“ОИЛА – ЖАМИЯТНИНГ АСОСИ” МАВЗУСИДА ТАДБИР ЎТКАЗИЛДИ

Инсон оилада туғилиб, вояга етади. Унинг шахс сифатида шаклланиш жараёни ҳам  оила бағрида, миллий-маънавий қадриятлар негизида, оила тутумлари асосида кечади. Унинг жамиятга фаол аралашуви, нуфузи, қадр-қиммати, аввало, ўзи яшаган, тарбияланган муҳитга боғлиқ. Шунинг учун ҳам халқимиз: “қуш уясида кўрганини қилади”, “оиланинг қадрини билган элнинг, эл қадрини билган олам қадрини билади”, “оиланинг остонаси олтин, бу олтин остонани дахлсиз сақлаган ҳаёт сўқмоқларида қоқилмайди” каби жуда кўплаб ҳикматли ибораларни яратганки, бу ҳикматлар замирида оила мустаҳкамлигини таъминлашга қаратилган самимий ишора, беғараз ният ва орзу мужассам.

Ҳақиқатан ҳам миллий-маънавий оила қадриятлари, оила тутумлари асосида тарбияланган шахс қалбида оилани муқаддас деб билиш туйғуси кучли бўлади ва у ҳар қандай вазиятда ҳам оила деб аталмиш қутлуғ маконга садоқатли бўлади.

Лекин ҳамма ҳам шундайми? Оила тутумларига дилда садоқат сақлай оладими? Гап мана шунда. Афсуски, гуруч курмаксиз бўлмагани каби бугунги кунда оила бўстонига ошиқиб қадам қўйиб, ҳатто қисқа вақт ўтиб-ўтмай бири-бирини “яхши тушунмай, осонгина ажрашиб кетаётган ёшлар ҳам талайгина.

Жорий йилнинг 6 июль санасида Амударё туман ҳокимлиги биносида бўлиб ўтган тадбирда туман Маҳалла ва оилани қўллаб-қувватлаш бўлими хотин-қизлар жамоатчилик Кенгаши томонидан туманда оила мустаҳкамлигини таъминлаш, ёш оилалар билан ишлашиш борасида амалга оширилаётган ишлар, оилавий низоларнинг, эрта никоҳларнинг олдини олиш бўйича амалий чора-тадбирларга алоҳида эътибор қаратилди. “Оила – жамиятнинг асоси” деб номланган мазкур тадбирда Қорақалпоғистон Республикаси Маҳалла ва оилани қўллаб-қувватлаш вазирининг биринчи ўринбосари Марям Аҳмедова, Амударё туман ҳокими Султонбой Йўлдашев, туман Маҳалла ва оилани қўллаб-қувватлаш бўлими бошлиғи Алишер Йўлдашев, Маҳалла ва оилани қўллаб-қувватлаш бўлими бошлиғининг биринчи ўринбосари, хотин-қизлар жамоатчилик Кенгаши раҳбари Муқаддас Бекназарова, “Мўътабар аёл” кўкрак нишони соҳибаси Пардагул Ўрозбоева, Қорақалпоғистон Республикаси хотин-қизлар жамоатчилик Кенгаши аъзоси Санобар Хўжамуродова, туман фуқаролик ҳолати далолатномаларини ёзиш бўлими мудираси Санобар Холбоева шунингдек, туман Маҳалла ва оилани қўллаб-қувватлаш бўлими ҳузуридаги 30 кишидан иборат тарғибот гуруҳи аъзолари, овул ва маҳалла фуқаролар йиғинлари раислари иштирокида этдилар.

Тадбирни туман ҳокими Султонбой Йўлдашев очди ва оиланинг жамиятимизда тутган ўрни, шунингдек, туманимиз маҳаллаларида ёш оилалар билан ишлашишдаги жузъий камчиликлар, бу борадаги муаммоларни ҳал этишга қаратилган чора-тадбирлар ҳақида  тўхталиб ўтди.

