Адабиёт 01.07.2014 👁 2,904

“Соғлом бола йили” янгиликлари

* Туманимиз пиллакорлари жорий йилги мавсумда 243,5 тонна ўрнига 267 тонна пилла топшириб, давлат шартномасини Қорақалпоғистон Республикасида биринчи бўлиб ортиғи билан бажардилар. Муҳими, етиштирилган пилланинг 100 фоизи туманимизда - "Аsia silk" шўъба корхонасида қайта ишланади.

* Янгидан ишга туширилаётган МЧЖ шаклидаги "Amudaryotex" хорижий корхонаси пахтадан юқори сифатли экспортбоп тўқимачилик ва трикотаж саноати учун йилига 6000 тонна йигирилган калава-ип ишлаб чиқаради ва 250 та янги иш ўрни яратилади.

Ишлаб чиқарилган маҳсулотнинг 80 фоизини экспорт қилиш режалаштирилмоқда.

* Бу йил туманимиз ғаллакорлари 3 минг гектар ерга буғдой экиб, мўл ҳосил етиштиришга эришдилар. Ғаллакорларимиз ялпи хирмонни 11 минг 100 тоннага етказиб, шундан 5530 тонна ғалла хосилини шартнома бўйича давлат хазинасига топширишни режалаштирмоқдалар.

* Шу йилнинг 23 июнида "Энг намунали фуқароларнинг ўзини-ўзи бошқариш органи" кўрик-танловининг туман босқичи бўлиб ўтди.

Кўрик-танловда "Куюккўпир" овул фуқаролар йиғини (оқсоқоли Р.Эрлапасов) биринчи ўринга, "Ўрта қалъа" овул фуқаролар йиғини (оқсоқоли И.Тўраев) иккинчи ўринга, Беруний МФЙ (оқсоқоли А.Саъдуллаев) учинчи ўринга лойиқ, деб топилдилар.

Шунингдек, 11 та номинация бўйича ҳам ғолиблар аниқланди.

* Яқинда Нукус шаҳрида "Ораста қизлар давраси" кўрик-танловининг Қорақалпоғистон Республикаси босқичи бўлиб ўтди. Мазкур танловнинг туман босқичи ғолиби, Манғит шаҳрининг "Олмазор" маҳалласи "Ораста қизлари" Республикамизда ҳам биринчи ўринни эгалладилар.

* Яқинда "Саломатлик-3” лойиҳаси бўйича туман тиббиёт бирлашмасига қарашли кўптармоқли марказий поликлиникага замонавий русумдаги "Лондвинт” фирмаси маҳсулоти бўлган рангли доплэр системали ультратовуш сканер аппарати берилди.

Бу янги замонавий аппарат "3D” ўлчамли, кўп функцияли компьютер системаси билан жиҳозланган. Унинг афзаллиги - (ички ҳар бир аъзони кўриш тиниқлиги аниқ) датчиклари ўз-ўзидан компьютер орқали керакли частота билан таъминланади.

* Замонавий, рақамли, компьютерлаштирилган 2 та рентген аппаратураси келтирилганлиги туман тиббиёт бирлашмасида стационар, амбулатор даволанувчиларга аниқ ташхис қўйиш имконини янада оширди. Аппаратнинг бирини кўптармоқли марказий поликлиникага, яна бирини касалхонага ўрнатиш режалаштирилмоқда.

* 22 июнда "Аёллар спорт фестивали”нинг туман босқичи бўлиб ўтди. Спортнинг 6 та тури бўйича ўтказилган мусобақаларда ғолиблар аниқланиб, улар республика босқичига йўлланма олдилар. Мазкур спорт фестивалининг Қорақалпоғистон Республикаси босқичида туманимиздан 19 нафар спортчи аёл-қизлар қатнашадилар.

* Туманимиздаги 2-сонли БЎСМ директори, Халқаро тоифадаги ҳакам Чоршам Тожимуродов яқинда Наманган шаҳрида 1995-96 йилларда туғилган ўсмирлар ва қизлар ўртасида спортнинг кураш тури бўйича ўтказилган Ўзбекистон чемпионатида бош ҳакам вазифасини бажарди.

Бу чемпионатда ғолибликни қўлга киритган ёш спортчилар жаҳон биринчилигида Ўзбекистон спорт шарафини ҳимоя қиладилар.

* Айни кунлар туманимизда фаолият юритаётган барча умумтаълим ва бошланғич таълим мактабларида болалар ёзги таътилда бўлсалар-да қизғин меҳнат давом этмоқда. Мактабларда келгуси ўқув йилига тайёргарлик ишлари, шу жумладан жорий ва капитал таъмирлаш ишлари олиб борилмоқда. Мактаб биноларини янги ўқув йилига шай қилиб қўйиш борасида белгиланган ишларнинг шу кунгача 80 фоиздан зиёди бажарилди.

* Кейинги йилларда ўқитувчилар ижодкорлигига, ўз устларида ишлашларига катта эътибор қаратилаётганлиги ўз самарасини бераётир. Тугалланган ўқув йилида 4 нафар фан ўқитувчилари - 40-умумтаълим мактабидан Каромат Худойберганова, 5-умумтаълим мактабидан Барно Саидова, 33-умумтаълим мактабидан Жангабой Гулмонов, 30-умумтаълим мактабидан Отабек Тажиевлар "Йилнинг энг яхши фан ўқитувчиси” кўрик-танловининг Қорақалпоғистон босқичида ғолиб бўлиб, Ўзбекистон Республикаси босқичида ҳам муваффақиятли қатнашдилар.

* Тугалланган ўқув йилида туманимиз умумтаълим мактаблари ўқувчиларининг 5 нафари фан олимпиадаларининг Қорақалпоғистон Республикаси босқичида биринчи ўринларни эгалладилар.

Мамлакат миқёсида ўтказилган "Билимлар беллашуви”да 3 нафар ўқувчи муваффақиятли иштирок этишди.

* 2013-2014 ўқув йилида туманимиз умумтаълим мактабларининг 9-синфини тугатган 2920 нафар ўқувчи-ёшлар таълимнинг кейинги босқичи - академик лицей ва касб-ҳунар коллежларига тўлиқ қамраб олинди.

* Жорий ўқув йилида туманимиздаги 8 та касб-ҳунар коллежларини ўзлари танлаган мутахассисликлар бўйича тугатган 2652 нафар йигит-қизларга мутахассислик дипломларини тантанали равишда топшириш маросимлари бўлиб ўтмоқда.

* Жорий йилда туманимизда қурилиш соҳасида ҳам қатор ишлар амалга оширилмоқда. Қишлоқ жойларида 70 та намунавий лойиҳалар асосидаги уй-жойлар, шунингдек, 60 ўқувчи ўринга мўлжалланган Маиший хизмат кўрсатиш касб-ҳунар коллежи устахонаси, Амударё қишлоқ хўжалик касб-ҳунар коллежи биносини капитал таъмирлаш ишлари, Амир Темур номли овул ҳудудидаги 4-сонли мактабни реконструкция қилиш, Қиличбой овули ҳудудидаги 15-сонли мактабни капитал таъмирлаш ишлари амалга оширилмоқда. Шунингдек, бир неча таълим муассасаларида капитал таъмирлаш ва реконструкция ишлари амалга оширилмоқда.

* Туманимиз ҳудудида 5 та футбол майдончалари қурилаётгани ва яқинда қурилиши бошланган "Камолот шаҳарчаси” ҳам ёш авлод келажаги йўлида амалга оширилаётган хайрли ишларнинг намунасидир.