Мустақиллик берган имкон

Бугунги ҳаётимизда рўй бераётган мислсиз ўзгаришларни, халқимиз турмуш тарзидаги фаровонликни, айниқса, бозорларимиздаги тўкинчиликни кўриб, бундайин дориломон кунларга етганимизга шукроналар айтаман. Ахир ўтган асрнинг 1980-1991 йилларида ғоят оғир кунларни бошимиздан кечирганмиз. Ўша йилларда собиқ иттифоқ қонунчилигига кўра бирон бир кишининг бойиб кетиши, хусусий мулк эгаси бўлиши асло мумкин эмасди. Биз фақат ўзимиз яшайдиган уйимизга, нари борса битта мотоцикл ёки машинамизга эгалик қила олардик. Иккита автомобили бор одам албатта шубҳа остига олиниб, даромади текшириларди. Хусусий ошхона, ҳозиргидай ҳашаматли тўйхона, йирик ер эгаси, фермер ёки мулкдор бўлиш ўзбек халқининг етти ухлаб тушига ҳам кирмаган орзу эди, холос. Ҳатто ўзимизнинг Хива гиламларини Москвага саёҳатга борган кишилар ўша томонлардан сотиб олиб келишарди.

Ўзбекистон Мустақилликка эришгач, аввалги собиқ иттифоқ қонунчилигига тамоман зид бўлган тушунчалар ҳаётимизга кириб келди – хусусий мулк, тадбиркорлик фаолияти, акция, акциядорлик жамияти каби.

Минг шукурки, эндиликда давлат мулки, жамоа мулки билан бир қаторда биз тадбиркорларга даромад олиш имконини берувчи хусусий мулкнинг ҳам амалда мавжуд бўлиши мустақил давлатимиз қонунларида тўлиқ кафолатланди. Шу боис, биз ўз хусусий мулкимиз (ошхона, тўйхона, савдо-саноат фирмаси) мулкчилик шакли қандай бўлишидан қатъий назар, амалдаги қонунчилигимизга мос равишда унинг хизмат кўрсатиш ҳудудини кенгайтириш, ҳатто ўз маҳсулотларимиз билан дунё бозорларига чиқишимиз учун барча имкониятлар яратилган.

Мен тадбиркор сифатида ҳар тонг ўз иш фаолиятимни бошларканман, қалбим фахр ва ифтихорга тўлади:

- Кеча мен ким эдим? – дейман ўзимга-ўзим.

- Ўзи истаган эзгу ишни қила олмайдиган эрксиз одам эдим-ку, ахир! Энди-чи! Энди банкда ўз ҳисоби, муҳри ва тамғасига, ўз мулкига эга тадбиркорман!

Тадбиркорлик туфайли ўғил-қизларимни, юртдошларимни иш билан таъминладим, фарзандларимни уйли, машинали қилдим. Энди невараларимга намунавий лойиҳа асосида қурилаётган уйларга буюртма бердим.

Мустақиллик берган имкон туфайли обрў-эътибор топдим, мулк эгаси бўлдим. Ана шундай буюк имкониятлар эшигини ланг очган она Ўзбекистон – Мустақил Ватанимиз омон бўлсин!

ТурсунбойАҳмедов,

тадбиркор.