Шундан сўнг, мазкур тадбирдан кўзланаётган мақсад ва галдаги вазифалар хусусида Қорақалпоғистон Республикаси Маҳалла ва оилани қўллаб-қувватлаш вазирининг биринчи ўринбосари Марям Аҳмедова батафсил тўхталди. Шу билан бирга Амударё туман Маҳалла ва оилани қўллаб-қувватлаш бўлими томонидан оилаларда ажрашишларнинг олдини олиш борасида 2021 йилнинг ўтган 6 ойи давомида амалга оширилаётган ишларни бирма-бир таҳлил қилиб, туманда оилавий низоларга чек қўйишга қаратилган чора-тадбирларда сусткашликка йўл қўйилаётгани, маҳаллаларда нотинч оилалар билан ишлашиш бўйича манзилли тизим ишлаб чиқилмагани, натижада туманда  ўтган 6 ой давомида оилавий ажрашишлар сони кескин ошиб кетганини қайд этди ва бундан кейин  ҳар бир овул ва маҳаллада кўпни кўрган пир-у бадавлат отахон ва онахонларни, намунали оилалар соҳиб ва соҳибаларини жалб қилган ҳолда ёш оилалар ўртасида миллий-маънавий қадриятлар, оила тутумлари хусусида жонли мулоқотлар, маслаҳат-ўгит тадбирларини ўтказиш, кекса авлод вакиллари иштирокида ҳудудлардаги нотинч деб ҳисобланган оилаларга кириб бориб, оилавий низоларнинг чуқурлашувига, ажрашишга олиб келган сабаб ва омилларни тизимли ўрганиш,  ажрашиш қарорининг ижобий томонга ўзгаришига эришиш зарурлигини таъкидлади.

Шунингдек, тадбирда “Мўътабар аёл” кўкрак нишони соҳибаси Пардагул она Ўрозбоева, Қорақалпоғистон Республикаси хотин-қизлар жамоатчилик Кенгаши аъзоси Санобар Хўжамуродова ҳамда туман Фуқаролик ҳолати далолатномаларини ёзиш бўлими мудираси Санобар Холбоевалар ҳам сўзга чиқдилар ва туманимизда 2020 йилга нисбатан 2021 йилнинг ўтган 6 ойи давомида ажрашишлар кескин ошиб кетганини, бунинг сабаб ва оқибатларини жиддий ўрганиш зарурлигини таъкидладилар. Хусусан, 2020 йил давомида туманимизда 40 та оила ўзаро келишмовчиликлар оқибатида ажрашиб кетишган бўлса, 2021 йилнинг биринчи ярмида 72 та оиланинг никоҳлари бекор қилинган. Ваҳоланки, 2021 йил якунигача яна 6 ой вақт бор. Агар буни 6 ойга таҳсимласак, туманимизда ҳар ойда, 12 та оиланинг никоҳи бекор қилинаяпти. Йил охиригача жиддий чоралар кўрилмаса, бу  рақам яна ошишда давом этаверади.

Бўлиб ўтган тадбирда фаоллар томонидан айни дамда тумандаги ажрашиш ёқасида турган яна 67 та оила мавжудлиги, мазкур оилаларни яраштириш, никоҳ бузилишининг олдини олиш мақсадида хотин-қизлар жамоатчилик Кенгаши ҳамда тарғибот гуруҳи аъзолари ўзлари бириктирилган ҳудудлардаги ёш оилаларга кириб бориб, ҳар ҳафтада бир марта тушунтириш-тарғибот, самимий  ва очиқ мулоқот тадбирларини олиб боришаётганлиги қайд этилди.

Албатта, ҳар бир оиланинг мустаҳкамлиги, фарзандларнинг ота-оналари бағрида эмин-эркин яхши тарбия кўришлари, оила масканида вояга етиб, тинч-тотув яшашлари – жамиятнинг юксак тараққиёти, обод ва фаровонлигининг бирдан-бир мезонидир. Инсонни бахт-саодат манзилига элтувчи куч ҳам айнан ана шу мезон туфайлидир.

“Оила – жамиятнинг асоси” мавзусида бўлиб ўтган мазкур тадбирда туманда оилавий ажрашишларга барҳам бериш, бегуноҳ фарзандларнинг тирик етим бўлиб, кўнгиллари кемтик вояга етишларининг олдини олиш борасидаги туман Маҳалла ва оилани қўллаб-қувватлаш бўлими олдида турган бошқа масалалар ҳам муҳокама этилиб, муаммоларни ҳал этиш бўйича чоралар белгиланди.

Робия ЙЎЛДОШЕВА