“ПРОКУРОР КУБОГИ” МУСОБАҚАСИ ҒОЛИБЛАРИ ТАҚДИРЛАНДИ

Туманимизда “Ёшларни қўллаб-қувватлаш ва аҳоли саломатлигини мустаҳкамлаш йили” давлат дастури доирасида 16-30 ёш оралиғидаги уюшмаган ёшлар ва ўсмирлар ўртасида спортнинг кураш тури бўйича “Прокурор кубоги” мусобақаси ўтказилди. Мусобақа Амударё тумани ҳокимлиги,  туман прокуратураси, Кураш федерацияси, тумандаги Болалар-ўсмирлар спорт мактаби ва бир қатор ҳамкор ташкилотлар ҳамкорлигида ташкил қилинди.

Мусобақада туманимиз маҳаллаларида яшовчи ўсмирлар ва 16-30 ёш оралиғидаги ёшлар иштирок этишди.

Бири-биридан қизиқарли ва завқли таассуротларга бой ўтган мусобақа 29 июнь куни Амударё тумани Болалар-ўсмирлар спорт мактабининг 2-филиали стадионида 60, 66, 73, 81, 90, 100 ва 100 кг.дан ортиқ вазн тоифаларидаги ёшлар ўртасида бўлиб ўтди. Мусобақанинг ҳалоллик ва шаффофлик асосида ўтказилишини таъминлаш мақсадида иштирокчилар мусобақа Низоми, шартлари ва кураш спорти қонун-қоидалари билан олдиндан таништирилди. Шу боис мусобақанинг биринчи куниданоқ иштирокчилар кўтаринки кайфиятда гиламга чиқдилар.

Мусобақанинг финал учирашувлари 30 июнь куни давом эттирилди. Дўстлик ва ўзаро жипслик асосида ўтган мусобақа якунида ғолиблар аниқланиб, ташкилотчилар томонидан диплом ва қимматбаҳо совғалар билан тақдирланишди.

Мусобақа ғолибларини тақдирлаш маросимида туман ҳокими Султонбой Йўлдашев, туман прокурори Жавлон Муфтуллаев, ДСИ бошлиғи Айдос Сеитов, туман ИИБ бошлиғи Улуғбек Худайберганов, туман Давлат ҳавфсизлик хизмати масъуллари,  Туризм ва спорт бўлими бошлиғи Ғуломжон Қурбонбоев, Болалар-ўсмирлар спорт мактаби директори Чоршам Тажимурадовлар қатнашдилар ва ғолибларни тақдирладилар ва эришган ютуқлари билан табрикладилар.

Туманимизда кураш спорт турини ривожлантириш, кучли спортчиларни аниқлаш, туман терма жамоасини шакллантириш, маҳаллалардаги уюшмаган ёшларни спортга жалб қилиш, ёшларнинг бўш вақтларини мазмунли ўтказиш, уларни ватанпарварлик руҳида тарбиялаш, аҳоли ўртасида соғлом турмиш тарзини тарғиб қилиш ва уларнинг маданий дам олишини ташкил қилиш мақсадида ўтказилган мазкур мусобақа жараёнида кўплаб иқтидорли ёш спортчилар аниқланди. Шу билан бирга спортга қизиқувчи, алоҳида қобилиятга эга бўлган ёшлар рўйхати шакллантирилиб, спортнинг кураш тури билан шуғулланаётган ёшларга ҳамда ушбу спорт тури бўйича шуғулланиш истагидаги ёшлар учун зарур шарт-шароитлар яратиш, туманимиз спортчиларининг нуфузли мусобақаларда халқаро турнирлар, чемпионатларда фаол қатнашишларини таъминлаш бўйича масъуллар томонидан зарур тавсиялар ҳам берилди.

Робия ЙЎЛДОШЕВА.