БЎЗСОЛМА МАҲАЛЛАСИДА ТОМОРҚАЧИЛИКНИ РИВОЖЛАНТИРИШ БЎЙИЧА СЕМИНАР ЎТКАЗИЛДИ

Юртимизда ҳар бир ҳудуднинг ўзига хос хусусияти ҳисобга олиниб, жойларда «бир маҳалла – бир маҳсулот» тамойили асосида ҳар бир маҳалла мева-сабзавот етиштириш, кичик иссиқхоналар ташкил этиш, чорвачилик, паррандачилик, асаларичилик каби йўналишларга ихтисослаштирилмоқда. Республика бўйлаб барча ҳудудларда ҳар бир маҳалла кесимида томорқага ажратилган ерлардан самарали фойдаланиш юзасидан тегишли масъуллар иштирокида тушунтириш-тарғибот ишлари олиб борилмоқда.

Туманимизда ҳам аҳолининг асосий қисми қишлоқ хўжалиги орқали даромад топиб, ўз оиласи фаровонлигига ва иқтисодиёт ривожига ҳисса қўшиб келмоқда. Томорқасидан унумли фойдаланиб, даромад орттираётганлар атрофдагиларга ҳам намуна бўлишмоқда ва ўз тажрибалари бўйича тавсиялар бериб, томорқачиликни йўлга қўйишларига кўмаклашишмоқда.

Шу йил 3 июль куни туманимизнинг чекка ҳудудида жойлашган Бўз солма маҳалласида намунали томорқа эгаларининг фаолиятини кенг аҳоли ўртасида тарғиб этиш мақсадида “Томорқадан унумли фойдаланайлик” шиори остида “Томорқа даромад – манбаи”, “Бир маҳалла – бир маҳсулот” дастури доирасида кўргазмали семинар ташкил этилди. Семинарда туман Маҳалла ва оилани қўллаб-қувватлаш бўлими, Бўз солма маҳалла фуқаролар йиғини масъуллари, йиғин раисининг томорқа, ободонлаштириш, бандлик ва тадбиркорлик масалалари бўйича ўринбосари Санъат Абдуллаев ҳамда маҳалланинг томорқачиликни ташкил этиш истагида бўлган фуқаролари иштирок этдилар.

Маҳалла ҳудудидаги “Хивали овул” аҳоли пунктида яшовчи Реймбой ота Қурбонбоев хонадонида ташкил этилган ушбу кўргазмали семинарда хонадон эгалари томорқадан самарали ва унумли фойдаланиш сирлари ҳақида сўзлаб бердилар. Шунингдек, томорқа ерининг унумдорлигини ошириш, баракали мўл ҳосил олиш ҳамда катта даромад қилиш йўлларини тушунтирдилар. Томорқа эгалари ерни баҳорги экиш мавсумига тайёрлаш, уруғлик саралаш, экинларни экиш, кўчатларни ўтқазиш бўйича ҳам ўз тажрибаларини ўртоқлашдилар.

Реймбой ота Қурбонбоевнинг томорқа майдони 78 сотихдан иборат. Бундай катта майдонда қишлоқ хўжалиги маҳсулотларини етиштириш катта маъсулият ва меҳнат талаб қилади. У ўз томорқасида карам, пиёз, картошка, редиска, бодринг, помидор, саримсоқ пиёз, булғор қалампири, кўкатлар, жўхори ва бошқа бир қатор экинларни парвариш қилиб келаётганини, ҳатто турфа хил гуллар ўстириб, улардан ҳам даромад кўраётганини таъкидлаб ўтди.

Ушбу хонадон томорқасидаги ҳар бири 154 квадрат метр майдонда ташкил этилган 2 та иссиқхонада эртаки, такрорий экинлар етиштирилиб келинмоқда. Ундан ташқари, хонадон эгалари чорвачилик, паррандачилик, асаларичилик фаолияти билан ҳам шуғулланиб, даромад манбаларини кўпайтиришмоқда. Бу орқали Реймбой отанинг оиласида ўғли Ҳамиджон Қурбонбоев, келини Ҳавожон Собирова, невараси Авазбек Раҳимбоевларнинг бандлиги таъминланганлиги, айниқса, диққатга сазовор.

Семинар давомида томорқа эгалари асалари парвариши, дехқончилик ва боғдорчилик бўйича тажрибалари ҳақида батафсил маълумот бердилар. Парвариш қилинаётган мева ва сабзавотлар навлари, унинг турлари, ҳосил қилиш вақтига қараб, уларни парвариш қилиш бўйича тавсиялар бериб ўтдилар.

Семинар сўнггида хонадон эгаларига ҳомийлар томонидан тайёрланган эсдалик совғалари тақдим қилинди.

Р.Бобожонов, туман Маҳалла ва оилани қўллаб-қувватлаш бўлими мутахассиси.