Ўзбекистон Республикаси Олий Мажлис Қонунчилик палатаси депутатлари иштирокида йиғилиш бўлиб ўтди

Жорий йилнинг 20 сентябрь куни Амударё туман ҳокимлигининг мажлислар залида Ўзбекистон Республикаси Олий Мажлис Қонунчилик палатаси депутатлари иштирокида йиғилиш бўлиб ўтди.

Йиғилишда Ўзбекистон Республикаси Олий Мажлис Қонунчилик палатаси Спикери ўринбосари, "Адолат" социал демокртик партияси фракцияси раҳбари, депутат Зуҳра Ибрагимова, Соғлиқни сақлаш масалалари қўмитаси депутатлари Мавлуда Адҳамжонова, Нурия Айтжановалар, шунингдек, тумандан сайланган Қорақалпоғистон Республикаси Жўқорғи Кенгеси депутатлари, Халқ депутатлари тумани кенгаши депутатлари, ҳоким ўринбосарлари, корхона ва ташкилотлар раҳбарлари, сиёсий партия раҳбарлари, маҳалла фуқаролар йиғинлари раислари, имом-хатиблар, шифокорлар ва оммавий ахборот воситалари вакиллари иштирок этдилар. Йиғилишни туман ҳокимининг 1-ўринбосари Маъмур Темирбоев олиб борди.

Йиғилишда Ўзбекистон Республикаси “Инсон аъзолари ва тўқималарининг трансплатацияси тўғрисида”ги қонуни лойиҳасининг мазмун-моҳияти ҳамда соҳада олиб борилаётган ислоҳотларнинг аниқ мақсадлари хусусида сўз юритилди.

Мажлисда Ўзбекистон Республикаси Олий Мажлис Қонунчилик палатаси Спикери ўринбосари, "Адолат" социал демокртик партияси фракцияси раҳбари, депутат Зуҳра Ибрагимова сўзга чиқиб, 2021 йил 16 сентябрь куни Республика ихтисослаштирилган хирургия илимий-амалий тиббиёт марказининг мутахассислари ва Халмуратов номидаги республика кўп тармоқли тиббиёт маркази мутаҳассислари иштирокида Қорақалпоғистон Республикаси тиббиёти тарихида биринчи маротаба буйрак кўчириб ўтказиш операцияси мувофаққиятли амалга оширилганлиги таъкидлаб ўтди. Ушбу мураккаб жарроҳлик амалиётида Амударё тумани Куюк кўпир овулида яшовчи 23 ёшли Ўктам Турсунбаевга акаси Даврон Мамировнинг бир буйраги муваффақиятли кўчириб ўтказилган бўлиб, ҳозирда ҳар иккаласи юртдошимизнинг ҳам аҳволи яхши. Депутат ўз сўзида “Инсон аъзолари ва тўқималарининг трансплатацияси тўғрисида”ги қонун лойиҳаси 25 та моддадан иборат бўлиб, уларда назарда тутилган асосий тамойиллар, белгиланган вазифалар ҳақида сўз юритди.

Айтиш керакки, бугунги кунда мамлакатимиздаги кўплаб даволаш муассасаларида инсон аъзолари ва тўқималари билан боғлиқ нозик ва мураккаб жарроҳлик амалиётлари муваффақиятли бажарилмоқда. Бунда соҳанинг моддий-техник базаси ва тиббий кадрлар салоҳияти давр билан мутаносиб равишда такомиллаштириб борилаётгани муҳим аҳамият касб этмоқда.

Ўзбекистон Республикаси Олий Мажлиси Қонунчилик палатаси Соғлиқни сақлаш масалалари қўмитаси депутатларининг таъкидлашича, Ўзбекистон Республикаси “Инсон аъзолари ва тўқималарининг трансплатацияси тўғрисида”ги қонуни лойиҳасига кўра инсон аъзолари, тўқималари ва ҳужайраларининг олиниши, тайёрланиши, сақланиши, юборилиши ва трансплантацияси фақат соғлиқни сақлаш вазирлигининг тегишли рухсатномасига эга давлат соғлиқни сақлаш муассасалари томонидан амалга оширилиши белгиланган.

Шунингдек, мазкур ҳужжат билан тана аъзолари, тўқима ва ҳужайралари бошқалар учун хавфли касалликлар рўйхатига киритилган хасталикка чалинган донорга тегишли аъзоларнинг кўчирилиши тақиқланиши каби тана аъзолари кўчирилиши билан боғлиқ бошқа кўплаб ҳолатларнинг ҳам тартибга солиниши хусусида маълумотлар келтирдилар.

Йиғилишда кун тартибидаги масала юзасидан йиғилганларнинг саволларига жавоблар берилди ҳамда таклифлар, фикр-мулоҳазалар тингланди.

Туман Тиббиёт бирлашмаси бошлиғи Фаҳриддин Абдуллаев ҳамда қатор тажрибали шифокорлар мамлакатимиз тиббиёт соҳаси ривожини янги босқичга кўтаришда муҳим аҳамият касб этиши кутилаётган мазкур қонун лойиҳаси юзасидан ўзларининг таклифларини ҳамда фикрларини билдирдилар. 

 Туман ҳокимлигининг Ахборот хизмати.