Ўз нонимизнинг таъми ширин

Ўз нонимизнинг таъмига не етсин! Қуёшли юртимизнинг тафтида етилиб пишган қирмизи дон хирмонлари юксалгани сайин юртдошларимизнинг қувончига-қувонч қўшилмоқда. Боиси, хирмон донга тўлгани - юрт маъмурлиги, дегани.

Бир пайтлар халқимиз эҳтиёжи учун ун бошқа давлатлардан олиб келинарди. Мустақиллигимиз шарофати билан пахта яккаҳокимлигига чек қўйилиб, халқимиз учун керакли ғалла, мева, сабзавотлар етиштиришга эътибор қаратилди. Фермерларга кенг имкониятлар ва шароитлар яратиб берилгани туфайли қисқа вақтда ғалла мустақиллигига эришилди.

Мен раҳбарлик қилаётган "Боғи Эрам” фермер хўжалигимизда ҳам ҳар йили буғдойдан кўзланганидай ҳосил олиб келаяпмиз.

Қисқа кунлар ичида 15 гектарлик майдонларимиздан 37 тонна юқори сифатли буғдойни давлат хирмонига топшириб, шартномавий режамизни ортиғи билан адо этдик.

Қорақалпоғистонда биринчи бўлиб туманимиз ғаллакорларининг буғдой етиштириш режасини адо этгани, бунда бизнинг ҳам улушимиз борлиги билан чексиз қувонамиз.

Хўжалигимизда 68 гектар пахта майдонлари мавжуд бўлиб, ғўзаларимиз ривожи ҳам яхши. Биринчи сувга қонган ниҳолларимиз ёппасига гулга кирди. Балиқчилик, чорвачилик каби қўшимча тармоқлардан ҳам яхши даромад олаяпмиз.

Бунда бизга туманимизнинг кўптармоқли фермер хўжаликларида тўпланган тажрибалар қўл келмоқда.

Юртбошимиз И.Каримов: "Фермер нафақат деҳқончилик сирларини пухта билиши, айни пайтда у иқтисодчи, ҳисобчи, менежер, селекционер, бизнесмен, керак бўлса, дипломат бўлмоғи зарур. Бугунги ҳаёт олдимизга қўяётган янги-янги вазифаларни яхши билиши, одамларнинг, айниқса, қишлоқ аҳлининг турмуш даражасини яна-да яхшилаш, юртимизни бундан-да обод қилишда фаол иштирок этиши керак", - дея таъкидладилар, фермерларга қишлоқ хўжалиги соҳасининг ҳал қилувчи кучи, дея юксак ишонч билдирдилар. Шу сафда ўзимнинг ҳам борлигимдан ғурурланаман, янада унумлироқ ишлашга ҳаракат қиламан.

Илҳом ПОЛВОНОВ,

"Боғи Эрам” фермер хўжалиги раиси.

(Фото - http://www.12news.uz)