mahalda bepul ovqat, shinam mehmonxona, transport va ekskursovod xizmatlari taqdim etildi. Sayohatchi ayollar yangi kuch, gʻayrat va ruhiy quvvat bilan yurtimizga qaytib kelishdi.

Muqaddas Beknazarova, tuman Mahalla va oilani qoʻllab-quvvatlash boʻlimi boshligʻining birinchi oʻrinbosari.