Участка сайлов комиссиялари томонидан сайловга қизғин тайёргарлик кўрилмоқда

Мамлакатимизда тобора яқинлашаётган Ўзбекистон Республикаси Президенти сайловига тайёргарлик ишлари қизғин тарзда олиб борилмоқда.  Амударё туманида ҳамда ушбу муҳим сиёсий жараённи муносиб тарзда ўтказиш борасида амалий ишлар олиб борилмоқда.

Туманда Ўзбекистон Республикаси Президенти сайловини ўтказиш мақсадида жами 64 та сайлов участкалари тузилган бўлиб, уларнинг 54 таси умумтаълим мактабларида, 2 таси касб-ҳунар мактабида, 1 таси мусиқа ва санъат мактабида, 1 таси муҳандислик техникумида, 1 таси спорт мактабида, 3 таси маданият муассасаларида, 1 таси фуқаролар йиғинлари биноларида ва 1 таси ташкилот биносида жойлашган. Ўзбекистон Республикаси Президенти сайловини ўтказувчи 1-Қорақалпоғистон округ сайлов комиссиясининг қарори билан сайловчилар сонига қараб, ҳар бири 11-15 нафар аъзодан иборат таркибда участка сайлов комиссиялари тузилди.

Айтиш керакки, туманда сайлов участкаларининг моддий-техник таъминоти ҳамда сайловчилар учун қулайликлар яратиш билан боғлиқ ташкилий ишлар ўз вақтида амалга оширилди. Сайлов участкаларида мавжуд муаммо ва камчиликлар баратараф қилиниб, хоналар зарур жиҳозлар билан таъминланди. Сайловга тайёргарлик кўриш, сайлов билан боғлиқ жараёнлар хусусида жамоатчиликни хабардор қилиб бориш, аҳоли, айниқса, сайловда илк маротаба қатнашадиган ёшларнинг бу борадаги билим ва тушунчаларини кенгайтириш борасида тарғибот-ташвиқот ишларига алоҳида эътибор қаратилмоқда.

Жумладан, тумандаги Қипчоқ овул фуқаролар йиғини биносида жойлашган 141-сайлов участкасида ҳам сайловга тайёргарлик ишлари авжида. Участка сайлов комиссияси раиси Ибрагим Ражабов бошчилигида барча зарурий ишлар ўз муддатларида амалга оширилмоқда. Сайлов участкаси маркази бўлмиш овул фуқаролар йиғини биносида маҳаллий бюджет маблағлари ҳисобидан 392 млн сўм маблағ эвазига қайта таъмирлаш ишлари олиб борилди. Бино атрофи ободонлаштирилиб, гуллар экилди. Хоналар зарурий жиҳозлар - стол-стуллар, компьютер жамланмалари билан жиҳозланиб, сайловчилар учун барча қулайликлар яратилди.

Айтиш керакки, 141-сайлов участкаси ҳудудида иккита аҳоли пункти мавжуд бўлиб, булар Кўкча ҳамда Қайровул аҳоли пунктларидир. Уларда истиқомат қилувчи жами аҳоли сони 3701 нафарни ташкил этиб, уларнинг 2407 нафари сайлов жараёнларида иштирок этадилар. Шундан 107 нафари 18 ёшга тўлган, сайлов жараёнларида илк бора иштирок этадиган ёшлардир.

Чойкўл овулидаги 22-сонли мактабда жойлашган 138-сонли участка сайлов комиссияси аъзолари ҳам сайловга тайёргарлик жараёнларини қизғин тарзда давом эттиришмоқда. Участка сайлов комиссияси раиси Азимжон Бекбергенов бошчилигидаги 15 нафар аъзолари Президент сайловини муносиб ўтказиш мақсадида тизимли ишларни ташкил этмоқдалар.

Хусусан, сайлов участкаси маркази жойлашган бинода мавжуд камчиликлар аниқланиб, зарур қурилиш-таъмирлаш ишлари олиб борилди. Участка сайлов комиссияси раиси, ўринбосари, котиби ҳамда аъзоларининг самарали фаолият олиб боришлари учун алоҳида хоналар ажратилиб, юмшоқ мебеллар, телевизор, стол-стуль ҳамда компьютер жамланмалари билан таъминланган. Сайлов участкаси ҳудудида 543 та хонадонда истиқомат қилувчи 595 та оилалар мавжуд. Жами аҳоли сони 3564 нафарни ташкил этиб, уларнинг 2318 нафари сайловчилардир.

Шу ўринда таъкидлаш жоизки, участка сайлов комиссиялари раиси, ўринбосари, котиблари ҳамда аъзолари малакаларини ошириш мақсадида сайлов қонунчилиги доирасида турли мавзуларда семинар-тренинг машғулотлари ҳам ўтказилмоқда.

Туманимиздаги Ойбек номли маҳалла ҳудудидаги 55-сонли мактаб 97-сонли сайлов участкасининг маркази ҳисобланиб, бу ердаги участка сайлов комиссияси томонидан ҳам сайловга муносиб тайёргарлик кўрилмоқда. Участка сайлов комиссияси раиси Роҳатой Юсупова бошчилигида 13 нафар кишидан иборат участка сайлов комиссияси сиёсий жараённи қонун талаблари асосида ўтказиш борасида самарали фаолият олиб бормоқда. 

Сайлов участкаси ҳудудида 25 та кўча жойлашган бўлиб, уларда 4530 нафар аҳоли истиқомат қилишади. Шундан жами сайловчилар сони 2500 нафар бўлиб, биринчи марта овоз берувчилар 78 нафарни, кўзи ожизлар 3 нафарни, ногиронлиги бор фуқаролар 67 нафарни ташкил этади.

Участка сайлов комиссияси жойлашган бино Сайлов кодекси ва бошқа зарур қўлланмалар билан таъминланган. Участка сайлов комиссияси раиси, ўринбосари, котиби ва аъзоларининг фаолият олиб боришлари учун алоҳида хоналар ажратилиб, улар компьютер жамланмалари, телефон, стол-стуллар билан етарли даражада таъминланган. 

Таъкидлаш керакки, туманимиздаги барча сайлов участкаларида ҳам Ўзбекистон Республикаси Президенти сайловига муносиб тайёргарлик кўрилиб, сайловчиларнинг сайловда иштирок этишлари учун барча қулайликлар ҳамда шароитлар яратилмоқда.

Туман ҳокимлигининг Ахборот хизмати.