Президентликка Ўзбекистон «Миллий тикланиш» ДПдан номзод Алишер Қодировнинг ишончли вакили иштирокида тарғибот тадбири бўлиб ўтди

Маълумки, мамлакатимизда жорий йилнинг 24 октябрь куни катта тарихий, сиёсий жараён – Ўзбекистон Республикаси Президенти сайлови ўтказилади. Шу муносабат билан айни кунларда жойларда Ўзбекистон Республикаси Президентлигига номзодларнинг сайловолди тарғибот-ташвиқот тадбирлари ўтказилмоқда.

24 сентябрь куни Амударё туманида ана шундай тарғибот тадбирларидан бири бўлиб ўтди. Туман Маҳалла ва оилани қўллаб-қувватлаш бўлимида ўтказилган сайловолди тарғибот тадбирида Ўзбекистон Республикаси Президентлигига Ўзбекистон «Миллий тикланиш» демократик партиясидан номзод Алишер Қодировнинг Қорақалпоғистондаги ишончли вакили, партиянинг Қорақалпоғистон Республикаси Кенгаши раиси, Жўқорғи Кенгес депутати Тажибай Романов сайловчилар билан учрашди.

Тарғибот-ташвиқот тадбирида Ўзбекистон «Миллий тикланиш» демократик партияси Амударё туман кенгаши масъуллари, партия фаоллари, партиядан Халқ депутатлари туман кенгашига сайланган депутатлар, умумтаълим мактабларининг ижодий-маданий масалалар бўйича тарғиботчилари, овул ва маҳалла фуқаролар йиғинлари масъуллари, оммавий ахборот воситалари вакиллари иштирок этдилар.

Учрашувда ишончли вакил Тажибай Романов йиғилганларни Ўзбекистон Республикаси Президентлигига Ўзбекистон «Миллий тикланиш» демократик партиясидан номзод Алишер Қодировнинг таржимоий ҳоли ҳамда сайловолди дастури билан таништирди.

Қайд этилишича, номзоднинг сайловолди дастурида таълим-тарбия соҳасида, давлат бошқаруви тизимида, мамлакат иқтисодиётини ривожлантириш бўйича, ижтимоий адолат, қадриятларга ҳурмат ва фуқаро эркинликларини таъминлаш, ташқи сиёсат соҳаларида қатор янги ўзгаришлар амалга оширилиши белгиланган.

Хусусан, таълим-тарбия соҳасида “Янги авлод” дастури қабул қилиниб, унга кўра, бола туғилганидан мактабни тугаллагунигача бўлган даврни ўз ичига олган тарбия ва таълим дастури ишлаб чиқилиши учун ягона «Оила–боғча–мактаб» тизими яратилади.

Шунингдек, дастурда «Таълим инспекцияси» Олий Мажлис ҳузурида қайта ташкил қилиниши, педагоглар тайёрлаш тизими тубдан ислоҳ қилиниши, тарбиянинг ажралмас қисми сифатида Миллий киноиндустрия  ислоҳ қилиниш белгиланганлиги таъкидланди. 

Келтирилишича, сайловолди дастурида давлат бошқаруви тизимида маҳаллий кенгашларнинг ваколатлари ва фаолияти қайта кўриб чиқилиши, суд-ҳуқуқ тизимида туб ислоҳотлар амалга оширилиши кўрсатилган.

Қолаверса, дастурда мамлакат иқтисодиётини ривожлантириш бўйича давлат иштирокини тугатиш бўйича 5 йиллик давлат инновацион дастури қабул қилиниши, иш берувчилар учун ходимларни мажбурий суғурталаш мажбурий этиб белгиланиши, кам таъминланган аҳолини қўллаб-қувватлашнинг қадриятларга таянган янги тизими жорий этилиши борасида устувор тамойиллар белгиланган.

Шу билан бирга, партия сайловолди дастурида ижтимоий адолат, қадриятларга ҳурмат ва фуқаро эркинликларини таъминлаш соҳасида миллий урф-одат, анъаналар, шаклланган қадриятларга ҳурмацизлик учун жавобгарлик жорий қилиниши, ўзбек тили кенг қўлланиладиган, замонавий тараққиётга уйғун тилга айланиши учун ҳуқуқий асослар кучайтирилиши, сўз эркинлиги ва жамиятни демократлаштириш давом эттирилиши, Халқ қабулхоналари бепул юридик маслаҳат марказларига айлантирилиши, алимент фонди ташкил этилиши каби устувор вазифаларни амалга ошириш кўрсатилган.

Тарғибот тадбирида Ўзбекистон Республикаси Президентлигига Ўзбекистон «Миллий тикланиш» демократик партиясидан номзод Алишер Қодировнинг ишончли вакили Тажибай Романов йиғилганлар томонидан берилган саволларга жавоб берди.

Фотима Эшимбетова, ЎзМТДП Амударё тумани Кенгаши ижрочи котиби.